8Hefârec‐jofame qaŋgec bapa Elima (ʒâŋe i qaŋgec bapare mujumbieŋ hâcne) eki kia miti sakarecnehuc hecke‐jactewec.
9Eme Saulo, ʒâŋene Paulo wâc mumbiŋ, e Tiri Mârozi maŋ ba afec ecneme Elima ʒiŋuc âzâcnewec:
10“Sataŋte ŋic go, tiŋke biaŋte râsi sanaŋ, maŋge eeatuc â sindaŋzi fusucmakicne, go Wofuŋte hata dândâŋ imackeekic i wezimucko behecmu?
11Irec ʒi Wofuŋ tâpiri‐ticnere fuŋne honezemec; go tiŋtuŋ erâ dameŋ ŋondeŋ moc tatamac hohone tâmiric juzemec.” Mume izia ʒâŋene dapâc eme tiŋtuŋ qahuc mezi bajaŋ qajaŋ erâ menao roniŋte muwec.
12Wiac i fuame kiazi honerâ Wofuŋte mitire maname bipinehec eme mana ʒakiewec.
13Paulo â ŋicfâcne jaŋe Pafo hae beherâ wokeo mocwâc ferâ raku Pamfilia mâreŋko Perege haeo fisimbiŋ. Ira Johanezi behec‐joparâ Jerusalem haeo risiewec.
14Eme jaŋe Perege haeonec raku Pisidia mâreŋko Antiokia hae wasene ira fisimbiŋ. Ira juhapie sabata hombaŋ maickeme Judaŋic jaŋere mitificko ferâ ŋembiŋ.
15Eme soŋaŋ jaŋe sâcmutâc dâŋqâhâcte â porofete jaŋere dâŋqâreŋ gâcne wose tararâ ʒiŋuc jazambiŋ: “Âgo bureŋ, dâŋmiti moc maŋkeŋgopieŋko mupie mananaŋ.”