Aposolo Jaŋere Binaŋ 13:2-46

²Eme ʒoaŋ mocko sowa juhuc gae mitire tumaŋnehapie Tiri Mârozi dâŋ ʒiŋuc muwec: “Banaba â Saulo gie mujactepo i banicte baʒawiec‐jofaniŋ.”

³Mume sowa jurâ mejeŋic qizec‐jekicko râehuc numu jambuŋ ejacterâ miti kiŋaŋ râec‐jofapie rapic.

⁴Tiri Mârozi iŋuc ehuc sorec‐jofame jahe raku Seleukia haeo fisipic. Ira fisirâ wokeo ferâ raku Kipiro nucko fisirâ

⁵irec hae qizec Salami ira rarâ Judaŋic jaŋere mitificko ferâ Anuture dâŋ jazapic. Erâ Johane e jahehec mâmâc juhuc bafic‐jofawec.

⁶Eme nuc fotâcne‐fârerâ Pafo haeo fisimbiŋ. Ira fisirâ Judaŋic moc qaŋgec bapa â porofete burecne juwec, ʒâŋene Barajesu, e bâfuambiŋ.

⁷Ŋic e kia moc Seregio Paulo ere âgo juwec. Kia e maŋfânâŋ‐ticneheczi Anuture dâŋ manaocte ecneme Banaba â Saulo hefârec‐jofawec.

⁸Hefârec‐jofame qaŋgec bapa Elima (ʒâŋe i qaŋgec bapare mujumbieŋ hâcne) eki kia miti sakarecnehuc hecke‐jactewec.

⁹Eme Saulo, ʒâŋene Paulo wâc mumbiŋ, e Tiri Mârozi maŋ ba afec ecneme Elima ʒiŋuc âzâcnewec:

¹⁰“Sataŋte ŋic go, tiŋke biaŋte râsi sanaŋ, maŋge eeatuc â sindaŋzi fusucmakicne, go Wofuŋte hata dândâŋ imackeekic i wezimucko behecmu?

¹¹Irec ʒi Wofuŋ tâpiri‐ticnere fuŋne honezemec; go tiŋtuŋ erâ dameŋ ŋondeŋ moc tatamac hohone tâmiric juzemec.” Mume izia ʒâŋene dapâc eme tiŋtuŋ qahuc mezi bajaŋ qajaŋ erâ menao roniŋte muwec.

¹²Wiac i fuame kiazi honerâ Wofuŋte mitire maname bipinehec eme mana ʒakiewec.

¹³Paulo â ŋicfâcne jaŋe Pafo hae beherâ wokeo mocwâc ferâ raku Pamfilia mâreŋko Perege haeo fisimbiŋ. Ira Johanezi behec‐joparâ Jerusalem haeo risiewec.

¹⁴Eme jaŋe Perege haeonec raku Pisidia mâreŋko Antiokia hae wasene ira fisimbiŋ. Ira juhapie sabata hombaŋ maickeme Judaŋic jaŋere mitificko ferâ ŋembiŋ.

¹⁵Eme soŋaŋ jaŋe sâcmutâc dâŋqâhâcte â porofete jaŋere dâŋqâreŋ gâcne wose tararâ ʒiŋuc jazambiŋ: “Âgo bureŋ, dâŋmiti moc maŋkeŋgopieŋko mupie mananaŋ.”

¹⁶Eme Paulozi faharerâ niniŋkeniŋte mezi bâuruŋ‐joparâ ʒiŋuc jazawec: “Israe ŋicbureŋ ŋoŋe, â gâcne Anutu araŋ bacneeŋgopieŋ, mâmâc ŋazape mananiŋ:

¹⁷Israe ŋic nâŋâcne Anutu eki mimi apafâc‐nâŋec rowosâec‐joparâ Aigita mâreŋko juhapie basawec‐jopawec. Erâ tâpiri sanaŋ‐ticnezi irecnec jowac‐jopa warerâ

¹⁸mâreŋ burocnao gume qataŋ ejarehuc juhame jara 40 ewec.

¹⁹Erâ Kanaaŋ mâreŋko ŋicguru 7 bâsirowec‐joparâ mume apafâc‐nâŋec jaŋe mâreŋ i bâtâc barâ ru sâc erâ jumbiŋ. Ehame jara 450 tarawec.

²⁰Eme Kanaaŋ mâreŋko juhapie mumutiŋ ŋic bâfua‐jareme jurakupie porofete Samue fuawec.

²¹Eme ŋicwofuŋte mupie Anutuzi Benjamiŋte qâricfâc jaŋeraonec Kisi ŋokâ‐ticne Saulo âkendâŋne‐jareme jara 40 micne bajarehuc juwec.

²²Eme e bârârierâ Dawidi ŋicwofuŋ‐jeŋic âkendâŋnewec. Erâ ere dâŋ ʒiŋuc muwec: ‘No Isaire ŋokâ Dawidi ere maŋnane sâckeme hone wosâepo, eki hâcne mupe rereŋ‐nane juocmu.’

²³Eme Dawidi qâricfâc‐ticne jaŋeraonec Israe ŋic nâŋâcne bâbâpiaŋ moc fuaocte biŋedâŋ mukicne i fârinehec eocte Anutuzi mume Jesu hâcne fuawec.

²⁴Erâ ŋicŋondeŋko fua tâcneocte qanaŋ Johanezi Israe ŋic sasawa maŋjeŋic bârisierâ Miti Opâ ruaniŋte jazawec.

²⁵Erâ Johane e hata mucnekicne i âte tarahuc ŋic ʒiŋuc jazawec: ‘E muhuc munareeŋgopieŋ ŋic e no aricne. E jahacne ʒâhec warehuc jukac; e sâko no iŋucnezi mafahe‐ticne decnepe mi sâckeocmu.’

²⁶“Qomâfâc‐nane Abrahamte qâricfâc ŋoŋe, erâ gâcne Anutu araŋ bacneeŋgopieŋ, mupe mananiŋ: Bâbâpiaŋ irec dâŋ i nâŋâcnao râekicne.

²⁷Jerusalem ŋic fekicne wahakicne jaŋe Jesu mi ʒâŋitahuc ʒikao feocte mutaracnembiŋ. Jaŋe iŋuc epie porofete jaŋere findaŋdâŋ sabata hombaŋ sâc wose manac eeŋgopeneŋ i deŋkewec.

²⁸Jaŋe Jesure kiŋ basa‐bipiehuc sifu Pilato qizec qacnepie qâhâmowec.

²⁹Eme mitio mukicne sâc i etaracnerâ maripoŋkonec batararâ ʒâŋeruŋ hawecko râembiŋ.

³⁰Eme Anutuzi hâmockonec bâqâreme faharewec.

³¹Erâ ehec Galilaia mâreŋkonec Jerusalem haeo mâmâc rambiŋ jaŋe ʒoaŋ gie bapa bocjaha fua‐jarewec. Fua‐jareme honembiŋ jaŋe ine biŋe mumufâc‐ticne embiŋ juŋgopieŋ.

³²Eme mimiŋnefâc‐nâŋec wiac biŋe qajarekicne

³³i Anutuzi Jesu bâqâreme qâricfâc‐jeŋic nâŋâcnao fârinehec ewec, eme irec bubiaŋ dâŋ ŋazaeŋgopeneŋ. Irec hâcne Miti Mânec namba 2 ira dâŋ ʒiŋuc qâreŋkekicne fokac: ‘Go hâcne Ŋokâ‐nane, no miŋecgac bâfuacgukopac.’

³⁴Jesu bâqâreme faharewec e ʒâhec hâhâmo i mocwâc mi bâfuaocmu, irec Anutuzi dâŋ kecʒiŋuc muwec: ‘No Dawidi biŋe qacnepo irec fârine fofo sanaŋ i hâcne tahacke‐ŋarepemu.’

³⁵Erâ Miti Mânec mocko dâŋ ʒiŋuc fokac: ‘Go Tiriŋicge mi behetec gârecke ʒaŋ eocmu.’

³⁶Dawidire manaeŋgopeneŋ, e Anutuzi gie mucnewec i ŋicfâc‐ticne jaŋerao batararâ hâmowec. Hâmome mimi apafâc‐ticne jaŋerao râepie gârecke ʒaŋ ewec.

³⁷Â Anutuzi bâqârewec e ine gârecke ʒaŋticne tâmiric.

³⁸“Qomâfâc‐nane, ŋazape mananiŋ. Sâqocne bâbâtâmire i ŋic eki hâcne bâfuawecte irec dâŋzi maic‐ŋopakac.

³⁹Mosere sâcmutâc dâŋzi kiŋŋeŋic guriŋkeocte eipiewec, Jesurao siŋkepie ine sâcne bârârie‐ŋareocmu.

⁴⁰Porofete jaŋerao dâŋ ʒiŋuc fokac i ŋoŋerao sanaŋkezacte uŋ ŋazakopac:

⁴¹‘Oi, miti qiqikiŋ, ŋoŋe wareckerâ omaenʒepieŋ; no ŋoŋerao gie fuŋmoc bapemu; biŋene manarâ manapie mi bapane eocmu.’”

⁴²Eme Paulo â Banaba jahe mitifickonec wahapire ŋic jaŋe sabata hombaŋ mocko dâŋ irecteaŋ jazanicte mumbiŋ.

⁴³Eme tutumaŋkonec waharâ Judaŋic bocjaha â qâpuc Judaŋic jaŋere bâjâpecne gâcne jaŋe mâmâc Paulo â Banaba bâjâpec‐jofahapie Anuture jauŋko aimuŋ juniŋte mu sawaŋ ejarepic.

⁴⁴Eme sabata hombâŋ‐jeŋic mocwâc maickeme hae irec ŋic Anuture dâŋ mananiŋte mâretec fisimbiŋ.

⁴⁵Fisipie Judaŋic jaŋe honec‐joparâ mana sâqore‐jarerâ Paulo dâŋticne mu surec ehuc bawahambiŋ.

⁴⁶Iŋuc epie Paulo â Banaba jahe mai qanʒaŋ dâŋ ʒiŋuc muhuc jazapic: “Judaŋic ŋoŋe Anuture dâŋ qanaŋ ŋaŋazare mukicne. Ʒi ine ŋaŋac qikiŋnehuc juju sanaŋte biŋe eniŋte mi muŋgopieŋte behec‐ŋoparâ qâpuc jaŋerao ranacmu.