Text copied!
CopyCompare
Kâte Bible - Aposolo Jaŋere Binaŋ - Aposolo Jaŋere Binaŋ 12

Aposolo Jaŋere Binaŋ 12:3-22

Help us?
Click on verse(s) to share them!
3Iŋuc eme Judaŋic jaŋe aŋac‐jopame honec‐joparâ Petoro iŋuc jaha mume goreŋ sowa hombaŋ maickeme kâpâcwâru bambiŋ.
4Aakic hombaŋ tarame Judaŋic jowaturâ qaocte manasurâ mume kâpâcwâru ficko râerâ momori 16 jaŋe soŋaŋkembiŋ.
5Eme Petoro e kâpâcwâru ficko fohame kikefuŋ jaŋeraonec nunumu ʒuʒuhuc jaha Anuturao fehuc domawec.
6Eme Herode e hae fureme ŋic jowatuocte ʒâfo maickewec ŋafe ira momori jajahec jahe Petoro kâpâcwâru jajaheczi bândeŋnerâ bafopic, â momori gâcne motâc râpeo soŋaŋ domambiŋ wâc.
7Ehame ficmaŋko mi Wofuŋte aŋelo moczi ututuŋ fuarâ domame fic tamae‐fârezejec i! Eme aŋelozi Petoro gâjoŋnao qâuahuc wiwickerâ muwec: “Picpac faharec.” Mume izia Petorore meonec kâpâcwâru ŋeŋgoroŋkerâ wahawec.
8Eme aŋelozi âzâcnewec, “Umbikage jomarâ kikehuhuge hetec huoc.” Iŋuc eme aŋelozi mocwâc âzâcnewec, “Ŋaqige ʒoricne hetec hume bâjâpecnuc.”
9Eme bâjâpehuc aŋelozi wiac ecnewec i maname fârine mâcne, guŋko ecnekicne tinac ewec.
10Eme jahe motâc mocko momori domahapie jowaru raʒi, motâc mocko iŋuc jaha domahapie jowaru raʒi, eku hae ʒoŋaopec kimotâc sâko maickepire e jahac aŋkeme hupic. Hurâ hatao rahuc aŋelo e sipuac ewec.
11Eme Petoro e maŋne uŋtome ʒiŋuc muwec: “Ʒi mana‐jâmbâŋkekopac, Wofuŋ e aŋelo‐ticne soreme Herodere niŋgiŋkonec â Judaŋic jaŋere aarickonec bataracnukac.”
12Iŋuc mana tarahuc rarâ Johane Marekore neŋgoc, ʒâŋene Maria, ere ficko fisiwec. Ira bocjahazi tumaŋnerâ numuhuc ŋembiŋ.
13Eme Petorozi ʒae motâcko heickeme kiŋaŋ naru moc, ʒâŋene Rode, e mozi heickekac muhuc waharâ
14Petoro dâŋ hawari‐ticne manarâ motâc mi roro mâc ʒeri ehuc ficmaŋko ferâ, Petoro warejec domakac muhuc jazawec.
15Jazame jaŋe manarâ mumbiŋ, “Go maŋge sifuckekac.” Eki ine qizec qahuc muwec, “E jâmbâŋ domakac.” Eme jaŋe mumbiŋ, “I aŋelo‐ticnezi mecne.”
16Eme Petoro e heickehuc jaha domame motâc rorâ e jahacne honerâ maŋjeŋic omaewec.
17Eme dâŋemâc juniŋte me bazuc ejarerâ Wofuŋzi kâpâcwâru fickonec firuerâ bawahawec irec dâŋ binaŋ ejare‐fârerâ muwec, “Ŋoŋe dâŋbiŋe ʒi Jakobo â âgo gâcne jazaniŋ.” Iŋuc muhuc fâre fâsâerâ mocko rawec.
18Hae fureme momori jaŋe Petoro basarâ wemo wiaczi weniŋuc ecnejec muhuc mumutucne embiŋ.
19Eme Herodezi bâfuaniŋte mume basa‐bipiepie mu indiŋ ejarerâ momori jaŋe soŋaŋ i qâhâmoc‐jopaniŋte mutâcne‐jarewec. Erâ Judaia mâreŋ beherâ Kaisarea haeo hurâ juwec.
20Herode e dameŋ ira Tiro â Sidoŋ haeonec râsi ejarewec. Eme hae irec rune jaŋe qâturehuc fisirâ dâŋ mufâsâeniŋte ŋicwofuŋte ŋicbomboŋ, ʒâŋene Bilasto, mu bâmunaŋ ecnepie bafic‐jopawec. Jaŋe wiac nareŋ gareŋ‐jeŋic tâcnewecte i mocwâc ʒuhuckeniŋte iŋuc embiŋ.
21Eme Herode e dâŋ bârisie‐jareocte ʒâfo bajarewec i maickeme eri‐ticne barâ ŋicwofuŋ ŋeŋe‐ticnao waha ŋehuc mu âkeriŋ dâŋ jazawec.
22Jazame ŋic mâmâc sasawa fânâŋkecnehuc ʒiŋuc mumbiŋ: “Dâŋ i ŋicdâŋ mâcne, i nemure dâŋ.”

Read Aposolo Jaŋere Binaŋ 12Aposolo Jaŋere Binaŋ 12
Compare Aposolo Jaŋere Binaŋ 12:3-22Aposolo Jaŋere Binaŋ 12:3-22