Aposolo Jaŋere Binaŋ 11:2-30

²Irec Petorozi Jerusalem haeo risie feme Judaŋiczi opâ ruac jaŋe manacnepie mi sâckeme

³ʒiŋuc âzâcnembiŋ: “Go wemocte Mosere ma tâmiric iqic‐joparâ jaŋere meonec wiac nâmeŋ?”

⁴Eme Petorozi wiac fuawec i fuŋnaonecteaŋ qâwirickerâ ʒiŋuc jazawec:

⁵“No Jope haeo numuhuc juhape Wofuŋzi maŋko fuac enareme wiac kecʒiŋuc honepo: Wiac moc racsâko tinac tofane 4 ira basanaŋkehuc sambâŋkonec âkesuepie wahaku maŋfuŋ‐naneo fisiwec.

⁶Wahame findendeŋnehuc hone qârâwiŋ ejarehuc honepo: Maŋnao qowi kosa, micmâŋ â micnehec, erâ homa wiac â sawa wipe fowec.

⁷Ehame norao dâŋ wiwira kecʒiŋuc fuawec: ‘Ajoc Petoro, go hezu nâc ec.’

⁸Eme noni mupo, ‘Wofuŋ, misac, no wiac hecke‐nârekicne â mamakâcne moc mi nâekopac.’

⁹Iŋuc mupe sambâŋkonec dâŋ harierâ ʒiŋuc fuawec: ‘Anutuzi wiac muʒurekac i goki mi surec.’

¹⁰Wiac iŋuc fuame jahec â moc eme racticnehec fârepie sambâŋko risie fewec.

¹¹Eme manaŋgopieŋ, wiac i arictac ehame izia Kaisarea haeonec ŋic jahec â moc nore kiŋaŋ fârâ fic jumbeŋ ira fisimbiŋ.

¹²Fisipie Mârozi ʒiŋuc nazawec: ‘Go jaŋehec racmurâ maŋbahac mi ec.’ Eme rape opâ ruac ŋic 6 kecʒi jaŋe bâjâpecnumbiŋ. Ra fisirâ momori soŋaŋte ficko fepene

¹³dâŋ binaŋ kecʒiŋuc enârewec: ‘Nore ficko aŋelozi wefu fua‐narerâ ʒiŋuc nazawec: Go Jope haeo kiŋaŋ sorec‐jopatec Simoŋ, ʒâŋene moc Petoro, jowa warepie

¹⁴dâŋ mume go â wiacfâcge ŋoŋe manarâ biaŋke‐fârenʒepieŋ.’

¹⁵Eme no miti jazahape mârâc nâŋâcnao Tiri Mâro wahawec iŋuc jaha jaŋerao wahawec.

¹⁶Eme no i honerâ Wofuŋzi dâŋ kecʒiŋuc muwec i manasupo: ‘Johanezi opâ rua‐ŋarewec, ŋoŋe ine Tiri Mâro rua‐ŋarezo.’

¹⁷Eme nâŋâc Wofuŋ Jesu Kristo manasiŋkehapene wiac tahacke‐nârewec, ijaha jaŋe tahacke‐jareme no iŋucnezi wemocko Anutu qataracnezapo.”

¹⁸Iŋuc muhuc jazame jaŋe manarâ maŋjeŋic fâre wahame Anutu muteŋkehuc ʒiŋuc mumbiŋ: “Opo, Anutu e ŋic qâpuc maŋjeŋic bârisierâ juju sanaŋte biŋe eniŋte wâc mujarekac hâcne.”

¹⁹Stefano qarâ opâ ruac gâcne jopa bâtâtiec ejarepie haha rârâwiŋ qarâ tucnezi Foinike â Kipiro nucko â Antiokia haeo rambiŋ. Ra juhuc miti i Judaŋic sawa jazambiŋ.

²⁰Eme ŋondeŋ‐jeŋicko Kipiro nuckonec â Kirene mâreŋkonec opâ ruac ŋic jumbiŋ, jaŋe Antiokia haeo fisirâ Grikŋic jaŋehec iŋuc jaha muc manac ehuc Wofuŋ Jesure Biŋebiaŋ jazambiŋ.

²¹Eme Wofuŋzi tâpiri sicne‐jarehame jazapie ŋic guru sâko jaŋe manarâ maŋjeŋic bârisierâ Wofuŋte biŋe embiŋ.

²²Eme irec dâŋ Jerusalem kikefuŋ jaŋerao rame manarâ Banaba sorepie Antiokia haeo rawec.

²³Ra fisirâ Anutu uruc jauŋ‐ticne honerâ bubiaŋ manarâ maŋjeŋiczi Wofuŋtao herâŋke sanaŋkeniŋte faŋ qajarewec.

²⁴Banaba e ŋic biaŋne, maŋnao Tiri Mâro â mamanasiŋ fusewec. Eme hae ira ŋic wemo afecnezi Wofuŋtao ʒuhuckembiŋ.

²⁵Eme Banaba e Saulo bâfuaocte Taso haeo rawec.

²⁶Ra bâfuarâ jowame Antiokia haeo warepic. Erâ opâ ruac guruo jara moc juhuc ŋic bocjaha miti jaza qazuc epic. Antiokia hae ira hâcne ŋiczi Jesure kikefuŋ jaŋere ʒâŋe Kristoŋic mufuambiŋ.

²⁷Dameŋ ira porofete ŋic Jerusalem haeonec Antiokia haeo rambiŋ.

²⁸Ehuc jaŋeraonec moc, ʒâŋene Agabo, e Mârozi ecneme mâreŋ sâc roroc sâko fuaocte irec findaŋdâŋ muwec. Eme roroc i ŋicwofuŋ sâko Klaudio juhame fuawec.

²⁹Eme opâ ruac jaŋe dâŋ i manarâ moneŋ fojarewec sâc bâturerâ Judaia mâreŋko âgofâc‐jeŋic jaŋerao râepie raocte mupaŋkembiŋ.

³⁰Erâ moneŋ bâfuambiŋ i Banaba â Saulo jactepie bara opâ ruac soŋaŋ micnefâc‐jeŋic jarepic.