Aposolo Jaŋere Binaŋ 10:1-47

¹Kaisarea haeo ŋic moc juwec, ʒâŋene Konelio, e Italia mâreŋkonec momori jaŋere soŋaŋ juwec.

²Erâ e jahacne â wiacfâc‐ticne jaŋe Anutu araŋ bacnehuc rumerâ jujumbieŋ. Ehuc ŋic ŋokac bâmec bocjaha bajarewec, erâ Anuturao gâbâ numu jujec.

³Konelio e iŋuc ekume ʒoaŋ mocko owâ gieo Anuture aŋelo moczi maŋko fuac ecneme honeha ʒâŋene wiracnehuc muwec: “Konelio.”

⁴Wiracneme hone dendeŋnehuc fâfârerâ muwec, “Wofuŋ, wemo wiacte?” Eme eki muwec, “Nunumu â bâmecge Anuturao hefâme mana biaŋkewec.

⁵Irec go Jope haeo kiŋaŋ sorec‐jopatec ra ŋic moc ʒâŋene Simoŋ, ʒâŋe‐ticne moc Petoro, jowa warenʒepieŋ,

⁶e wase‐ticne Simoŋ, becsahac bapa, ere ficko ŋeŋe juju ekac; fic i hâwecmecko ŋekac.”

⁷Aŋelo e dâŋ i âzâcnerâ rame kiŋaŋ motec jajahec â momorifâc‐ticne jaŋeraonec mitine moc hefârec‐joparâ

⁸dâŋ binaŋ jaza‐fârerâ Jope haeo sorec‐jopame rambiŋ.

⁹Ŋic jaŋe raku hatao fombiŋ. Hae fureme mocwâc raku hae bâmbeŋkezo ehapie ʒoaŋ ʒâʒâŋiŋko Petorozi numuocte fic maŋne mocko fewec.

¹⁰Numuku nânâre hâmorâ mume rike bâmoc ecnehapie Wofuŋzi maŋko fuac ecneme wiac ʒiŋuc honewec:

¹¹Sambâŋ aŋkeme wiac moc racsâko tinac tofane 4 ira basanaŋkehuc mâreŋko âkesuepie wahawec.

¹²Maŋnao qowi â homa wiac â wipe fuŋne fuŋne fowec.

¹³Ehame dâŋ moc ʒiŋuc fuawec: “Ajoc Petoro, hezu nâc ec.”

¹⁴Eme Petorozi muwec, “Wofuŋ, misac, no wiac hecke‐nârekicne â mamakâcne moc mi nâekopac.”

¹⁵Mume dâŋ harierâ ʒiŋuc fuawec: “Anutuzi muʒurekac i goki mi surec.”

¹⁶Wiac i fuame jahec â moc eme izia racnehec fârepie sambâŋko risie fewec.

¹⁷Eme Petoro e wiac ʒâŋe furu honewec irec maŋ kukumbuc ecnehame Konelio ŋicfâc‐ticne jaŋe haeo fisirâ Simoŋ ficticnere wio wio raku bâfuarâ motâcko domahuc

¹⁸wiracne basac ehuc mumbiŋ, “Simoŋ, ʒâŋene moc Petoro, e fic ʒira jukac me?”

¹⁹Eme Petoro e wiac ʒâŋe furu‐ticnere manatâc qâtâc ehuc jaha juhame Mârozi ʒiŋuc âzâcnewec: “Manakic, ŋic jahec â moc fisirâ go basacguŋgopieŋ,

²⁰irec go hurâ jaŋehec racmurâ maŋ bahac mi ezemec, ŋic i noni mupe warembieŋ.”

²¹Eme Petorozi jaŋerao hurâ muwec, “Basacnuŋgopieŋ no hâcne ʒi, wemo wiacte wareŋgopieŋ?”

²²Mume ŋic jaŋe ʒiŋuc âzâcnembiŋ: “Momori soŋaŋ Konelio, e Anutu araŋ bacnehuc tiŋne juekac, â Judaŋic jaŋe ere manapie sâckeekac, e hâcne tiri aŋelo moczi fuacnerâ go ficticnao hefârecgurâ micgaonec dâŋ manaocte âzâcnewec.”

²³Iŋuc mupie Petorozi hezu hewâneŋ ejarewec. Fohapie hae fureme e â Jope haeonec opâ ruac gâcne mâmâc ŋic jaŋehec rambiŋ.

²⁴Jaŋe hatao ŋafe moc forâ raku Kaisarea haeo fisimbiŋ. Konelio e wiacfâcne â âgo qomâfâc‐ticne hetumaŋ‐jopame woŋec juhapie fisimbiŋ.

²⁵Fisirâ Petorozi ficko fezo ehame Koneliozi ware maŋfuŋnao fodaperâ muac baafec ecnewec.

²⁶Ecneme Petorozi ro bafaharehuc ʒiŋuc âzâcnewec: “Faharec, no ŋic jaha wâc.”

²⁷Eme muc manac ehuc ficmaŋko ferâ ŋic tumaŋnerâ ŋepie honec‐joparâ ʒiŋuc jazawec:

²⁸“Ŋoŋe Judaŋic nâŋere fuŋne manaŋgopieŋ, nâŋe ŋic furune ŋoŋehec ââgo â iiqic mi enaŋte aka henârekicne. No ine ŋoŋe wâwânâŋhec â hone suŋgiŋne mi muŋarepemurâ Anutuzi fuŋne naza nowatuc ewec.

²⁹Irec hâcne hefârecnupie warepemurâ mi quŋkepo. Eme ʒi hefârecnumbiŋ irec mupie manape.”

³⁰Iŋuc mume Koneliozi ʒiŋuc âzâcnewec: “No wiac ʒâŋe furu honerâ juwarehape miŋecgac ʒoaŋ gie bapa jahec â jahec ekac irec dâŋ binaŋ egarepe. No owâ gieo numuhape ŋic moc ŋaqi‐ticne tatamacnehec norao fuarâ

³¹ʒiŋuc nazawec: Konelio, Anutuzi nunumuge manarâ bâmecgere mana biaŋkewec.

³²Irec go Jope haeo ŋic sorec‐jopatec Simoŋ, ʒâŋe‐ticne moc Petoro, jowa warenʒepieŋ. Eki wase‐ticne Simoŋ, becsahac bapa, ere ficko ŋeŋe juju ekac; ficticne hâwecmecko ŋekac.

³³Eme no irec hâcne ŋic sorec‐jopape gorao fâmbiŋ. Eme go dâŋnane manarâ warekicte bunane biaŋkekac. Eme ʒi Wofuŋzi dâŋ gazawec i mutec mananaŋte Anuture maio tumaŋnerâ ŋefâreŋgopeneŋ hâcne.”

³⁴Eme Petoro e micafec erâ ʒiŋuc jazawec: “Anutu e ŋic nâŋâcne sahac‐nâŋeckopec maname feriŋ wahariŋ mi eekac i mana‐jâmbâŋkekopac ʒi.

³⁵Ŋic gurune gurune jaŋeraonec gâcnezi e araŋ bacnehuc aimuŋ jupie jaŋere maname mitio rorocjopane eekac.

³⁶Anutu e Israe ŋic nâŋerao dâŋ fârine bâfuawec, irec biŋe ŋoŋe manaeŋgopieŋ; e Jesu Kristo, ŋic sasawa nâŋâcne Wofuŋ hâcne, soreme wamadâŋ biaŋ nâzâ‐fârewec.

³⁷Erâ Judaia mâreŋko wiac fuawec, irec biŋe wâc ʒiŋuc manaeŋgopieŋ: Johane e ŋic Miti Opâre dâŋ jazahame gie qanaŋ Galilaia mâreŋkonec domarâ rawec;

³⁸â Jesu Nazarete haeonec e ine Anutuzi tâpiri â Tiri Mâro tahackecneme mâreŋ rârecke rac warec ehuc ŋic jauŋ bacjopawec â Sataŋzi bâumbeŋ‐jopawec jaŋe bâpiaŋ‐jopa‐fârewec. Anutuzi dopeckehame gie i hâcne bawec.

³⁹Eme Judaŋic nâŋere mâreŋko â Jerusalem haeo wiac muwec bawec i nâŋe hone manac efârembeŋ. Ehame juku maripoŋko qapie hâmowec.

⁴⁰Hâmorâ fohame ʒoaŋ jahec â moc eme Anutuzi bâɋârewec. Bâɋârerâ râeme fua sipuac ewec.

⁴¹Erâ ŋic kosa jaŋerao mâcne, ŋic biŋe mumufâc‐ticne, Anutuzi mârâc rowosâec‐nâpowec, nâŋerao sawa fuawec. Nâŋe hâcne hâmockonec fahareme ehec nâ gugumec â mumac qamanac embeŋ.

⁴²Erâ Anutuzi e ŋic ɋâricne â hâmokicne mumutara‐nâŋec âkendâŋnewec, irec biŋedâŋ ŋic guru sâc mutaniŋkerâ jazanaŋte munârewec.

⁴³Eme e manasiŋkeniŋmu jaŋe ʒâŋe biŋe‐ticnere erâ sâqocne tâmire‐jareocmu, i porofete jaŋe mufua‐fârembiŋ.”

⁴⁴Petoro e dâŋ iŋuc muhuc domahame, manahuc ŋembiŋ jaŋerao Tiri Mâro wahawec.

⁴⁵Eme Judaŋiczi opâ ruac, Petorohec rambiŋ, jaŋe Anutuzi ŋic qâpuc Tiri Mâro tahacke‐jareme bipic tatara ejarewec.

⁴⁶Ŋic qâpuc jaŋe dâŋmarac furune dâŋehuc Anutu musokapie manambiŋ hâcne. Eme Petorozi ʒiŋuc muwec:

⁴⁷“Nâŋâc Tiri Mârohec embeŋ, ŋic kecʒi jaŋe iŋuc jaha fua‐jareme Miti Opâ wemocko sakare‐jarezo.”