Text copied!
CopyCompare
Sembeleke - Aposolo - Aposolo 8

Aposolo 8:18-34

Help us?
Click on verse(s) to share them!
18Kutupa Saimonoma꞉ mo aposolo hali yaapoma꞉ kiki wieke ekina꞉ hande Holi Sipitidi epeekeeki handolo hata꞉ kota꞉ ipikana꞉ma꞉ manimanu mutia a꞉pa wia hata꞉ alota꞉
19I̱ma꞉ make yaka kiki hali ma꞉nda꞉na꞉ youna꞉ ua꞉ka꞉na꞉ Holi Sipitidi mina꞉ loa꞉me do wele pita꞉la꞉eki ma꞉nda꞉ kipe leekeme.
20Koto leekepate Pidama꞉ alota꞉ Koda꞉ma꞉ pa kita꞉la꞉ ale naka꞉ honema꞉ hambuluekema꞉ hone witele ekina꞉ neke tonka꞉na꞉ naka꞉ mani tonka꞉na꞉ ma꞉nda꞉ma꞉ hoeyaena꞉e.
21Du pitele ekina꞉ neketa꞉ niki ame̱le̱ na hake. Pa ekipeke naka꞉ pukita꞉ Koda꞉na꞉ leke popelekena꞉ tikitiki na pa꞉la꞉me.
22Do hoke hau pi ekina꞉ hone ma꞉nda꞉ la꞉ka꞉la wiaata꞉ yeni pea꞉peke. Tekehalima꞉ naka꞉ hoke hone witele ekimanu paa mea tombualiepe mata꞉la꞉me leekeme.
23I̱ma꞉ta꞉ neketa꞉ teto pita꞉la꞉ alema꞉ handeleke handolome. Kutupa naka꞉ hoke hau pitele ekima꞉ neke tonkao ula꞉me leekeme.
24Saimonoma꞉ alota꞉ Nakana꞉ma꞉ koto ale pimanu I̱ pa꞉ta꞉ a꞉paapa꞉na꞉ Tekehali pa꞉ta꞉ yeni peae leekeme.
25Kutupa Pida Dioni yaapoma꞉ mo Tekehalina꞉ pi walolo hata꞉ la hala꞉tiki peaata꞉ mo Diutuseleme da nane paa la꞉ka꞉la pulu hata꞉ mandane Sametia da pa꞉ta꞉manu mo Pi Seliapo wala꞉tia tia pepekeme.
26Tekehalina꞉ enisoloma꞉ Pilipi pa꞉ta꞉ alota꞉ Tiao. Oni Diutuseleme kini pea Kasa nane pula꞉ pota꞉ teli mea pue leekeme. Koto pota꞉ta꞉ ota꞉ hapu hayeke ale tukiki pa꞉ta꞉ peeke pota꞉e.
27Kutupa Pilipi tiaota꞉ peekeme. Pulu haena꞉ta꞉ mo pota꞉na꞉ Idiopia yuniki hali ma꞉nda꞉ ipikita꞉ mo Idiopia Kuini wanda꞉na꞉ mani paeyao handeteke hae leeke hali tieke manda꞉hande piekeme.
28Mo halita꞉ Diutuseleme da nane Koda꞉ pa꞉ta꞉ yeni pulu yopua ipika꞉ da la꞉ka꞉la yopulu piekeme. Ipikita꞉ mo hosima꞉ yola꞉la꞉ bokisi pita pota꞉na꞉ pulu hata꞉ potopede hali Aisayama꞉ wape piekeeki yata꞉po pitiekeme.
29Kutupa mo Holi Sipitidima꞉ Pilipi pa꞉ta꞉ alota꞉ Mo hosima꞉ yola yopula꞉ ale teke pa꞉ta꞉ leke pua pita꞉peke leekeme.
30Koto ekina꞉ Pilipi a̱i̱ya pua mo hali pa꞉ta꞉ peekepate mo halima꞉ mo Aisayama꞉ wape pa꞉la꞉ buka yata꞉polo pitiekeeki opua alota꞉ Naka꞉ koto yata꞉pele ekita꞉ hone witelepe leekeme.
31Mo halima꞉ alota꞉ Ma꞉nda꞉ma꞉ na waleke haena꞉ ekipa hone wiono alepe leekeme. Kutupa mo halima꞉ Pilipi pa꞉ta꞉ alota꞉ Do I̱ pilu pa꞉ta꞉ lopulao pitupana꞉ epoe leekeme.
32Mo hande halima꞉ mo Baibolo bukana꞉ yata꞉polo pitieke ekita꞉ doeki yeekeme. Ipikita꞉ sipisipi pita꞉la꞉ tupa꞉ kia kia pi na leekeme. Kutupa mo sipisipima꞉ mo itiki tunkulu hala꞉ halina꞉ leke popeleke nane a꞉pa haena꞉ kake a꞉mbaaso hata꞉ pi na la꞉lie tupa꞉ kota꞉ ipikana꞉ma꞉ ipika꞉ kake na a̱a̱ leekeme.
33Ipika꞉ hande tieke hayekeeki mea lopao pita꞉ta꞉ pi yokaalu epeke tupa꞉ na pimikime. Kutupa ipika꞉ kini pu mieke tapake epima꞉ lapeke ya꞉la꞉pe. Ipika꞉ da꞉ta꞉la꞉ ekita꞉ ma꞉nda꞉ma꞉ hoeyaasa꞉me la꞉la꞉eki yata꞉polo pitiekeme.
34Kutupa mo hande kapomani halima꞉ Pilipi pa꞉ta꞉ alota꞉ Do potopede halima꞉ta꞉ pilisi epi pa꞉ta꞉ ala꞉pe leekeme. Ipika꞉ kone ala꞉pe o ma꞉nda꞉ pa꞉ta꞉ ala꞉pe leekeme.

Read Aposolo 8Aposolo 8
Compare Aposolo 8:18-34Aposolo 8:18-34