Aposolo 7:45-52

⁴⁵Kutupa hao hao pea wetepena꞉ta꞉ nika꞉ apa꞉mei amedama꞉ta꞉ mo hande palai data꞉ ika꞉ apa꞉ ameda pa꞉ta꞉ meata꞉ ika꞉ kone mea tia pua꞉tiki pimikime. Diosua make mandakena꞉ puaata꞉ hande Koda꞉ma꞉ tolu lieke tapake wanda꞉halimanu ika꞉ kenke pa꞉ta꞉la minolo hata꞉ mea tia pemekeme. Kutupa koto kenke pa꞉ta꞉ mo palai da a꞉eya pa ha pelia haena꞉ kone Deipidi make opolo a꞉pa hayekeme.

⁴⁶Koda꞉ma꞉ mo Deipidina꞉ hayeke haumanu handaata꞉ ipiki pa꞉ta꞉ ta꞉na꞉ma꞉ homeekeme. Koto ekina꞉ Deipidima꞉ ipika꞉ apa꞉mei hali Dieikopena꞉ tapake ika꞉ Koda꞉na꞉ da a꞉eyaluekema꞉ Koda꞉ pa꞉ta꞉ I̱ma꞉ a꞉eyaano lae laa honke leekeme.

⁴⁷Koto leekepate Solomonoma꞉ Koda꞉na꞉ da a꞉eyaeyekeme.

⁴⁸Kutu piekepate ota꞉ oli manda hala꞉ Koda꞉ta꞉ haliwekima꞉ kikima꞉ a꞉eyaaseme da pa꞉ta꞉manu na hao hala꞉me. Koto mo hande potopede halima꞉ la꞉la꞉ tupa꞉

⁴⁹I̱ta꞉ hepeni nane hata꞉ kilu tombuao hao halome laata꞉ kenketa꞉ yaka anke tapa꞉pao hao halo alee laa Tekehalima꞉ alo hata꞉ alota꞉ Yaka data꞉ ekipiki da a꞉eyaluekema꞉ alemepe. I̱ hoto pitulu polo data꞉ hando pa꞉ta꞉ ya꞉ka꞉ta꞉pe.

⁵⁰Koto alemanu paeyaota꞉ I̱ma꞉ ya kone na wopua wina꞉ lolope laa leekeme.

⁵¹Iki make hoi pea hao haleme haliwekio. Ika꞉ puki manuta꞉ pi na opita꞉la꞉ wanda꞉halina꞉ pukima꞉ handelememe. Koda꞉na꞉ pi ale opua꞉peke ekita꞉ katake pokeeke hali leke hao halememe. Hande ika꞉ apa꞉mei amedama꞉ mo Holi Sipitidi kiayeke tupa꞉ ikana꞉ma꞉ make kiatiki pitelememe.

⁵²Ika꞉ apa꞉mei amedama꞉ta꞉ potopede hali homeke pa꞉ta꞉ kone tanda na halemekepe. Hande Koda꞉ ipika꞉ tikitiki yao hala꞉ e pokaasa꞉ Hali epolo piekeeki la haleeke haliwekita꞉ Koda꞉ma꞉ tapaeyeke haliweki kone ika꞉ apa꞉mei amedama꞉ limikime. Ame make ikana꞉ma꞉ koto Hali a꞉nda꞉ lomba limime.