Aposolo 7:3-49

³Kutupa Koda꞉ma꞉ ipiki pa꞉ta꞉ alota꞉ Naka꞉ tapake naka꞉ wanda꞉hali make naka꞉ kenke make mina꞉pa꞉laota꞉ I̱ma꞉ walo polo kenke pa꞉ta꞉ pua꞉peke leekeme.

⁴Koto leeke pi opuaata꞉ Eipoloha꞉ma꞉ mo Koledia wanda꞉halina꞉ kenke mina꞉pa꞉laota꞉ hande Hatani nane halo peekeme. Eipoloha꞉ma꞉ ipika꞉ ateke homao haena꞉ta꞉ Koda꞉ma꞉ ipiki pa꞉ta꞉ ame do iki haleme kenke pa꞉ta꞉ da yoka epena꞉ leekeme.

⁵Koto pita꞉ta꞉ Koda꞉ma꞉ Eipoloha꞉ma꞉ ota꞉ ipika꞉ kenke wina꞉yeke kenke hosiki alesiki kone ma꞉nda꞉ na haleekepate Koda꞉ma꞉ pi la꞉ witolo Eipoloha꞉ma꞉ pa꞉ta꞉ make ipika꞉ hoki nane hatiki polo peleme wanda꞉hali pa꞉ta꞉ make ota꞉ kulueke laa leekeme. Koda꞉ma꞉ do pi la꞉ wieke natena꞉ta꞉ Eipoloha꞉ma꞉ma꞉ta꞉ weki ma꞉nda꞉ make na mendiki hayeke dina꞉ leekeme.

⁶Koda꞉ma꞉ ipiki pa꞉ta꞉ pi dupa leekeme. Naka꞉ hoki nane halo peleme wanda꞉halita꞉ kenke ma꞉nda꞉ nane halo pelimikie. Koto kenke nane pua hata꞉ta꞉ pa hameke e pokaaso tanda mua꞉tiki pulu hata꞉ta꞉ bapi 400 bapimanu hao halimikie.

⁷Kutu pulu pelemepateta꞉ mo e pa hameke pokaape lolo peleme wanda꞉hali pa꞉ta꞉ I̱ma꞉ panisi peaalueke laa kutupa wetepena꞉ naka꞉ tapake wanda꞉halima꞉ta꞉ koto kenke nane mina꞉pa꞉lao do hale pa꞉ta꞉ a꞉pa I̱ pa꞉ta꞉ panda꞉puniao yeni pilimikie laa leekeme.

⁸Koto hoki naneta꞉ Koda꞉ma꞉ Eipoloha꞉ma꞉ pa꞉ta꞉ pi la꞉ wiekeeki tombo witolo hata꞉ ipiki pa꞉ta꞉ sekemesaisi hau waleekeme. Kutupa haena꞉ta꞉ Eipoloha꞉ma꞉ma꞉ta꞉ Aisa꞉ke mendia haena꞉ pula꞉ homeke paeyeketa꞉ Aisa꞉ke pa꞉ta꞉ sekemesaisi hau peayekeme. Kutupa Aisa꞉kema꞉ta꞉ Dieikope pa꞉ta꞉ sekemesaisi hau piekeme. Kutupa Dieikopema꞉ta꞉ mo hande tapake tapake kini pieke 12 haliweki pa꞉ta꞉ sekemesaisi hau peayekeme.

⁹Mo hande tapake tapake kini pieke haliwekima꞉ta꞉ Diosepe pa꞉ta꞉ honditi pitolo hata꞉ ipikita꞉ Idiepi nane hata꞉ pa hameke e pokaasa꞉ hali halo pena꞉yeke mani muluekema꞉ ma꞉nda꞉ma꞉ hambena꞉ lemekeme. Kutu pimikipate Koda꞉ ipiki yaapo hata꞉ta꞉

¹⁰ipika꞉ ka꞉nda꞉ pa꞉la꞉ ekimanu paeyao minolo haena꞉ kone Koda꞉ma꞉ ana꞉na꞉ handeteke hayekeme. Diosepeta꞉ mo Idiepi you hali Petou pa꞉ta꞉ pua hayeke dina꞉ta꞉ Koda꞉ma꞉ ipikita꞉ kipa baake hone wiki hali make hone lenkena꞉ pea wiki hali make haena꞉ leekeme. Kutu pieke ekima꞉ Petouma꞉ Diosepeta꞉ Idiepi nane kapomani you hali pitina꞉ laata꞉ ipika꞉ da kenkemanu paeyao make handeteke haena꞉ leekeme.

¹¹Koto hoki naneta꞉ mo Idiepi Keinani kenke yaapo paeyao pa꞉ta꞉ tea꞉ ki tieke epeeke handaata꞉ wanda꞉hali wopuma꞉ ka꞉nda꞉ma꞉ homa yapemekeme. Nika꞉ apa꞉mei amedama꞉ta꞉ nemanu ma꞉nda꞉ na handa꞉ wimikime.

¹²Koto ekina꞉ Dieikopema꞉ta꞉ Idiepi nane nemanu ula꞉me lemekeeki opuaata꞉ ipika꞉ eiyeketiti hande nika꞉ apa꞉mei ameda kone titi panake pa꞉ta꞉ koto pa꞉ta꞉ tapaeyekeme.

¹³Pa hoto yaapo peao paa tapaeyeke pita꞉ta꞉ Diosepema꞉ta꞉ ipika꞉ hameketiti pa꞉ta꞉ ipiki peneme yao la haleekeme. Kutu pieketa꞉ Petouma꞉ Diosepe ipika꞉ tapake wanda꞉halie lemeke ekita꞉ opua hone wiekeme.

¹⁴Koto ekina꞉ Diosepema꞉ta꞉ ipika꞉ ateke Dieikope pa꞉ta꞉ pi la꞉ moneaaso alota꞉ Neke make neke ame̱le̱ tapake wanda꞉hali paeyao make Idiepi nane ipupe laa leekeme. Mo wanda꞉hali paeyaota꞉ 75 wanda꞉hali haemekeme.

¹⁵Kutupa Dieikope Idiepi nane pua haota꞉ ipiki make nika꞉ apa꞉mei ameda make koto pa꞉ta꞉ hao homemekeme.

¹⁶Ika꞉ toko manuta꞉ Sekeme kenke pa꞉ta꞉ mea pua hoimikime. Koto hali lapa꞉ pu haemeke kenketa꞉ amba꞉ Eipoloha꞉ma꞉ma꞉ Heimona꞉ tapake pa꞉ta꞉ manima꞉ hambeeke kenkee.

¹⁷Hande Eipoloha꞉ma꞉ pa꞉ta꞉ Koda꞉ma꞉ pi la꞉ wiekeeki ota꞉ yao peaalo pieke nate mo Idiepi nane nika꞉ tapake wanda꞉halita꞉ tapake tieke kone haemekeme.

¹⁸Koto pita꞉ma꞉ta꞉ you hali ma꞉nda꞉ tiao Idiepi wanda꞉hali handeteke hayekepate Diosepe hayekeeki ipikana꞉ma꞉ na handeekeme.

¹⁹Nika꞉ tapake wanda꞉hali pa꞉ta꞉ ipikana꞉ma꞉ makeatiki pea puki tandama꞉ homaatiki piekeme. Panake hamba꞉ mea mendimiki wekisunu da pa꞉ta꞉ na mondu wia pitina꞉ leke pa hama꞉ nane homena꞉yeke mondu batiki pina꞉ leekeme.

²⁰Koto pita꞉ta꞉ Mosesita꞉ epeke weki seliaposikita꞉ inkikima꞉ mendiekepate pa da tukiki nane mea mondu wia pitina꞉ sumba꞉ tepo yapeekeme.

²¹Kutupa wetepena꞉ hama꞉ nane mea pua nuna꞉ pala꞉mba꞉ hao wieke alena꞉ Petouna꞉ wanekema꞉ mea puna daeyaota꞉ ipika꞉ weki kone haena꞉ leekeme.

²²Mosesima꞉ta꞉ mo Idiepi haliwekima꞉ epeke honemanu wia pu haemekeeki paeyao sukulu peata꞉ pi pi lo haemeke ekimanu make pea꞉peke ekimanu make ipikana꞉ma꞉ handa꞉ wia pitolo hata꞉ hali tieke hayekeme.

²³Mosesita꞉ ipika꞉ bapi 40 paeyeketa꞉ ipika꞉ Isulai tapake wanda꞉hali handolo peekeme.

²⁴Idiepi hali homekema꞉ Isulai hali ma꞉nda꞉ liekeeki Mosesima꞉ handaata꞉ mo hali tamba꞉ minolo hata꞉ mo Idiepi hali ota꞉ liekeme.

²⁵Mosesi ipika꞉ honema꞉ta꞉ Koda꞉ma꞉ I̱ ma꞉la꞉ ekita꞉ iki mea tapaano pa꞉la꞉me laata꞉ wanda꞉halima꞉ koto hone witelememe hone wiekepate mo Isulai wanda꞉halima꞉ koto hone na wimikime.

²⁶Da ma꞉nda꞉ kelepeeketa꞉ Isulai hali yaapo a꞉nda꞉ pitolo haepekeeki Mosesima꞉ handaata꞉ pua sa꞉sa꞉ pitolo alota꞉ Hali yaapo opua꞉pe laa Ipilikita꞉ hama̱la̱꞉e. Ekipeke ipilika꞉ kone a꞉nda꞉ pitelepepe laa leekeme.

²⁷Koto leekepate mo hali ma꞉nda꞉ yumbieke halima꞉ Mosesi pendulu baaso alota꞉ Neketa꞉ nika꞉ you hali hata꞉ pi yokaalu peaalo pa꞉la꞉ halita꞉ epima꞉ neke mea haena꞉ lea꞉pe.

²⁸Hande nakana꞉ma꞉ ambaneke mo Idiepi hali litolo pi tupa꞉ I̱ make luekema꞉ alepe laa leekeme.

²⁹Mosesima꞉ koto leeke pi opuaata꞉ Idiepi nane mina꞉pa꞉lao pindipa pua mo Midiani nane halo peekeme. Koto pa꞉ta꞉ hata꞉ta꞉ weki yaapo mondu wiekeme.

³⁰Bapi 40 yapeeketa꞉ Mosesita꞉ mo Sainai pote teke pa꞉ta꞉ hapu hayeke alena꞉ haena꞉ta꞉ ti to hayeke alena꞉ mo ti uleke pa꞉ta꞉ hata꞉ enisolo ma꞉nda꞉ta꞉ Mosesi pa꞉ta꞉ peneme yao waleekeme.

³¹Mosesima꞉ leke opo handake witolo hata꞉ mo ti teke pa꞉ta꞉ wotu handuluekema꞉ peekepate Tekehalima꞉ leeke pi make opiekeme dupa.

³²I̱ta꞉ naka꞉ apa꞉mei amedana꞉ Koda꞉ halome laata꞉ Eipoloha꞉ma꞉ Aisa꞉ke Dieikope amedana꞉ Koda꞉ halome la leekeme. Mosesima꞉ pututuma꞉ homolo hata꞉ na handa꞉liaeyekeme.

³³Mo hande Tekehalima꞉ ipiki pa꞉ta꞉ alota꞉ Neke hale kenketa꞉ yakopiki kenkee. Naka꞉ anke dake holo wie.

³⁴Ya Idiepi nane haleme wanda꞉halita꞉ tanda tieke mu haleme ekita꞉ I̱ma꞉ handolome. Ika꞉ e̱ alo hata꞉ kememe kememe pu halemeeki manuta꞉ I̱ma꞉ opuaata꞉ iki tamba꞉ muluekema꞉ hola꞉pa꞉niaalo a꞉pa pua꞉me. Neke do pa꞉ta꞉ leke epoe la alota꞉ Neketa꞉ mo Idiepi nane tapaalueke laa leekeme.

³⁵Hande Isulai wanda꞉halima꞉ta꞉ Mosesi kiaemekeme. Neketa꞉ nika꞉ you hali hata꞉ pi yokaalu peaalo pa꞉la꞉ hali halena꞉ neketa꞉ epima꞉ mea haena꞉ lea꞉pe laa lota꞉ pimikime. Koto hali koneta꞉ you hali hata꞉ tamba꞉ mina꞉la꞉ hali haena꞉ Koda꞉ma꞉ mea tapaeyekeme. Mo enisoloma꞉ handeteke haena꞉ Koda꞉ma꞉ tapaeyekeme. Hande ti to hayeke ale pa꞉ta꞉ hata꞉ Mosesi pa꞉ta꞉ peneme yao waleeke ekima꞉ tapaaso piekeme.

³⁶Mosesima꞉ mo wanda꞉hali Idiepi nane mina꞉pa꞉lao hatuku puaata꞉ mo Idiepi nane make mo Wepiki Dawala Ikali pa꞉ta꞉ make mo hapu hayeke ale pa꞉ta꞉manu make ipikana꞉ma꞉ bapi 40manu mo wanda꞉hali hatuku pominolo hata꞉ na hando haemeke hau tieke tieke pia꞉tiki piekeme.

³⁷Ipikana꞉ma꞉ mo Isulai wanda꞉hali pa꞉ta꞉ hali ma꞉nda꞉na꞉ dupa leekeme. Koda꞉ma꞉ I̱ tapaeya꞉ tupa꞉ iki pa꞉ta꞉ potopede hali ma꞉nda꞉ make tapaalieke. Koto someta꞉ ika꞉ tapake hali kone tapaalieke laa leekeme.

³⁸Ipiki make mo Isulai wanda꞉hali ame̱le̱ mo hapu hayeke alena꞉ momba꞉la haemekeme. Ipikita꞉ nika꞉ apa꞉mei ameda ame̱le̱ koto pa꞉ta꞉ hayeke halie. Mo Sainai Pote pa꞉ta꞉ hande ipiki pa꞉ta꞉ pi leeke enisolo yaapo hayeke halie. Koda꞉ma꞉ ipika꞉ da꞉ta꞉la꞉ pi niki pa꞉ta꞉ la kina꞉yeke Koda꞉ma꞉ ipiki pa꞉ta꞉ la haleekeme.

³⁹Kutu piekepate nika꞉ apa꞉mei amedama꞉ Mosesima꞉ leeke pi opua꞉peke ekita꞉ kiaemekeme. Idiepi nane paa la꞉ka꞉la polumeke hone witolo hata꞉ Mosesi pa nane pendilaemekeme.

⁴⁰Ikana꞉ma꞉ Etoni pa꞉ta꞉ alota꞉ Nakana꞉ma꞉ niki hatuku polo peleme koda꞉manu wepiae. Mo hande Idiepi nane hamono niki hatuku epea꞉ hali Mosesita꞉ hane pa꞉la꞉pe niki na handoloma꞉me lemekeme.

⁴¹Koto lemeke pita꞉ta꞉ mo wanda꞉halima꞉ kao sikima꞉ handeke ale wepia wiaata꞉ koto ale pa꞉ta꞉ ma꞉na꞉ lia halaata꞉ ikana꞉ma꞉ kone ika꞉ kikima꞉ wepieke ale ta꞉na꞉ma꞉ homolo hata꞉ ne pambaemekeme.

⁴²Kutu pimikipate Koda꞉ma꞉ta꞉ iki hoki la꞉ka꞉laata꞉ oli ya nane hala꞉ hombulanka꞉manu pa꞉ta꞉ mo wanda꞉halima꞉ panda꞉puniao pa yeni pina꞉ leekeme. Hande buka pa꞉ta꞉ potopede haliwekima꞉ wape pa꞉la꞉eki dupa Isulai wanda꞉halio. Ikana꞉ma꞉ta꞉ mo hapu hala꞉ alena꞉ bapi 40manu hata꞉ta꞉ kaomanu make sipisipi make lia halo haemeeki manuta꞉ I̱ pa꞉ta꞉ na kimime.

⁴³Kutupa ika꞉ palai data꞉ mo Moleke koda꞉ ipika꞉ palai da kone mea tia puaata꞉ ika꞉ wepia wina꞉ la꞉la꞉ hombulanka꞉ma꞉ handeke ale manuta꞉ mo Lepani koda꞉ ipika꞉eki kone mea tia pememe. Koto ale manuta꞉ ikana꞉ma꞉ kone ika꞉ panda꞉puniao yeni puluekema꞉ wepia wina꞉ lemeke alemanue. Koto peleme ekina꞉ I̱ma꞉ ikita꞉ mo Ba꞉biloni nane ankulao poemena꞉ mea tapaalueke laa leekeme.

⁴⁴Nika꞉ apa꞉mei amedama꞉ta꞉ mo hapu hayeke alena꞉ haemeke pita꞉ta꞉ mo hande tukiki pa꞉ta꞉ Koda꞉ hayeke palai data꞉ iki pa꞉ta꞉ hayekeme. Koto data꞉ Koda꞉ma꞉ Mosesi pa꞉ta꞉ pi la halolo hata꞉ pikisa make waleeke tupa꞉ Mosesima꞉ a꞉eyaena꞉ leekeme.

⁴⁵Kutupa hao hao pea wetepena꞉ta꞉ nika꞉ apa꞉mei amedama꞉ta꞉ mo hande palai data꞉ ika꞉ apa꞉ ameda pa꞉ta꞉ meata꞉ ika꞉ kone mea tia pua꞉tiki pimikime. Diosua make mandakena꞉ puaata꞉ hande Koda꞉ma꞉ tolu lieke tapake wanda꞉halimanu ika꞉ kenke pa꞉ta꞉la minolo hata꞉ mea tia pemekeme. Kutupa koto kenke pa꞉ta꞉ mo palai da a꞉eya pa ha pelia haena꞉ kone Deipidi make opolo a꞉pa hayekeme.

⁴⁶Koda꞉ma꞉ mo Deipidina꞉ hayeke haumanu handaata꞉ ipiki pa꞉ta꞉ ta꞉na꞉ma꞉ homeekeme. Koto ekina꞉ Deipidima꞉ ipika꞉ apa꞉mei hali Dieikopena꞉ tapake ika꞉ Koda꞉na꞉ da a꞉eyaluekema꞉ Koda꞉ pa꞉ta꞉ I̱ma꞉ a꞉eyaano lae laa honke leekeme.

⁴⁷Koto leekepate Solomonoma꞉ Koda꞉na꞉ da a꞉eyaeyekeme.

⁴⁸Kutu piekepate ota꞉ oli manda hala꞉ Koda꞉ta꞉ haliwekima꞉ kikima꞉ a꞉eyaaseme da pa꞉ta꞉manu na hao hala꞉me. Koto mo hande potopede halima꞉ la꞉la꞉ tupa꞉

⁴⁹I̱ta꞉ hepeni nane hata꞉ kilu tombuao hao halome laata꞉ kenketa꞉ yaka anke tapa꞉pao hao halo alee laa Tekehalima꞉ alo hata꞉ alota꞉ Yaka data꞉ ekipiki da a꞉eyaluekema꞉ alemepe. I̱ hoto pitulu polo data꞉ hando pa꞉ta꞉ ya꞉ka꞉ta꞉pe.