Text copied!
CopyCompare
Sembeleke - Aposolo - Aposolo 5

Aposolo 5:13-41

Help us?
Click on verse(s) to share them!
13Kutupa ikina꞉ mo pa haemeke wanda꞉halima꞉ pi laemekepate paala꞉ma꞉ homolo hata꞉ iki ame̱le̱ haluekema꞉ hone na wimikime.
14Kutu pimikipate amba꞉ na pu haemeke tupa꞉ ma꞉nda꞉ ma꞉nda꞉ lo wanda꞉weki make haliweki make Yesu pa꞉ta꞉ ta꞉ma꞉ni puluendi pimikime.
15Mo aposolo haliwekima꞉ koto haumanu pu haemeke ekina꞉ da wanda꞉halima꞉ yeni hapa papu wimiki wanda꞉halita꞉ tu mea pua pota꞉na꞉ yapa꞉ta꞉ yamaoma꞉ yamaoma꞉ peaata꞉ mandaneeki bedina꞉ uma꞉ uma꞉ pea paeyao pota꞉na꞉ wimikime. Koto hau pimiki ekita꞉ Pida pota꞉na꞉ yopulu hata꞉ ipika꞉ suasuama꞉ kone mo wimiki mandane wanda꞉hali ankulatiki yapena꞉ pimikime.
16Mo Diutuseleme da teke pa꞉ta꞉ haemeke daonimanu pa꞉ta꞉ haemeke wanda꞉hali paeya tapaoma꞉ ika꞉ yeni haemeke wanda꞉hali make hoke temoko pitieke wanda꞉hali make hatuku mea epemekeme. Kutu pieketa꞉ paeyao ika꞉ yeni tandeleekeme.
17Kutu pieke handaata꞉ mo yeni peao haemeke you haliwekina꞉ you halima꞉ ipiki ame̱le̱ mandakena꞉ haemeke haliweki tonka꞉na꞉ mo Sa꞉dusi tapake mandane haliweki kone ikana꞉ma꞉ta꞉ mo aposolo haliweki pa꞉ta꞉ hoke hone witolo hata꞉ soka꞉la꞉ma꞉ homemekeme. Hau ma꞉nda꞉ pulumeke hone wimikime.
18Kutupa mo aposolo haliweki da꞉ka꞉pa꞉ minina꞉ laata꞉ dipula mea lopaemekeme.
19Kutu pimikipate koto timbata꞉ Tekehali ipika꞉ enisolo ma꞉nda꞉ma꞉ mo dipula da pota꞉ lomba꞉ mea hande aposolo haliweki hama꞉ nane hatuku pua iki pa꞉ta꞉ alota꞉
20Mo tembolo da tukiki pa꞉ta꞉ honda꞉ pamba pua hata꞉ do panake da꞉ta꞉la꞉ pi wanda꞉halima꞉ opina꞉ wala꞉pa꞉peke leekeme.
21Mo hande aposolo haliwekima꞉ koto leeke pi opuaata꞉ da panake ka꞉la꞉polo haena꞉ mo tembolo da tukiki pa꞉ta꞉ honda꞉ pamba pua pi walemekeme. Mo yeni peao haemeke you haliwekina꞉ you halima꞉ ipiki ame̱le̱ mandakena꞉ haemeke haliweki tonka꞉na꞉ ikana꞉ma꞉ Diu ka̱le̱sete haliweki paeyaoma꞉ pi tieke hotuluekema꞉ mombelena꞉ lemekeme. Kutupa mo dipula da nane make pi tapaaso alota꞉ Koto hande haliwekita꞉ niki pa꞉ta꞉ hatuku mea ipupe laa lemekeme.
22Mo tembolo da handeteke haemeke haliwekima꞉ dipula da pa꞉ta꞉ opolo pua handemekepate pa mo aposolo haliweki na pitimikieki handaata꞉ paa la꞉ka꞉la pua mo ka̱le̱sete haliweki pa꞉ta꞉ la halolo alota꞉
23Nikita꞉ mo dipula da pa꞉ta꞉ opolo poma꞉ pita꞉ta꞉ pota꞉ setepe pu pamba pota꞉ kake pa꞉ta꞉ handeteke haena꞉ leeke haliweki haema꞉eki handoma꞉me. Kutu puma꞉pate pota꞉ lomba tukiki nane handolo poma꞉pate hali ma꞉nda꞉ na pitia꞉eki handoma꞉me laa lemekeme.
24Mo tembolo da handeteke hayeke you halima꞉ make mo yeni peao haemeke you haliwekima꞉ make koto lemeke pi opuaata꞉ koto hau pa꞉la꞉ ekita꞉ ekipa pa꞉la꞉pe laa hone elekeeleke wimikime.
25Kutu pimikipate hali ma꞉nda꞉ honda꞉ pamba a꞉pa iki pa꞉ta꞉ alota꞉ Opua꞉pe. Hande ikana꞉ma꞉ dipula mea lopaeme haliwekima꞉ta꞉ mo tembolo da tukiki pa꞉ta꞉ hata꞉ wanda꞉hali pa꞉ta꞉ pi walolo pitelememe laa leekeme.
26Koto ekina꞉ mo hande tembolo da handeteke hayeke you halima꞉ ipika꞉ haliweki ame̱le̱ puaata꞉ mo aposolo haliweki hatuku mulu pua epemekeme. Wanda꞉halima꞉ toopima꞉ iki liaama꞉na꞉yeke mo haliweki yopu hatuku mea epemekeme.
27Mo aposolo haliweki hatuku mea a꞉pa mo ka̱le̱sete haliwekina꞉ leke minekena꞉ haena꞉ leekeme. Kutupa mo yeni peao haemeke you haliwekina꞉ you halima꞉ iki lota꞉ pitolo alota꞉
28Mo hande halina꞉ bikina꞉ wanda꞉hali pa꞉ta꞉ pi ma꞉nda꞉ na wala꞉pa꞉peke laa iki pa꞉ta꞉ na lapa꞉peke laa ta꞉e leke pi loma꞉pate ikana꞉ma꞉ pimieki hone wia꞉pa꞉peke. Do Diutuseleme da paeyao pa꞉ta꞉ ika꞉ pi yama꞉ tumbulu bao ula꞉me. Kutupa make mo hande hali homea꞉ ekita꞉ ikana꞉ma꞉ niki tulaasememe laa leekeme.
29Pidama꞉ mo aposolo haliweki ame̱le̱ hata꞉ ipika꞉ pi hombo peaaso alota꞉ Nikana꞉ma꞉ta꞉ haliwekina꞉ pi amba꞉la na opiki Koda꞉na꞉ pi opua꞉pa꞉peke ya꞉la꞉me.
30Ikana꞉ma꞉ Yesu a꞉ka꞉tei wapepiki tina꞉ ikoko lia homaemepate nika꞉ apa꞉ amedana꞉ Koda꞉ma꞉ Yesu lapa꞉ pa꞉ta꞉ kone paa mea tiaeyekeme.
31Koda꞉ma꞉ Yesu paa mea tiaota꞉ ipikita꞉ Titina꞉ Pula꞉ Hali make Da꞉taasa꞉ Hali make ipika꞉ popeke kiki nane haena꞉ laata꞉ Isulai wanda꞉halima꞉ hone ma꞉nda꞉ la꞉ka꞉la mina wiaata꞉ ika꞉ hoke hau peleme ekimanu pa tumbaena꞉yeke piekeme.
32Nikana꞉ma꞉ do hande piteleme haumanu handaata꞉ la haloloma꞉ haliweki haloma꞉me. Nikana꞉ma꞉ homeke dia꞉me. Holi Sipitidima꞉ make nikana꞉ma꞉ make la haloloma꞉me. Koda꞉ma꞉ ipika꞉ pi opu hala꞉ wanda꞉hali pa꞉ta꞉ Holi Sipitidi halo hala꞉me.
33Koto lemekeeki ka̱le̱sete haliwekima꞉ opuaata꞉ mineke wotu pankolo hata꞉ mo aposolo haliweki lia homaalumeke hone wimikipate
34ka̱le̱sete hali homeke ma꞉nda꞉ta꞉ Pa꞉tisi hali ipika꞉ bikita꞉ Kamaliele pitiekeme. Ipikana꞉ma꞉ mo hande Lo Pimanu wala꞉la꞉ hali hata꞉ wanda꞉hali paeyaoma꞉ Ipikita꞉ epeke halie laa ipika꞉ pi lao haemekeme. Koto hali ipikana꞉ma꞉ta꞉ mo ka̱le̱sete haliweki momba꞉la pitina꞉ ipiki tiao hata꞉ alota꞉ Mo aposolo haliweki hama꞉ nane hatuku pupe laa
35mo ka̱le̱sete haliweki pa꞉ta꞉ dupa leekeme. Isulai haliwekio. Koto haliweki pa꞉ta꞉ hau ma꞉nda꞉ puluekema꞉ta꞉ titina꞉ amba꞉la hone wopu wia꞉pa꞉peke.
36Amba꞉ta꞉ Teudasi tiaota꞉ ipika꞉ honema꞉ I̱ta꞉ hali tiekee hone wiekeme. Koto ekina꞉ 400 haliweki ipiki ame̱le̱ ta̱lemekeme. Kutupa haemekepate mo hande hali lieke handaata꞉ ipiki ame̱le̱ ta̱la̱ haemeke haliwekita꞉ ta꞉ta꞉ ta꞉ta꞉ pea tankulupu alu alu pea pulu hata꞉ ika꞉ tumiki haemekeeki alu piekeme.
37Kotoeki pieke hoki naneta꞉ mo Ka꞉lili nane hao epeeke hali Diudasita꞉ kapomanima꞉ wanda꞉halina꞉ biki minolo haena꞉ Diudasi ipiki tiaeyekeme. Ipikana꞉ma꞉ make haliweki wopu yola꞉ mea hatuku peekepate pa koto hali make lieke handa ipiki ame̱le̱ ta̱lemeke haliweki make ta꞉ta꞉ ta꞉ta꞉ pea tankulupu alu alu pimikime.
38Koto ekina꞉ ame make do pita꞉la꞉ ekima꞉ I̱ma꞉ iki pa꞉ta꞉ do alome. Do haliweki pa꞉ta꞉ ikana꞉ma꞉ hau ma꞉nda꞉ na pea꞉pa꞉peke. Pa haena꞉ paape. Do ekina꞉yeke loa꞉me. Do haliweki ika꞉ piteleme hau manuta꞉ kenke halima꞉ hone wia ika꞉ e walea꞉ka꞉na꞉ta꞉ kota꞉ pa alema꞉ handilieke.
39Kutu pulu pia꞉pate Koda꞉ma꞉ pina꞉ lea꞉ka꞉na꞉ta꞉ kota꞉ ikana꞉ma꞉ mo haliweki bepolaapeke na ya꞉la꞉me. Kutu pimika꞉na꞉ta꞉ Koda꞉ ame̱le̱ a꞉nda꞉ lita꞉la꞉eki handilimikie leekeme. Kamalielema꞉ mana꞉ leeke pita꞉ mo ka̱le̱sete haliwekima꞉ opimikime.
40Mo aposolo haliweki epena꞉ wi la꞉ mepi peaata꞉ yombua bao alota꞉ Pa hoto ma꞉nda꞉ a꞉nda꞉ Yesuna꞉ bikina꞉ pi ma꞉nda꞉ na lapa꞉peke laa ta꞉e ta꞉e lo laata꞉ pao da tapaemekeme.
41Mo aposolo haliwekita꞉ ka̱le̱sete haliweki mina꞉pa꞉lao pulu hata꞉ Koda꞉ma꞉ ikita꞉ Yesuna꞉ bikina꞉ tanda pa꞉la꞉eki ana꞉na꞉ mea꞉pa꞉peke ya꞉la꞉me laa iki pa꞉ta꞉ hone wieke ekina꞉ ta꞉na꞉ma꞉ wopu homolo hata꞉ pemekeme.

Read Aposolo 5Aposolo 5
Compare Aposolo 5:13-41Aposolo 5:13-41