Aposolo 4:7-28

⁷Mo haliwekima꞉ mo aposolo haliweki pa꞉ta꞉ alota꞉ Eki wele pita꞉la꞉ ekima꞉ o eki bikina꞉ doeki pitelepepe lemekeme.

⁸Kutupa Pidata꞉ Holi Sipitidima꞉ tumba hake halima꞉ alota꞉ Wanda꞉halina꞉ you haliweki pita꞉ tondiki haliweki yaapoo.

⁹Do dikana꞉ma꞉ koto anke hoke hali mea epeaalopa꞉eki pa꞉ta꞉ loa꞉me. Ikana꞉ma꞉ diki pa꞉ta꞉ lota꞉ pitolo alota꞉ Do halita꞉ ekipa mea epeao pipipe alemepe.

¹⁰Iki paeyao mo Isulai wanda꞉hali make doeki opua꞉pe. Na꞉sa꞉tete hali Yesu Ketisota꞉ ikana꞉ma꞉ limipate Koda꞉ma꞉ paa mea tiaeyeke hali ipika꞉ bikina꞉ do hali epeke tupa꞉ tiao honkopu hao do hala꞉ handa꞉e leekeme.

¹¹Pa ekipeke Yesu pa꞉ta꞉ta꞉ mo Baiboloma꞉ alota꞉ Koto toopita꞉ iki mo da a꞉eteleme haliwekima꞉ kipa꞉la꞉me lemepate pa ameta꞉ koto toopi kone mo keneme toopi pa ula꞉me laa la꞉la꞉me.

¹²Kutupa niki mea detemono pa꞉ta꞉la꞉la꞉ hali ma꞉nda꞉ na hala꞉me. Oli ya oto pa꞉ta꞉ta꞉ mo wanda꞉hali mea da꞉taasa꞉ halina꞉ biki ma꞉nda꞉ dia꞉ya꞉leke loa꞉me leekeme.

¹³Mo haliwekima꞉ Pida Dioni yaapoma꞉ paala꞉ na homepekeeki handolo hata꞉ koto hali yaapoma꞉ sukuluna꞉ make na pepeke ota꞉ pa da haepeke hali yaapoe laata꞉ kota꞉ ikana꞉ma꞉ leke opa꞉ alu alu pea kutupa hone witolota꞉ Yesu ame̱le̱ pomu hata꞉ pa꞉la꞉ma꞉ hone wimikime.

¹⁴Kutupa mo hande mea tiao hayeke halita꞉ koto hali yaapo ame̱le̱ hayeke eki handolo hata꞉ pi ma꞉nda꞉ laapeke na yeekeme.

¹⁵Koto ekina꞉ mo hali tepo pa꞉ta꞉ alota꞉ Do ka̱le̱sete da mina꞉pa꞉lao pupe laata꞉ mo haliwekima꞉ ika꞉ ika꞉ kone alota꞉

¹⁶Do hali yaapo pa꞉ta꞉ta꞉ eki pumana꞉pe lemekeme. Oni Diutuseleme pa꞉ta꞉ haleme wanda꞉halima꞉ mo ota꞉ na hando haloma꞉eki ma꞉nda꞉ tieke pipikieki amba꞉ opua wilimime. Nikana꞉ma꞉ yapi alo alepeme pi lapeke na ya꞉la꞉pate

¹⁷pa do hau pita꞉la꞉ ekita꞉ mo wanda꞉hali pa꞉ta꞉ sa꞉mba꞉la꞉pa wiaapa꞉na꞉ do hali yaapo pa꞉ta꞉ Mo hande bikina꞉ wanda꞉hali pa꞉ta꞉ ota꞉ paa na wala꞉pa꞉peke laa pi taka꞉lakema꞉ lomana꞉e lemekeme.

¹⁸Koto ekina꞉ Pida Dioni yaapo wi la alota꞉ Do wanda꞉hali pa꞉ta꞉ Yesuna꞉ biki laa ala꞉ta꞉ ma꞉nda꞉ o pi ma꞉nda꞉ na wala꞉pa꞉pekee lemekeme.

¹⁹Koto leeke Pidama꞉ alota꞉ Koda꞉na꞉ leke popelekena꞉ hata꞉ ikana꞉ma꞉ aleme pi opua pita꞉la꞉ ekita꞉ a꞉pa꞉la꞉pe o Koda꞉na꞉ pi opua pita꞉la꞉ ekita꞉ a꞉pa꞉la꞉pe. Ika꞉ hone wia pi hotia꞉pa꞉peke lepekeme.

²⁰Dikana꞉ma꞉ handopa꞉eki make opupa꞉eki make pa wala꞉peke ya꞉la꞉me leekeme.

²¹Kutupa wanda꞉hali paeyaoma꞉ kutu piekeeki hando hao Koda꞉na꞉ pi laemeke handa hali yaapo panisi peaapeke na yeke pi taka꞉lakema꞉ paa laata꞉ da pena꞉ tapaemekeme.

²²Mo hande mea tiaeyeke halita꞉ ipika꞉ anke hoeya u pitina꞉ yapeeke bapita꞉ 40 tupa꞉ amba꞉ paeyekeme.

²³Pida Dioni yaapota꞉ lomba꞉ tapaeyeke pita꞉ta꞉ kuta kone ipilikana꞉ma꞉ ipilika꞉ wanda꞉hali pa꞉ta꞉ la꞉ka꞉la puaka꞉na꞉ mo hande yeni peao haemeke teke haliwekima꞉ make mo tondiki haliwekima꞉ make lemekeeki mo wanda꞉hali pa꞉ta꞉ la halepekeme.

²⁴Koto lepeke pi opuaata꞉ mo wanda꞉halima꞉ homeke hone wia Koda꞉ pa꞉ta꞉ yeni pitolo alota꞉ Tekehalio. Neketa꞉ ya kenke dawala tepo make kutupa koto pa꞉ta꞉ ula꞉ alemanu paeyao make nakana꞉ma꞉ wepia wina꞉ lele halie laata꞉

²⁵Nika꞉ apa꞉mei hali Deipidita꞉ naka꞉ e pokaeyeke hali haena꞉ma꞉ nakana꞉ma꞉ Holi Sipitidima꞉ pu tiaaso haena꞉ kone ipikana꞉ma꞉ alota꞉ Diendaili wanda꞉halima꞉ ekipeke mineke soka꞉la꞉ma꞉ homemekepe. Wanda꞉halima꞉ ekipeke pa hameke kone a꞉nda꞉ lombemekepe.

²⁶Do kenkena꞉ kini haliwekima꞉ tikitiki yao hata꞉ mo you haliweki ame̱le̱ momba꞉laata꞉ mo Tekehali pa꞉ta꞉ make ipika꞉ Ketiso pa꞉ta꞉ make mea lopaaluekema꞉ tiao haemekeme leekeme.

²⁷Ota꞉ leekeme laata꞉ Do daoni tieke pa꞉ta꞉ Hetodi pita꞉ Pontiasi Pailedi yaapoma꞉ make mo Diendaili haliweki pita꞉ Isulai wanda꞉hali ame̱le̱ make paeyaoma꞉ momba꞉laata꞉ naka꞉ yakopiki E Pokaeya꞉ Halita꞉ hande Ketiso haena꞉ lele hali Yesu mea lopaaluekema꞉ tiao haememe.

²⁸Ikana꞉ma꞉ momba꞉la hata꞉ kotoeki puluekema꞉ pimikipate nakana꞉ma꞉ naka꞉ hone wia naka꞉ wele pa꞉la꞉ ekima꞉ amba꞉ kone dupilimikie laa pina꞉ leleme.