APOSOLO 2:17-46

¹⁷Omailimoya sa-loko lone: Minoko onawa napa suwetibo yupekaya weune oluho maya muki numuto namato wewena libekoyoko, awotipolemotasidaya Omaimidana epaloti gaya li nimoladeko we owahasiya wamokidana nimudadeko we ilohosida wamo hemo domudalo moloyoko wamo mudakilae.

¹⁸Ito aya yupekaya nemo weune oluho maya nemo elekele wewenasida maya le ohebetoyoko wetome itae.

¹⁹Ito okulumaloka mikaloka oliwaki ane muki dilipoyoko mudakilae.

²⁰Mikaukaya olada joki jokilakiya soto pekolaiye, ito okulumalo towaya homidana omudaloya lubu jitibo ne.

²¹Sa-okadeko we napamidana uliwa li-minatabo wewenasida maya dilimekoloe loko liyoko Joelomamo luhuwa jibo maya ne.

²²Isilaelo mikau weinasi, gaya lo libekoloyo, elilo. Naseleti numutokati we Jisesi maya edimo luwawatipou minokadanaki, Omailokati ne liki litae loko Omaimo he elowo oetaiyoko abuha-wowolalo molo elenedanaki oliwaki nesa mukiya le soto piye.

²³Sa-ibo maya neboya, Omailimoya hapa molo hukaidanaki elibo nesa leko dadetipouya molokaiyoko edimosiya layoko ulalalo wesiya ilimi-liki wiki yoho yaha yalo kohayoko heliye.

²⁴Sa-ikaboya ono molikakaku maya netibo nesa lamiyoko miluma eleko helenebokuti maya Omailimo aku ilime sinaiye.

²⁵Sa-iboya, Jisesida gala maya Dewitikahoya luhuwa sa-loko jenebo maya ne: Nemoya we napamidana muda-elo isulu heko minokaka noe. Sakoya woko opa okatuwe loko nade lamawakaloka ne.

²⁶Yamuya muluneuya lahelepa noidanaki ohatama noiyoko noloe. Ito saina makoya nupanemu makoko elekoko oli nimideko minakoloe.

²⁷Nuka laloki welika, nukane nuwama woko lilitamideyo. Weuneya oloha numukuya hulonetamo.

²⁸Elewole nepa mutiwa litubo anuwa nilipedawolika, owisakaloya muluneu ohatama iyoko minakoloe loko liye.

²⁹Done ahonelika, lemo latate Dewitidamuya le wehe loko lo libituyo. Dewiti maya heliyoko molitabo alewa maya olotiya aha neyoko mudaikaka niae.

³⁰Omaimidana epaloti ga lokaka we maya neboma helekaiyoko Omailimo nemo unanele ipanele yuhauti yowanune epaloti we napane lolo oetatuwe loko elewole oko lo hukaibo ga maya Dewitikaho elekadanaki,

³¹olisauti lilimitiye loko lo mololetaibo weya aleuti sinatibo gamuya elekadanaki ukala laloki we maya ukala lilitokatiye loko helebo wewenasida ebaku maya weuna huloetamibo ne loko liye.

³²Sa-inako, Jisesida maya Omailimo ilime sinaibo maya lemo lomuda ihilawaloti muda-minudawo maya ne.

³³Ito Omailimoya ade lamawakaloka ilime molokadanaki aholakaho eimola lo moloetaiboto weuna oluhoya mekaiyoko aya weuna oluholimoya lemeko lilime sahu okaiyoko oloti maya ganehenaya eliki minae.

³⁴Ito Dewitiya okulumau yowamiboya, gahena sa-loko lone: Yowau welimoya nemo we napanemidana maya sa-loko lo miye: Nemo nadene lamawaka mino-loko woko minadeko,

³⁵ulakalo wesida maya ika heumauka hulobetoyoko minakilae, loko liye.

³⁶Sa-onebo neyo, muki Isilaelo wewenalitaya, elewole iki elilo. Aya weya kohaikayoko helibo we Jisesi maya we napate olisauti lilimitiye loko lo mololetaibo we netiye loko Omailimo ilime eto onebo we ne loko lo biye.

³⁷Loko liyoko, milumanipo elikadanaki Pitale aposolo malokamaki loka ibitiki wewenatele yuhase, lemoya nenaha etune.

³⁸Liki layoko Pitamamo sa-loko lo biye: Omailimoya lihimatipo hulobetatiye liki maya lahelamibo weutipo molabolawa maya eke liki aku hulalo. Sa-ikadeko lemokahoya Jisesi Kalaestida uliwaloya noku udolibetokuniyoko, Omailimoya weuna oluhola maya libekolaiye.

³⁹Edimoki ito oluhotipolekiya magoina hetoka wewenakiya lesa molobetadeko nisitabo wewena mukiya weuna oluho libekolo lo mololibetonebo maya ne,

⁴⁰loko Pitamamo lokadanaki, akuya amida meko ga mako sa-loko lo biye: Olotiya eke liki nisilo. Nei wewenasida maya demesa bikadeko Omailimo eke lolibetatiye, loko lo biye. 17-21 Joe 2:28-32 25 Sam 16:8-11 30 2 Sam 7:12; Sam 132:11 34-35 Sam 110:1

⁴¹Sa-lokaiyoko emo galalo elebo wewena 3000 Omaimo Jisesida wewenalalesito le kolaibo wewenasida noku udibitae.

⁴²Sa-ikiki muki yupeka maya makoko aweyaha iki elikadanaki aposolosi li biki api-napi abo gahena maya elikiki aha nodenesaki ito lotisapakiya niki miniki Omailoka likaka ae.

⁴³Sakiya minadanaki aposolomasi muki elewole ganehena maya lolo iki oliwaki nesahena maya lolo ikayoko nenako, muki wewena maya domodanipo adoha wiyoko minabo ne.

⁴⁴Elewole iki elebo wewenasi nesanipomamu muki lemo nesate liki li-minadanaki,

⁴⁵uvaminanipohena malokaya liki wiki maketilo molikadanaki ehada likiki uvaminanipo minamibo wewenamakiya ona moliki li yolalo malo ikadanaki,

⁴⁶muki yupekaya obohanipo makokoto moliki muki yupekaya monoka numuda napau monoka liki ito numudanipouka nodenesaya aha nodenesaki lotisapaki niki duka li makokoto moliki minadanaki,