Aposolo 2:12-44

¹²Liki liake, kigika gopa okago, gili gopa iake ligili hagili iki Agae, imane nana suni naleve.

¹³Liki likago, lugáate gopoguka likitake vain nagamí gosohá niake matúini gopa okago lutuka nilave, liki lamó.

¹⁴Liki likago, Pitá ave agivelage ileven-amagi oti minake gakó napagutí láa loko lo kimimó: Zelusale apá amelagita itó Zuta vegená lugáa neneta, neza gakó lo likimitoze, gili vevesiki gililo.

¹⁵Lekeza lelikumú nene vain nagamí niake kigika gopa okago nilave liki nilamóza, gó izoha nolanazo, lá oko nomive. Sipaki gamena nomive.

¹⁶Imane sunimú Ómasímini agepagutí gakó loaká ve Zoelé láa loko luhuva giza gakó nene mota gihila zekave:

¹⁷Minoko gamena napa asú iti zupa nene Sikalahúne numutó namató vegená mukitó lehizelikimikugo, izegipatini lakagapilamolite Ómasímini agepagutí gakó li nimiliko, gosohá velinite vamómáminiki nánigiko, ozahatini keza vamó ániganigave.

¹⁸Itó ámina zupa Sikalahúne nene lehizekimikugo, není gelekelé ve vená kezagi alikamú gakó li milanigave.

¹⁹Lá niko, okulumatokagi mikasilokagi golivagi netá haitopaitolímini nolekelepizugo ániganigave.

²⁰Guivahanímini golivagi gamena napa velesá utó amigo, mikasiuka nene golanigi loki lokilagi utó inogo ive, itó okulumató nene hómini agómulaló hitanogo ive, itó ikani nene ámina oko golakó loló inogo ive.

²¹Lá okiko, Guivahanímini agulizá iki sele li amita vegená nene kugutó vizinogo uve, loko Ómasímo lokave liki luhuva gizamóma neve.

²²Isilae mikasigú vese, lo likimitoze, gililo. Nasalete numutotí ve Izesú eza holutikú minake, Ómasilokatile liki litave loko Ómasímo hize lé otago, zámuzalaló molo gilike golivagi netá mukí ale utó molamó nene lekeza gilinave.

²³Ámina ve nene Ómasímo gozapá molo hukake gili netá aleko likigizakú molokago, lekelisi gala vevatini kigizakú milikago alími-liki viki zaló nilitunú apilikago hilimóma neve.

²⁴Lá ikamóza, gonosi matimatigú minamitimó okago, miluma gilike heleneikutí Ómasímo alémo otimó.

²⁵Agulizaki ve Tevití nene aikumú nene láa loko luhuva gizamóma neve: Neza Guivahani ánigo gisili hizekuke minoaká nouve. Voko gopa okatove loko nigizani zamagaloka noive.

²⁶Nenemú nigikagú laga noike, mulúnegú agila guluma noigo noluve. Itó nugupemú nene gele hamokó oko gegeva oko minanogo uve.

²⁷Není ahulonimikako nigika lamanaki nou vémina nugupéa anuva aminogo ive. Nemenía nene hele vegenalitiniuka ahulonetamitanikumú noluve.

²⁸Geza alévolé nemetameki mohona ito gapo nelepizenitika, govogisaló mulúnegú agila guluma igo minanogo uve, loko limó.

²⁹Uvónegita aménegita, neza avoteho Tevitikumú ale akutoko lo likimitoze. Eza helekago, gale zimikago, gonosi matimati galeva itína ha nego ánigiaká niave.

³⁰Eza Ómasímini agepagutí gakó loaká ve minoake, nénisi helekugo Ómasímo nene není izegipa nugunamotamokutí makolímo není hoza agepaló agulizaki ve napa alémo loló itove loko alévolé oko lo huta gakó nene geleake,

³¹gologí oletative loko lo mololeta vema galegutí otitikumú geleake, agika lamanaki veva agupéa anuva okative loko hele vegenalitiniuka amenía ahulotamimó neve loko limó.

³²Itó Izesuni nene Ómasímo galegutí alémo otekago, leza logómula gihilatunú ánigonouháma neve.

³³Itó Ómasímo agizani zamagaloka alémo moloake, amelaho lo mololetató nene Sikalahú molomikago, ámina Sikalahú itína nene lehizelimikago, ámina netá giliká ánigiká niave.

³⁴Itó Tevití nene okulumakú itemimóza, eza gakó makó láa loko limó neve: Mezaú ve eza není Guivahaníne nene není nigizani lamagaloka minoloko voko noako,

³⁵gala vega nene gigisa heumauka ahulokimikugo minanigave, loko lo amimóma neve.

³⁶Lá onoize, Isilae vegená mukí lekeza alévolé iki gililo. Ámina ve apilikago hili ve Izesú nene Guivahanite gologí oletative loko lo mololeta vema noive loko Ómasímo alémo apazá noive, loko limó.

³⁷Láa loko lo kemekago, miluma giliake Pitá ave itó aposolo lugáave loká ikitake ligivese, leza nana okuko lamaná itive.

³⁸Liki likago, Pitá láa loko lo kimimó: Ómasímo lihimatini apaso ahuloleketative liki likigika ali viligalo. Lá ikiko, leza Izesu Kilistoni agulizató monó nagamí hololikimikuko, Ómasímo Sikalahula lehizeleketanogo ive.

³⁹Lekezagi izegipatinigi itó hetoka nia vegenaki sele lo kemekiko ata vegená mukí nene Sikalahú lehizeleketanogo lo mololeketonoimóma neve.

⁴⁰Loko Pitá loake, mukí gakó miní ameko kagata aleko itína gamena ve neginagi keí holúikú ahulikimiiki ikiko Ómasímo lukugutó vizitive, loko lo kimimó.

⁴¹Láa loko lo kemekago, aí gakó gili alemoláa goha 3 tausen nene Ómasímo Izesuni vegenalaló miní ameketago, monó nagamí hilikitamó.

⁴²Lá ikago, gamena gamena amuza miliki alegesá iake gili hamó iki aposolo apí i keme gakó giliake, hanuva nosaki lepa nosaki niki Ómasiloka liki miniaká amó.

⁴³Lá niake, aposolomate haitopaitó alévolé suni aleke golivagi netá alikago, vegená mukí kehelele vizigo minamó.

⁴⁴Izesunimú gili alévolé iki mina vegenalite nene netá matá ali minamó nene mukitó netáini ali minake,