Aposolo 23:1-24

¹Kutupa Poloma꞉ mo ka̱le̱sete haliweki wotu handake witolo hata꞉ alota꞉ Kametitio. Hokeeki na piki Koda꞉ pa꞉ta꞉ epeke tupa꞉ hatiki pea ame make hata꞉ pua꞉me leekeme.

²Kutupa mo yeni peao haemeke you haliwekina꞉ you hali A꞉na꞉naisima꞉ Polo teke pa꞉ta꞉ haemeke haliwekima꞉ Polona꞉ kake da꞉ka꞉pa꞉ lina꞉e leekeme.

³Kutupa Poloma꞉ ipiki pa꞉ta꞉ alota꞉ Koda꞉ma꞉ neke lieke. Neketa꞉ yayapiki hau pu hala꞉ halie leekeme. Mo hande Lo Pimanu mana꞉ leeke ekina꞉ pi yokaalu puluekema꞉ koto handeteke pilipateto hande Lo Pimanu na opiki nakana꞉ma꞉ I̱ pa lina꞉ leme leekeme.

⁴Hande ipiki teke pa꞉ta꞉ haemeke haliwekima꞉ alota꞉ Koda꞉ ipika꞉ yeni peao haleme you haliwekina꞉ you hali pa꞉ta꞉ hoke pi pa lelipikipe lemekeme.

⁵Kutupa Poloma꞉ alota꞉ Kametitio. Ipikita꞉ yeni peao haleme you haliwekina꞉ you halie hone na ua꞉me leekeme. Hande wape pea ula꞉eki doe. Naka꞉ wanda꞉halina꞉ you hali pa꞉ta꞉ hoke pi na lapeke la꞉la꞉me leekeme.

⁶Kutu piekepate Poloma꞉ mo hande ka̱le̱sete haliweki handaata꞉ mo Sa꞉dusi Pa꞉tisi yaapo tapake haliweki a꞉pa pita꞉ pelememe hone wia iki pa꞉ta꞉ pi anekema꞉ alota꞉ Kametitio. I̱ta꞉ Pa꞉tisi hali hata꞉ Pa꞉tisi tapake weki mendia꞉me laata꞉ Do I̱ pa꞉ta꞉ pi yokaalu piteleme ekita꞉ hande I̱ polo tupa꞉ wanda꞉hali mea tiaalo pa꞉la꞉ ekina꞉ pitelememe laa leekeme.

⁷Koto pita꞉ Poloma꞉ leeke handa mo Sa꞉dusi Pa꞉tisi yaapo tapake haliwekima꞉ ape ape laa ka꞉ta꞉ alu alu pea ta꞉ta꞉ ta꞉ta꞉ pea haemekeme.

⁸Mo hande Sa꞉dusi tapake haliwekima꞉ lo haemeke ekimanu dupa Homemeke wanda꞉hali paa na mea tialieke laa mo enisolo tapaketa꞉ na hao hata꞉ pelememe laa make mo temokomanu make na pita꞉ pelememe laa lo haemekepate mo Pa꞉tisi tapake haliwekima꞉ koto pi paeyao opu haemekeme.

⁹Kutupa ape ape alo hata꞉ mandane Pa꞉tisi tapake Wape pea wala꞉tiki pu haemeke haliwekima꞉ tiao alota꞉ Do halita꞉ eki a꞉nda꞉ ketete make na handa꞉ witoloma꞉me. Enisoloma꞉ o temokoma꞉ ipiki pa꞉ta꞉ la pia꞉pe niki mata꞉la꞉me lemekeme.

¹⁰Kutupa mo hande ape ape daeyao lemeke handa mo a꞉nda꞉ tumiki halima꞉ mo haliwekima꞉ Polo mea pa lusinki paama꞉na꞉ ipika꞉ a꞉ndeli miniki haemeke haliwekima꞉ Polo pendilao mea mo ami haliwekina꞉ hala꞉ da pa꞉ta꞉ hatuku pena꞉yeke pi laa tapaeyekeme.

¹¹Kutupa nate ma꞉nda꞉na꞉ timba Tekehalima꞉ Polo teke pa꞉ta꞉ a꞉pa hata꞉ alota꞉ Honkopu hapeke. Do Diutuseleme da pa꞉ta꞉ yaka pi la halawaeye tupa꞉ mo Loma꞉ da pa꞉ta꞉ make pi la halawaalena꞉e leekeme.

¹²Kutupa da kelepeeketa꞉ Diu haliwekima꞉ tome tome pamba nindi pea alota꞉ Ne ikali a̱i̱ na neke hata꞉ Polo amba꞉la lumana꞉e lemekeme.

¹³Kutupa mo 45 tupa꞉ haliwekima꞉ nindi pea koto lemekeme.

¹⁴Kutupa mo yeni peao haemeke teke haliweki pa꞉ta꞉ make mo tondiki haliweki pa꞉ta꞉ make pua alota꞉ Nika꞉ kone ota꞉ nindi tieke pea Ne ikali a̱i̱ na neke hata꞉ Polo amba꞉la lumana꞉e loma꞉me lemekeme.

¹⁵Koto ekina꞉ ikana꞉ma꞉ mo ka̱le̱sete haliweki ame̱le̱ hata꞉ mo a꞉nda꞉ tumiki hali pa꞉ta꞉ pi tapaapa꞉peke dupa. Hande Polota꞉ ipika꞉ pi yokaalu ota꞉ tikitikina꞉ pumana꞉yeke hatuku a꞉pa꞉peke laa tapaapa꞉peke lemekeme. Kutupa Polota꞉ a̱i̱ na opolo pa ipulu haena꞉ kone amba꞉ lulumeke lemekeme.

¹⁶Polo ipika꞉ belikina꞉ eiyekema꞉ hande haliwekima꞉ yuwia pituluekema꞉ lemekeeki opua puata꞉ mo ami haliwekina꞉ hala꞉ da tukiki pa꞉ta꞉ honda꞉ pamba Polo pa꞉ta꞉ pua la haleekeme.

¹⁷Kutupa Poloma꞉ opisa hali homeke epena꞉ wi la꞉ mea alota꞉ Do wekihalita꞉ mo a꞉nda꞉ tumiki hali pa꞉ta꞉ la halena꞉yeke hatuku pua꞉peke leekeme.

¹⁸Koto ekina꞉ hatuku mea pua mo a꞉nda꞉ tumiki hali pa꞉ta꞉ alota꞉ Hande dipula pila꞉ hali Poloma꞉ I̱ wi la alota꞉ Do wekihalima꞉ mo a꞉nda꞉ tumiki hali pa꞉ta꞉ pua la halena꞉yeke hatuku pua꞉peke lea꞉me leekeme.

¹⁹Mo a꞉nda꞉ tumiki halima꞉ hande wekihalina꞉ kiki mina hosiki mo pate leke hatuku pua tome tome la lota꞉ pea alota꞉ Eki pi la kuluekema꞉ lepe leekeme.

²⁰Kutupa ipikana꞉ma꞉ alota꞉ Mo Diu haliwekima꞉ tome tome pamba mo Polona꞉ pi yokaalu tikitikina꞉ puluekema꞉ belia neke pa꞉ta꞉ laa mo ka̱le̱sete haliweki pa꞉ta꞉ hatuku epoelena꞉ honke lelimikie lememe leekeme.

²¹Koto lelemepate nakana꞉ma꞉ na opua꞉peke. Pa ekipeke mo 45 tupa꞉ haleme haliwekima꞉ nindi pea ne ikali a̱i̱ na neke koto Polota꞉ titina꞉ amba꞉la lumeke laa pota꞉na꞉ yuwia pita꞉ tikitiki yao naka꞉ lolo peleeki opuluekema꞉ handeteke pita꞉ pelememe laa leekeme.

²²Koto ekina꞉ mo a꞉nda꞉ tumiki halima꞉ hande wekihali Pu la alota꞉ Nakana꞉ma꞉ ma꞉nda꞉ pa꞉ta꞉ pua I̱ma꞉ la hala pua꞉me pi na lapeke leekeme.

²³Koto laaka꞉na꞉ a꞉nda꞉ tumiki halima꞉ opisa hali yaapo epena꞉ wi la꞉ mea alota꞉ Ame timba 9 okoloko tupa꞉ mo ami haliweki 200 make hosi ma꞉na꞉ hokina꞉ pitu haleme ami haliweki 70 make dolo miniki haliweki 200 make Sesatia da nane pena꞉yeke ipilikana꞉ma꞉ tikitiki yao haena꞉ lapa꞉peke.

²⁴Kutupa Polo pitulu pa꞉la꞉ ma꞉na꞉manu mea haena꞉ laata꞉ mo kapomani you hali Pilikisi pa꞉ta꞉ yopu handeteke hatia hatuku pua꞉peke leekeme.