Aposolo 21:15-35

¹⁵Kutupata꞉ nika꞉ ala꞉ta꞉ ala꞉ta꞉ hombo pea wia oli Diutuseleme da nane poma꞉me.

¹⁶Kutupa mandane Sesatia Ketiso wanda꞉halima꞉ niki ame̱le̱ puata꞉ mo Saipotasi hali Menasonita꞉ titina꞉ pi mieke hali ipika꞉ da pa꞉ta꞉ hamonoyeke niki hatuku pememe.

¹⁷Diutuseleme da nane poma꞉ dina꞉ta꞉ Ketiso wanda꞉halima꞉ ta꞉na꞉ma꞉ homolo hata꞉ niki handa꞉ mimime.

¹⁸Kutupa da ka꞉la꞉paota꞉ mo handeteke haemeke tondiki haliweki paeyao pitina꞉ Polo ame̱le̱ nikita꞉ Dia꞉mesi handolo poma꞉me.

¹⁹Kutupa Poloma꞉ keiyae pi laa ipikana꞉ma꞉ amba꞉ pi wala꞉ tia pomieke pita꞉ Koda꞉ma꞉ mo Diendaili wanda꞉hali pa꞉ta꞉ pieke ekimanu homeke homeke lo la hala꞉tiki pia꞉me.

²⁰Kutupa mo haliwekima꞉ kotoeki opuaata꞉ Koda꞉na꞉ pi laememe. Kutupa ipiki pa꞉ta꞉ alota꞉ Kameo. Hande Diu haliweki paeyaoma꞉ pi mimiki ekita꞉ handeleme. Paeyaoma꞉ hande Lo Pimanu opuluekema꞉ hone wotu witelemepate

²¹mandane haliwekima꞉ iki pa꞉ta꞉ lemekeeki dupa. Hande hali Poloma꞉ mo Diendaili wanda꞉hali ame̱le̱ haleme Diu haliweki pa꞉ta꞉ta꞉ Mosesima꞉ waleekeeki mina꞉pa꞉lao ika꞉ wekisunu sekemesaisi hau na piki Diu haliwekima꞉ pita꞉la꞉eki na pea꞉pa꞉peke laa walo hala꞉mee alememe lememe.

²²Koto ekina꞉ eki pumana꞉pe. Mo haliwekima꞉ neke epeleeki ota꞉ opilimikie lememe.

²³Koto ekina꞉ nikana꞉ma꞉ neke pa꞉ta꞉ lolo poloma꞉eki pea꞉peke lememe.

²⁴Tonkopu haliwekima꞉ nindi pea do halememe. Do haliweki ame̱le̱ hata꞉ta꞉ naka꞉ loke epeao kutupa ika꞉ you itiki makole mina꞉yeke ika꞉ yenki halawapeke lememe. Koto ekina꞉ paeyaoma꞉ naka꞉ hande Lo Pimanu opiteleeki handolo hata꞉ neke pa꞉ta꞉ leme pimanu na opilimikie lememe.

²⁵Kutu pa꞉la꞉pate hande pi mimiki Diendaili wanda꞉hali pa꞉ta꞉ wape tapaaso dupiki pi loma꞉me. Ikana꞉ma꞉ toopi tima꞉ wepia ula꞉ alemanu pa꞉ta꞉ lia hala꞉eki na neke we make na neke da꞉ka꞉pa꞉ mina homaasa꞉eki make na neke kutupa loke hoeyaasa꞉eki make na pina꞉e loma꞉me lememe.

²⁶Kutupa Poloma꞉ mo hande haliweki hatuku puata꞉ da ka꞉la꞉paota꞉ iki ame̱le̱ ipika꞉ loke epeao mo tembolo da tukiki pa꞉ta꞉ honda꞉ pambaata꞉ pua hande loke epeaasa꞉ ekina꞉ natemanu la ulu ekima꞉ make mo haliweki paeyaona꞉ yenki halawaaluekema꞉ pemekeme.

²⁷Hande nate watake hata꞉ paeluekema꞉ haena꞉ mo Eisia nane hao epemeke Diu haliwekima꞉ Polo mo hande tembolo da tukiki pa꞉ta꞉ hayekeeki handaata꞉ wanda꞉hali paeyao sutiao Polo da꞉ka꞉pa꞉ mina hata꞉ alota꞉

²⁸Isulai haliwekio. A꞉pa niki pa꞉ta꞉la꞉pe lemekeme. Nika꞉ wanda꞉hali pa꞉ta꞉ make mo hande Lo Pimanu pa꞉ta꞉ make do da pa꞉ta꞉ make wanda꞉hali paeyaoma꞉ hoke hone wina꞉yeke la꞉tia pomina꞉la꞉ hali doe lemekeme. Kutupa make do tembolo da tukiki pa꞉ta꞉ Kitiki haliweki hatuku a꞉paata꞉ do pi ula꞉ da amba꞉ hoeyaeya꞉ka꞉ta꞉me laa lemekeme.

²⁹Amba꞉ta꞉ Polo mo hande Epesese da hali Totobimasi yaapo daoni nane pomipikieki hando hao ika꞉ honema꞉ta꞉ Poloma꞉ koto hali tembolo da tukiki pa꞉ta꞉ hatuku mea pulu pia꞉me hone wimikime.

³⁰Kutupa mo daoni wanda꞉hali paeyao tiao anke hao pua homeke pa꞉ta꞉ momba꞉la hata꞉ Polo da꞉ka꞉pa꞉ mina mo tembolo da hama꞉ nane yola꞉ mea pua kutupa kuta kone mo pota꞉manu hambemekeme.

³¹Kutupa Polo ota꞉ lia homaaluekema꞉ taapolo haena꞉ hali ma꞉nda꞉ma꞉ mo hande Loma꞉ ami haliwekina꞉ tumiki hali pa꞉ta꞉ pua alota꞉ Diutuseleme da wanda꞉hali paeyaoma꞉ momba꞉la hata꞉ wi laa pa pi taka꞉lake la alu alu pitelememe pua leekeme.

³²Koto pi opuata꞉ mo tumiki halima꞉ a̱i̱ koto kone ipika꞉ ami mandane haliweki ika꞉ opisa haliweki tonka꞉na꞉ oni wanda꞉hali pa꞉ta꞉ anke hao hatuku peekeme. Kutupa wanda꞉halima꞉ mo ami tumiki hali ipika꞉ ami haliweki ame̱le̱ epemekeeki handaata꞉ Polo litolo haemeke ekita꞉ mina꞉pa꞉laemekeme.

³³Kutupa mo hande a꞉nda꞉ tumiki halima꞉ a꞉pa Polo minata꞉ seni pu yaapoma꞉ hotape leekeme. Kutupa Polota꞉ hane halipe eki hau pia꞉pe laa lota꞉ piekeme.

³⁴Mo mombelemeke haliweki mandane ekima꞉ pi ma꞉nda꞉ wi la꞉tiki pa mandaneeki manuma꞉ pi ta꞉ta꞉ wi la꞉tiki kutupa wi la꞉tiki pimiki ekima꞉ a꞉nda꞉ tumiki halima꞉ opua꞉peke na yeke handaata꞉ Polota꞉ mo ami haliwekina꞉ hala꞉ da pa꞉ta꞉ hatuku pupe leekeme.

³⁵Kutupa mo wata꞉pe lieke alena꞉ opolo peekepate pa mo mombela mineke pambemeke haliwekima꞉ pasa꞉tei pua꞉tiki pemeke handaata꞉ mo ami haliwekima꞉ Polo kikima꞉ mina꞉liao opa꞉liaemekeme.