Aposolo 1:3-21

³Yesuma꞉ ipiki homa hoki nane mo aposolo haliwekima꞉ ipiki ota꞉ wotu handena꞉yeke peneme yao hali tieke yaapo natena꞉ hata꞉ ipika꞉ kone tiaeyekeeki walaata꞉ Koda꞉na꞉ Kilu Tombuao Hala꞉eki iki pa꞉ta꞉ walo hayekeme.

⁴Mo haliweki ame̱le̱ pa hayeke dina꞉ Yesuma꞉ iki pa꞉ta꞉ alota꞉ Diutuseleme na mina꞉pa꞉laake pa hapa꞉peke. Ya Apa꞉ma꞉ kulueke laa la꞉ ula꞉ ale handeteke hapa꞉peke. Hande I̱ma꞉ iki pa꞉ta꞉ loa꞉ alena꞉ loa꞉me.

⁵Kutupa Dionima꞉ta꞉ pa ikalima꞉ bapitaisi peao haya꞉pate hosikisiki hao hao peaata꞉ Holi Sipitidima꞉ bapitaisi peaalieke loa꞉ pita꞉ amba꞉ opimime leekeme.

⁶Yesu make mo haliweki ame̱le̱ mandake pa꞉ta꞉ momba꞉la haemeke dina꞉ ikana꞉ma꞉ Yesu pa꞉ta꞉ alota꞉ Tekehalio. Ame do natena꞉ta꞉ nakana꞉ma꞉ Isulai paa kilu tombuao haluekema꞉ alepe lemekeme.

⁷Yesuma꞉ mo haliweki pa꞉ta꞉ alota꞉ Ikana꞉ma꞉ta꞉ Do natena꞉ doeki piliekee o Do ekina꞉ dupiliekee laa opuemena꞉ ika꞉eki dia꞉me. Mo Apa꞉ Koda꞉ma꞉ ipika꞉ honumake pulu pa꞉la꞉ekie leekeme.

⁸Koto pa꞉la꞉pate ikita꞉ wele pita꞉la꞉eki milimikie leekeme. Mo Holi Sipitidi epea꞉ka꞉na꞉ta꞉ ikita꞉ yaka wekitisi haliweki Diutuseleme pa꞉ta꞉ make Sametia pa꞉ta꞉ make Diudia paeyao pa꞉ta꞉ make hama hama pea kenke honiki honiki paeyao pa꞉ta꞉manu make la halimikie leekeme.

⁹Kotoeki lo paeyaota꞉ mo haliwekima꞉ handa꞉ poto poto la haena꞉ kone opa꞉liao peekeme. Kutupa ya hapi homekema꞉ a꞉pa ipiki a꞉mbaeyekeme.

¹⁰Yesu peeke handa mo haliwekima꞉ oli pula꞉me laa wopu handa꞉hake witolo haena꞉ta꞉ koto kone hali yaapo hake pupa peke dau yama꞉ mea a꞉pa halu pitolo alota꞉

¹¹Ka꞉lili haliwekio. Do pa꞉ta꞉ hata꞉ ya pa꞉ta꞉ ombu ekipeke handa꞉liao halemepe lepekeme. Do iki mina꞉pa꞉lao ya nane pula꞉ Yesuta꞉ paa ipulu make do ya nane puleke handa handeleme tupa꞉ kone paa ipilia꞉eki make koto tupa꞉ kone ipiliekee lepekeme.

¹²Kutupa Diutuseleme nepoko pa꞉ta꞉ kilomida homeke tupa꞉ pote ma꞉nda꞉ biki Olipeti pa꞉ta꞉ hao Diutuseleme nane la꞉ka꞉la pemekeme.

¹³Mo teke da tieke pa꞉ta꞉ puaata꞉ ika꞉ pelia hao haemeke manda da panda꞉ pa꞉ta꞉ opa꞉liaemekeme. Pida Dioni yaapo Dia꞉mesi A꞉ndutu yaapo Pilipi Tomasi yaapo Badolomiu Ma꞉tiu yaapo A꞉lopia꞉sina꞉ eiyeke Dia꞉mesi pita꞉ Saimono Seloti yaapo kutupa Dia꞉mesina꞉ eiyeke Diudasi makee.

¹⁴Koto haliweki paeyao mo wanda꞉weki tonka꞉na꞉ Yesuna꞉ ama꞉ Meti make ipika꞉ hameketiti make mandake pa꞉ta꞉ momba꞉la pita꞉ yeni pu pitimikime.

¹⁵Yeni pu pitaata꞉ pa hosiki hao hao peaata꞉ mo Ketisona꞉ pi mina꞉la꞉ wanda꞉halima꞉ pi hotuluekema꞉ mombelemekeme. Iki paeyaota꞉ 120 wanda꞉hali tupa꞉ momba꞉la pitina꞉ Pidama꞉ pi loluekema꞉ tiaeyekeme.

¹⁶Kutupa ipikana꞉ma꞉ alota꞉ Yaka ana꞉ kame titio. Hande Baibolo bukana꞉ wape pa꞉la꞉ pita꞉ ota꞉ yaapeke ya꞉la꞉me. Hande Holi Sipitidima꞉ Deipidina꞉ hone u tiaaso haena꞉ta꞉ Yesu da꞉ka꞉pa꞉ minina꞉ haliweki hatuku polo pia꞉ hali Diudasima꞉ pulu piekeeki dupilieke laa Deipidima꞉ wape piekeme.

¹⁷Yesuma꞉ Diudasi make niki ame̱le̱ mandakena꞉ e pokomonoyeke talopu mea haena꞉ leeke handaata꞉ niki ame̱le̱ pomu haya꞉me leekeme.

¹⁸Hande Diudasima꞉ta꞉ hokeeki puluekema꞉ ma꞉na꞉ yapa꞉ pea mieke manima꞉ta꞉ kenkesiki ma꞉nda꞉ hamba꞉ miekeme. Koto kenke pa꞉ta꞉ta꞉ ipika꞉ kone lopa꞉niaota꞉ ota꞉ homeekeme. Ipika꞉ weleke tekelipe lia weleke yoka꞉ petepete pea wiekeme.

¹⁹Kutupa mo Diutuseleme da pa꞉ta꞉ haemeke wanda꞉hali paeyaoma꞉ koto piekeeki opuaata꞉ koto kenke sikina꞉ biki ika꞉ da pi la alota꞉ Akeledama lo haemekeme. Koto la꞉la꞉ ekita꞉ We Kenkee laa lo haemekeme.

²⁰Pidama꞉ alota꞉ Mo Emeli buka pa꞉ta꞉ wape pa꞉la꞉ ekita꞉ dupa Ipika꞉ data꞉ hankoko pa haya꞉ka꞉na꞉ta꞉ epelieke. Hali ma꞉nda꞉ na pua haena꞉e laa wape pa꞉la꞉me. Kutupa wape pa꞉la꞉eki ma꞉nda꞉ make dupa Ipika꞉ pokeeke eta꞉ hali ma꞉nda꞉ma꞉ mea꞉peke ya꞉la꞉me laa wape pa꞉la꞉me.

²¹Koto ekina꞉ta꞉ hali ma꞉nda꞉ta꞉ niki ame̱le̱ ta꞉ma꞉ni pea haluekema꞉ mo Tekehali Yesu paa mea tiaeya꞉eki handea꞉ hali kone ana꞉ pa꞉la꞉me. Koto halita꞉ niki ame̱le̱ hata꞉ hoto paeyao Tekehali Yesu ame̱le̱ mandakena꞉ pomu haoma꞉ halie. Hande Dionima꞉ bapitaisi hau walea꞉ dina꞉ kini pu mea a꞉pa Yesu niki ame̱le̱ mandakena꞉ hamono kone ipiki hatuku mea hepeni nane a꞉meiyeke handoma꞉ pita꞉ pomu haoma꞉ hali koto hali homeke ma꞉nda꞉ta꞉ ana꞉ pa꞉la꞉me leekeme.