Aposolo 17:10-22

¹⁰Koto kone mo Ketiso haliwekima꞉ Polo Sailasi yaapo Betia da pa꞉ta꞉ timba kone tapaemekeme. Kutupa mo da pa꞉ta꞉ opolo puata꞉ Diu haliwekina꞉ pi hotu haemeke da pa꞉ta꞉ pemekeme.

¹¹Mo da Diu haliwekima꞉ Desalonaika Diu haliwekima꞉ pimiki hau na piki pa epeke tupa꞉ hata꞉ homu pea mo hande pi opuaata꞉ Ota꞉ekipe la handuluekema꞉ mo Baibolo buka pa꞉ta꞉ yata꞉pa nate paeyao weiya꞉tiki pimikime.

¹²Koto ekina꞉ paeyaoma꞉ pi mimikime. Kutupa mandane Kitiki wanda꞉weki tiekemanu make mandane Kitiki haliweki wopu make pi mimikime.

¹³Kutu pimikipate mo Desalonaika Diu haliwekima꞉ Poloma꞉ mo Betia da pa꞉ta꞉ make Koda꞉na꞉ pi ale wala꞉la꞉me pi opuata꞉ koto pa꞉ta꞉ make a꞉paata꞉ pa wanda꞉hali sutiaaso hata꞉ mineke panka꞉ tiaemekeme.

¹⁴Kutupa mo Ketiso haliwekima꞉ Polota꞉ oni dawala ikali nane tapaemekepate Sailasi Timodi yaapota꞉ koto pa꞉ta꞉ haepekeme.

¹⁵Hande Polo hatuku pemeke haliwekita꞉ mo A꞉ta꞉ni da nane ipiki hatuku puaata꞉ Poloma꞉ Sailasi Timodi yaapo do pa꞉ta꞉ a̱i̱ epena꞉ lolo pupe leeke pi opuaata꞉ pa la꞉ka꞉la pemekeme.

¹⁶Kutupa Polota꞉ A꞉ta꞉ni da pa꞉ta꞉ mo hali yaapo epena꞉ handeteke hata꞉ mo daoni teke da toopi tima꞉ wepia wimiki ale manuma꞉ tumba꞉pa peekeeki handolo hata꞉ ipika꞉ pukima꞉ ka꞉nda꞉ma꞉ wotu homeekeme.

¹⁷Koto ekina꞉ mo pi hotu haemeke da pa꞉ta꞉ mo Diu haliweki Koda꞉ pa꞉ta꞉ hone wopu wimiki haliweki ame̱le̱ mo makedi pa꞉ta꞉ haemeke haliweki ame̱le̱ make nate paeyao pi yokaalu pea꞉tiki pimikime.

¹⁸Kutupa mandane Epikutiani Sitoiki sukulu tapake yaapona꞉ haliwekima꞉ Polo manda꞉hande pea alota꞉ Do hande pi wopu ala꞉ halima꞉ eki leliepe lemekeme. Mandaneeki manuma꞉ alota꞉ Da ma꞉nda꞉ nane koda꞉ manuna꞉ hau wala꞉la꞉ hali ya꞉ka꞉ta꞉me lemekeme. Poloma꞉ Yesu pa꞉ta꞉ make mo hande wanda꞉hali homa pa tiaalo piekeeki waleeke handa lemekeme.

¹⁹Kutupa Polo handa꞉ mea mo hande A꞉tiopeikusi da pa꞉ta꞉ hatuku pua alota꞉ Nakana꞉ma꞉ koto hande wale panake pi niki pa꞉ta꞉ pa la kie lemekeme.

²⁰Nakana꞉ma꞉ amba꞉ na wale pimanu waleleme. Kutupa koto pi teke opuluekema꞉ hone pa꞉la꞉me lemekeme.

²¹Mo A꞉ta꞉ni da haliwekima꞉ make kimisu a꞉pa pitimiki haliwekima꞉ make koto pa꞉ta꞉ hata꞉ nate paeyao aleta꞉ ma꞉nda꞉ hone na wiki panake waleeke pi ombu opuluekema꞉ hotu haemekeme.

²²Koto ekina꞉ Poloma꞉ mo A꞉tiopeikusi da tukiki pa꞉ta꞉ tiao hata꞉ alota꞉ A꞉ta꞉ni haliwekio. Ika꞉ temoko pa꞉ta꞉ hone wopu u haleme ekita꞉ handolome leekeme.