Aposolo 16:26-40

²⁶koto kone yu momeni tieke wotu piekeme. Koto ekina꞉ mo dipula da pinkimanu la꞉ma꞉ la꞉ma꞉ pieketa꞉ koto kone mo hande da pota꞉manu paeyao lomba wieketa꞉ hali paeyaona꞉ seni pumanu pa kone ka꞉la꞉pe pa lopeekeme.

²⁷Mo dipula handeteke hayeke halima꞉ tiaota꞉ mo dipula da pota꞉manu lomba pa pa pu wiekeeki handolota꞉ dipula haliweki amba꞉ pindipa yopua pimika꞉ta꞉ma꞉ hone witolo hata꞉ ipika꞉ kepete hokulu yola꞉ mea ipika꞉ kone aoluekema꞉ handaeyekepate

²⁸Poloma꞉ anekehapu wi alo hata꞉ alota꞉ Naka꞉ kone na lia꞉pe. Niki paeyaota꞉ do pambo piluma꞉taa leekeme.

²⁹Kutupa lamepa mea epo laa mo halima꞉ dipula da tukiki pa꞉ta꞉ ipikana꞉ma꞉ anke hao honda꞉ pambaata꞉ pututuma꞉ homolo hata꞉ paala꞉ pieke handaata꞉ Polo Sailasi yaapo pa꞉ta꞉ lopa꞉niao hali yaapo hama꞉ nane hatuku pua alota꞉

³⁰Hali yaapoo. Deto hala꞉eki muluekema꞉ta꞉ eki peonope leekeme.

³¹Ipilikana꞉ma꞉ alota꞉ Tekehali Yesu pa꞉ta꞉ hone tulaapeke. Kutu pika꞉na꞉ta꞉ deto hala꞉eki milipikie. Neke make naka꞉ weki wanda꞉ma꞉ make milimikie lepekeme.

³²Kutupa ipiki pa꞉ta꞉ make ipika꞉ da pa꞉ta꞉ pitimiki wanda꞉hali pa꞉ta꞉ make mo hande Tekehalina꞉ pi alemanu walepekeme.

³³Kutupa koto pita꞉ kone ipikana꞉ma꞉ ipilika꞉ hatuku mea pua ipilika꞉ yumbieke alena꞉ ikalima꞉ tandepeekeme. Kutupa koto kone ipika꞉ weki wanda꞉ ame̱le̱ apa꞉tao bapitaisi pimikime.

³⁴Kutupa ipika꞉ da pa꞉ta꞉ mo hali yaapo hatuku a꞉pa ipilika꞉ ne haleekeme. Kutupa ipika꞉ weki wanda꞉ ame̱le̱ hata꞉ Koda꞉na꞉ pi mimiki ekina꞉ ta꞉na꞉ma꞉ wotu homemekeme.

³⁵Da kelepeeketa꞉ mo hande pi yokaalu peao haemeke haliwekima꞉ ika꞉ polisi haliweki pa꞉ta꞉ alota꞉ Dipula handeteke hayeke hali pa꞉ta꞉ do pi lolo pupe laata꞉ Mo hali yaapota꞉ pa pena꞉ tapae laa lolo pupe lemekeme.

³⁶Koto leeke ekina꞉ mo dipula handeteke hayeke halima꞉ koto pita꞉ Polo pa꞉ta꞉ alota꞉ Mo pi yokaalu peao haleme haliwekima꞉ I̱ pa꞉ta꞉ pi dupa la꞉neala꞉me. Koto hali yaapota꞉ pa pena꞉ tapae la꞉neala꞉me leekeme. Koto la꞉la꞉ ekina꞉ ipilikita꞉ do dipula da pao yopu pupe laa leekeme.

³⁷Koto leekepate Poloma꞉ mo polisi haliweki pa꞉ta꞉ alota꞉ Dikana꞉ma꞉ta꞉ hau ma꞉nda꞉ na pupa꞉pate wanda꞉hali handa꞉ potopoto la haena꞉ kone diki yumbua baememe. Dikita꞉ Loma꞉ Kapomanina꞉ pamodi wia halopa꞉ hali yaapo pa꞉ta꞉ kone pimikime. Kotoeki peata꞉ dikita꞉ dipula da pa꞉ta꞉ pa mea lopaememe. Kutupa ameta꞉ a꞉mbaaso hata꞉ diki pa tapaaluekema꞉ lemepe. Ota꞉ dia꞉me. Mo hande pi yokaalu peao haleme haliweki ikana꞉ma꞉ kone do pa꞉ta꞉ a꞉paata꞉ diki mea a꞉pa tapaena꞉ loa꞉me leekeme.

³⁸Mo polisi haliwekima꞉ Poloma꞉ leeke pita꞉ mo pi yokaalu peao haemeke haliweki pa꞉ta꞉ lolo pemekeme. Kutupa mo haliwekima꞉ta꞉ Polo Sailasi yaapoma꞉ Loma꞉ Kapomanina꞉ pamodi wia halepe hali yaapo halepeme leekeeki opuaata꞉ paala꞉ma꞉ homemekeme.

³⁹Koto ekina꞉ Polo Sailasi yaapo pa꞉ta꞉ pua alota꞉ Ipiliki pa꞉ta꞉ puma꞉eki a꞉ta꞉e laa lemekeme. Koto laata꞉ ikana꞉ma꞉ mo hali yaapo dipula da mina꞉pa꞉lao hatuku mea pua ipiliki pa꞉ta꞉ alota꞉ Do daoni mina꞉pa꞉lao pupe laa honke lemekeme.

⁴⁰Polo Sailasi yaapoma꞉ mo dipula da mina꞉pa꞉laota꞉ Lidiana꞉ da pa꞉ta꞉ pepekeme. Ipilikana꞉ma꞉ta꞉ Ketiso wanda꞉hali ame̱le̱ koto pa꞉ta꞉ momba꞉la hata꞉ta꞉ iki pa꞉ta꞉ sa꞉tiaasa꞉ pimanu laata꞉ mo da mina꞉pa꞉lao pepekeme.