Aposolo 13:7-37

⁷Koto halita꞉ mo hokina꞉ kapomani you hali Sesiasi Polasi yaapo ame̱le̱ hao hayeke halie. Mo Sesiasi Polasi ipikita꞉ hone wopu lenkena꞉ pea u hayeke halie. Mo kapomani you halima꞉ Koda꞉na꞉ pi opuluekema꞉ Banabasi Solo yaapo ipiki pa꞉ta꞉ epena꞉ wi leekeme.

⁸Hali yaapo pepekepate mo ti̱o̱ hali Elimasima꞉ mo Kitiki pi laa koto ti̱o̱ halina꞉ bikita꞉ Elimasie ipikana꞉ma꞉ta꞉ Banabasi Solo yaapo sa꞉sa꞉ puluekema꞉ taapeekeme. Mo kapomanina꞉ you halima꞉ Tekehali pa꞉ta꞉ hone tulaasa꞉eki pao la꞉ka꞉la mina haena꞉ loluekema꞉ taapeekeme.

⁹Kutu pieke handa Solo ipika꞉ biki ma꞉nda꞉ Polo ipikana꞉ma꞉ta꞉ Holi Sipitidima꞉ ipiki tumba pitina꞉ mo ti̱o̱ hali handaake wia alota꞉

¹⁰Neketa꞉ Sadanina꞉ halie. Epeke alemanu paeyao pa꞉ta꞉ a꞉nda꞉ lu halemee. Mo hoke hoke yayapiki haumanu pita꞉la꞉eki neke pa꞉ta꞉ tumba pila꞉me laata꞉ Tekehalina꞉ ota꞉ pimanu kone nakana꞉ma꞉ta꞉ yayapiki pimanu laa la꞉ka꞉laluekema꞉ taapo haleme.

¹¹Koto ekina꞉ ameta꞉ Tekehalima꞉ neke liekee. Kutupa neketa꞉ leke holupiki hali hao hata꞉ta꞉ nate pa̱a̱ a̱i̱ na handilipikie laa leekeme. Poloma꞉ koto alo haena꞉ kone timba꞉la꞉ pambeke koama꞉ handeke alema꞉ Elimasina꞉ leke telipina꞉ holu peaeyekeme. Ma꞉nda꞉ma꞉ ipika꞉ kiki yola꞉ mea mina pena꞉yeke kikima꞉ hali weiya꞉tiki pomiekeme.

¹²Mo kapomanina꞉ you halima꞉ta꞉ kutu piekeeki hando haota꞉ hone tulaeyekeme. Tekehalina꞉ pi waleekeeki opitolo hata꞉ penkilipa꞉tia pomiekeme.

¹³Polo ame̱le̱ mandakena꞉ pemeke haliwekita꞉ palai kawaso tiekena꞉ pitata꞉ mo Peiposi da mina꞉pa꞉lao mo Pa꞉mbilia nane hayeke da Peka pa꞉ta꞉ opolo pemekeme. Koto pa꞉ta꞉ opolo pemekepate Dioni Makata꞉ iki mina꞉pa꞉lao Diutuseleme nane pa la꞉ka꞉la peekeme.

¹⁴Peka da mina꞉pa꞉lao puaata꞉ mo Pisidia da nane hayeke da A꞉ndioko da pa꞉ta꞉ opolo puaata꞉ mo Hoto Pila꞉ Natena꞉ mo haliwekita꞉ mo Diu haliwekina꞉ pi hotu haemeke da pa꞉ta꞉ honda꞉ pamba pua pitimikime.

¹⁵Hali ma꞉nda꞉ma꞉ mo Mosesima꞉ wape pea ula꞉ Lo Pimanu make mo potopede haliwekima꞉ wape pea ula꞉ pimanu make yata꞉pa haena꞉ta꞉ mo pi hotu haemeke da you haliwekima꞉ Polo ameda pa꞉ta꞉ pi la꞉moneaaso alota꞉ Kame titio. Wanda꞉hali honkopu hao halo pa꞉la꞉ pi lapa꞉peke yea꞉ka꞉na꞉ta꞉ kota꞉ loa꞉mina꞉e hone witoloma꞉me lemekeme.

¹⁶Koto lemeke Poloma꞉ tiao hata꞉ kiki mea a꞉meiyao pi dupa waleekeme. Ya tapake Isulai wanda꞉hali iki make Koda꞉ pa꞉ta꞉ panda꞉puniao yeni pu haleme Diendaili wanda꞉hali paeyao iki make I̱ma꞉ alo pi opua꞉pe laata꞉

¹⁷Koto Isulai tapake wanda꞉halina꞉ Koda꞉ma꞉ nika꞉ apa꞉mei ameda mea haena꞉ laata꞉ mo Idiepi kenke nane da ma꞉nda꞉ wanda꞉hali hata꞉ kone tapake tieke wanda꞉hali hamina꞉ leekeme. Koda꞉ma꞉ ipika꞉ wele wotu pita꞉la꞉ ekima꞉ koto wanda꞉hali Idiepi nane mina꞉pa꞉lao hatuku puaata꞉

¹⁸mo hapu hayeke alena꞉ bapi 40 mo wanda꞉hali koto pa꞉ta꞉ hata꞉ ikita꞉ ka꞉nda꞉ma꞉ homo hatiki pimikipate Koda꞉ma꞉ handeteke hatiki pu hayekeme.

¹⁹Mo Keinani kenke pa꞉ta꞉ haemeke tapake watake hata꞉ wanda꞉hali ipikana꞉ma꞉ hoeyaota꞉ ipika꞉ wanda꞉halita꞉ koto kenke teke wanda꞉hali haena꞉ leekeme.

²⁰Kutu pu paeyaasa꞉ ekina꞉ bapi manuta꞉ pa 450manu yapeekeme. Kutupa wetepe naneta꞉ ipikana꞉ma꞉ iki pa꞉ta꞉ pi yokaalu peao haemeke teke haliweki haena꞉ loma꞉ loma꞉ pua꞉tiki a꞉pa mo potopede hali Samuele ipiki a꞉pa hayekeme.

²¹Mo wanda꞉halima꞉ Nika꞉ kini hali ma꞉nda꞉ haena꞉e laa honke lemeke handa Koda꞉ma꞉ iki pa꞉ta꞉ Solo mea haena꞉ leekeme. Ipikita꞉ Benisamini tapake hali Kisina꞉ eiyeke hata꞉ ika꞉ kini hali haena꞉ yapeeke bapi manuta꞉ 40e.

²²Kutu piekepate Koda꞉ma꞉ Solo yoka pa nane haena꞉ laa Deipidi meata꞉ kini hali haena꞉ leekeme. Koda꞉ma꞉ Deipidi hayekeeki handaata꞉ pi dupa leekeme. I̱ma꞉ handolo alota꞉ dupae. Diesina꞉ eiyeke Deipidita꞉ ipika꞉ hala꞉eki handolo hata꞉ I̱ma꞉ hone pa꞉la꞉me laata꞉ koto halima꞉ta꞉ I̱ma꞉ hone pa꞉la꞉eki paeyao ipikana꞉ma꞉ pilieke la leekeme.

²³Hande Deipidina꞉ tapake hali Yesuta꞉ Koda꞉ma꞉ la꞉ wieke tupa꞉ Isulai wanda꞉halina꞉ Da꞉taala꞉ Hali haena꞉ la꞉la꞉me.

²⁴Yesuma꞉ e a̱i̱ na kini pu mea pokeeke haena꞉ta꞉ Dionima꞉ Isulai wanda꞉hali paeyao pa꞉ta꞉ pi waleekeme. Ika꞉ hoke hau pimiki ekimanu mina꞉pa꞉laota꞉ bapitaisi pina꞉yeke pi waleekeme.

²⁵Kutupa Dionima꞉ ipika꞉ e poko paeyaaluekema꞉ hata꞉ wanda꞉hali pa꞉ta꞉ alota꞉ Ika꞉ honema꞉ I̱ halo ekita꞉ epi hone witelemepe. Ikana꞉ma꞉ yu wia haleme halita꞉ I̱ dia꞉ya꞉la꞉pate handa꞉pe. Yaka hoki nane ipula꞉me. Koto ipula꞉ halina꞉ anke daketa꞉ I̱ma꞉ holawaapeketa꞉ ana꞉ na pa꞉la꞉me laa leekeme.

²⁶Eipoloha꞉ma꞉ tapake haliweki ya kametitio. Koda꞉ pa꞉ta꞉ panda꞉puniao yeni pu haleme Diendaili wanda꞉hali paeyao iki make Koda꞉ma꞉ do hande niki da꞉taapeke ya꞉la꞉ pi niki pa꞉ta꞉ epena꞉ la꞉la꞉me.

²⁷Mo Diutuseleme da pa꞉ta꞉ haleme wanda꞉halima꞉ make ika꞉ you haliwekima꞉ make Yesuta꞉ wanda꞉hali Da꞉taasa꞉ Hali hala꞉ ekita꞉ hone na wimikime. Mo Hoto Pila꞉ Natemanu paeyaona꞉ mo hande potopede haliwekima꞉ wape pea ula꞉ ekimanu yata꞉po halemeeki make hone wopu na wilimime. Kutu pimikipate ikana꞉ma꞉ta꞉ Yesuta꞉ lia homaemeke ekima꞉ mo hande potopede haliwekima꞉ wape pea ula꞉eki kone yaemekeme.

²⁸Kutupa ikana꞉ma꞉ Yesu lia homaaluekema꞉ta꞉ pa꞉la꞉eki teke ma꞉nda꞉ na handa꞉ wiki kone Pailedi pa꞉ta꞉ pua honke alo alota꞉ Yesu homae laa honke lemekeme.

²⁹Kutupa hande Baibolo bukana꞉ Yesu pa꞉ta꞉ pulu piekeeki wape pea ula꞉eki kone ikana꞉ma꞉ pu paeyaemekeme. Mandane haliwekima꞉ta꞉ Yesu toko mo a꞉ka꞉tei wapepiki tina꞉ endiaemekeme alena꞉ pua honda꞉ mea pua lapa꞉ pimikime.

³⁰Kutu pimikipate Koda꞉ma꞉ mo lapa꞉ wieke alena꞉ Yesu pa mea tiaeyekeme.

³¹Kutupa ipikita꞉ ipiki ame̱le̱ mandakena꞉ Ka꞉lili nane hao Diutuseleme da pa꞉ta꞉ pemeke wanda꞉hali pa꞉ta꞉ ipiki handena꞉ hoto elekeeleke peneme yao ipika꞉ leke mineke wala꞉tiki piekeme. Ameta꞉ koto wanda꞉halita꞉ ika꞉ Yesu handemeeki Isulai wanda꞉hali pa꞉ta꞉ la halele wanda꞉hali halememe.

³²Kutupa dikana꞉ma꞉ make koto hande Pi Seliapo iki pa꞉ta꞉ la kuluekema꞉ a꞉pa halopa꞉me. Koda꞉ma꞉ make nika꞉ apa꞉mei ameda pa꞉ta꞉ pi la꞉ wiekeeki ameta꞉ ika꞉ wekiwandiki titi niki pa꞉ta꞉ peaowala꞉me. Yesu da꞉taala꞉ ekima꞉ta꞉ nika꞉eki peaowala꞉me. Hande hoto yaapo peao wape pieke Emeli pa꞉ta꞉ wape pa꞉la꞉ tupa꞉ dupae. Neketa꞉ yaka Wekie. Ame do natena꞉ I̱ta꞉ naka꞉ Apa꞉ halome laa wape pa꞉la꞉me.

³⁴Kutupa Koda꞉ma꞉ Yesu lapa꞉ wieke alena꞉ mea tiao pa hoto ma꞉nda꞉ a꞉nda꞉ paa na homolo pieke ekina꞉ Koda꞉ma꞉ pi dupa leekeme. Hande Deipidi pa꞉ta꞉ I̱ma꞉ pi la꞉ ulueki kone I̱ma꞉ epeke yakopiki hauma꞉ neke ota꞉ epeaalueke laa wape pa꞉la꞉me.

³⁵Kutupa make mo Baibolo bukana꞉ pa ma꞉nda꞉ma꞉ Koda꞉ pa꞉ta꞉ pi alo hata꞉ dupa wape pa꞉la꞉me. Naka꞉ Yakopiki Halina꞉ loke na tandepena꞉ lelipikie laa wape pa꞉la꞉me.

³⁶Deipidi ipika꞉ hayeke pita꞉ta꞉ Koda꞉na꞉ hone pa꞉la꞉ ekimanu pia꞉tiki pu hao wetepena꞉ homeekeme. Ipika꞉ apa꞉mei ameda lapa꞉ pimiki alena꞉ ipiki make koto pa꞉ta꞉ lapa꞉ pimikipate ipika꞉ loke make tandepeekeme.

³⁷Kutu piekepate Koda꞉ma꞉ lapa꞉ wieke alena꞉ paa mea tiaeyeke halita꞉ ipika꞉ loke na tandepeekeme.