Aposolo 13:38-49

³⁸Otao mani nana, sana nigipu. Tuwa Bayau mene emo awiya eno nasani pasena ninae disariniya. Auna bowi nuna mene ninae-una atu kasa yero niya ara.

³⁹Mosera sao tauyao ge mene pasena ninae-una bunao besao ine oko mitiya. Arata Yesu tumo diyaya aune pasena ninae-una bunao apakana besariniya.

⁴⁰Ora porofete mene ge gaewa ge amimene ninae-una me yoiye sero, niye giro baingtipu. Ge awiya eyero mitiya era,

⁴¹Oiye, Tuwara ge awang sao emo, niye giro yangka sero yoreba magayepu. Na Tuwa Bayau mene buro zo niye naya be aune yarinena. Buro auna bowi awiya zo mene sai niye nigiro gaya me oko yariniya. Ge gayao ayero mitiya.” Paulo mene ayero sena ara.

⁴²Pauloto Banaba awongto yere ibura atu kasa daung yari sero newato emo mene Sabat iya be zora atu ge dekaongka awiya nupema tugata yaetose sewa ara.

⁴³Ayewa awong augaora atu wosiro Yuda emo daigairo aune emo ena Yuda mene yaine yero nasani nauwa awong amimene awongto ago yewa giro Pauloto Banaba mene awong Tuwa Bayaura soremao awiya tumo diro naese wini ge sewato ara.

⁴⁴Sabat iya be nunae zo kasa yenu emo napo auna daigairo amimene Tuwa Bayaura ge nigari sero augaiwa.

⁴⁵Augaiwa Yuda emo mene emo bauno diti bainane amimene atu augaiwa awiya giro kotumao meko Paulo eno puro ge nuna puro wosaine nasani nung giro sero izewa ara.

⁴⁶Ayero yewa Pauloto Banaba awongto tau yero ge sinasani eyero tugata yewato, “Yuda emo niye Tuwa Bayaura ge gitau nigaese sao mitiya ara. Arata niye nika niyetope awang sinasani ‘Nae nao me iwaingna gerao yaine yao teng oko,’ ayero sineya, arare nato niye doro emo Yuda oko auna-una babari nenato ara.

⁴⁷Tuwa mene wini ge nae eno eyero sena, Nane ning emo Yuda okora waegao ine yasese pugaingwa. Arare emo bauno tawing sero sero yero nowa awong aeno ge tugata yasa sorero pumane.”

⁴⁸Ayero sewato emo Yuda oko amimene nigiro dubo iwaing yenu Tuwara ge eno yawa yawa nasani dawong yawero nigiwa ara. Nao me iwaingna gerao mene Yesu tumo diwa ara.

⁴⁹Ayewa Tuwara ge mene tawing auna atu napo sero sero teng yero baungna.