Aposolo 13:25-38

²⁵Eso Yohane urataine mo qoeyakane naso bomileki, Yohane eŋe ŋei ŋerep edange, ‘Ŋine naŋane ma ramami? Ŋine kine detmami me mida? Ŋine ŋeiwa toma kamami, na eŋe midaka, ŋine ŋei mane toma kamami. Ŋo, na yem ŋei bile mida, na daleo eŋane kie kulit ea qekok kaikale, noŋo qekkokalane rokop mi okanmaike.’

²⁶“Kimakopne, Abraham wane ŋabokoune, so ŋei Israel ŋadino qelaŋ gemami, ŋine korop iwa Anutu ewino kitomami, Anutuŋo dalino ma menaŋŋoniake, eŋe don ea ŋenano motke!

²⁷Anutuŋo Yesu ŋene ma menaŋ ŋoniakane birakake, Yerusalem ŋei ŋerep so eŋane ŋetne ea eŋe mi detluk kakoi, eŋe propet eŋane zonom mama naso dapore more mi detlukkakoi. Ŋo eŋe Yesu qeu seukke, ea wane eŋe propet eŋane don, ea mau wele wakonge.

²⁸Eŋe Yesu wane masi qotkoine mane mi maratkakoi, eŋe Yesu maine mi qeu seukke, ŋo eŋe Yesu Pilat wano biraka more, Pilatŋo Yesu qeki seukeakane qesonkakoi.

²⁹Anutu wane papiao eŋe yeye kine kine korop Yesu wane ra more qekoi pamaike, Yerusalem ŋei eŋe ea korop mau qoeki, Yesu wane pareŋine kibego ŋine makokka ket more deŋesere mane wesi aŋaone koto, eao motkoi.

³⁰Ŋo Anutu eŋe Yesu ma wirirkkaki, wisikae wieke.

³¹Pakiso, kaiwe loutne Yesu eŋe eŋine dokoine eŋano wakononge, sogino eŋe Yesu eŋinerop Galili kepeo ŋine sari Yerusalem matko arikoi, Yesu eŋe masi kine kine make so seu seuo ŋine wisikae wieke, dokoine eŋe ea korop ka more, Israel ŋei ŋerep edan okanmami.

³²Na kine kine korop iwa ŋidanmaile, ŋere don kisi maine, ea ŋidaniketane sarimaite. Anutuŋo ŋenane ŋabokopze kine kine ra togole edange, ea korop ŋene ŋebon waremaike, ea wane eŋe Yesu ma wirikkaki, wisikae wieke, Sam 2 eao yale ramaike, ‘Ge naŋane Giponne, na ukude geŋane Magaŋone lelemaile’

³⁴So Anutu eŋe ra togoleke, eŋe Yesu seu seuo ŋine maki wisikae wie more koso manerop mi gotosiake, eŋe takotke more rake, ‘Na Dawit mosopka more rawe togoleke. Mosop ea eŋe welerop, na yalewaka ŋine mosop ŋunikale.’

³⁵So Dawit eŋe papia maneo ramaike, ‘Ge geŋone qelit ŋeiŋone koboboine maine mi qeliŋ kanom pa gotosiake.’

³⁶Ŋene detmaine Dawit eŋe Anutu wane simile korop mogare ŋei ŋerep keueno geke, ge more seukki, pareŋine mari ŋosa ŋabokoune eŋerop dukkau pa more gototke.

³⁷Ŋo, Anutuŋo Yesu seu seuo ŋine maki wisikae wieke, eŋe mi gototke.

³⁸Kimakopne, ŋine don kisi iwa desikei wane ŋere sarimaite, Anutuŋo Yesu seu seuno ŋine maki wisikae wieke, ea wane ŋere sari don kisi ea ŋine ŋidanmaite. Don kisi ea wane kine iwa yale pamaike, Anutuŋo sotŋine qeliŋge ŋiboniake. Ŋine Yesu mogat kaikeiwo, Anutuŋo sotŋine ea mataliki siukki, ŋine koboboine sot midaine okanikei, ŋo Mose wane ra rokop donŋo sotŋine maine mi maki siukkeake.