Aposolo 10:3-19

³Nate ma꞉nda꞉na꞉ nate toke nane haena꞉ Koda꞉na꞉ enisolo homeke epeekeeki upama꞉ ota꞉ peneme yao handeke nono piekeme. Mo enisoloma꞉ ipiki pa꞉ta꞉ alota꞉ Koniliesio leekeme.

⁴Koniliesima꞉ mo enisolo pa꞉ta꞉ paala꞉ tieke homa handake witolo hata꞉ alota꞉ Tekehalio. Aleke ka꞉ta꞉pe leekeme. Kutupa ipiki pa꞉ta꞉ alota꞉ Naka꞉ yeni pu haleeki make naka꞉ mani halo haleeki make oli hepeni da nane pua Koda꞉ pa꞉ta꞉ naka꞉ pi laasa꞉me leekeme.

⁵Kutupa ame do mo Diopa da pa꞉ta꞉ hala꞉ hali ma꞉nda꞉ ipika꞉ biki Saimono biki ma꞉nda꞉ Pida epena꞉ handa꞉ mulu pena꞉ hali ma꞉nda꞉ tapae leekeme.

⁶Koto someta꞉ hali ma꞉nda꞉na꞉ da pa꞉ta꞉ ta꞉ka꞉li pua pila꞉me. Mo da teke hali Saimonota꞉ ma꞉na꞉ yonkeleke hako ala꞉ta꞉ ala꞉ta꞉ wepu hala꞉ halie. Kutupa ipika꞉ data꞉ dawala ikali tea꞉na꞉ hala꞉me leekeme.

⁷Kutupa mo hande ipiki pa꞉ta꞉ pi leeke enisolo peeke nane ipika꞉ e pokao hayeke hali yaapo make ipiki teke pa꞉ta꞉ hayeke ami hali homeke make wi leekeme. Mo ipiki teke pa꞉ta꞉ hayeke ami halita꞉ Koda꞉ pa꞉ta꞉ paala꞉ma꞉ homo hayekeme.

⁸Kutupa mo hande leeke pita꞉ iki pa꞉ta꞉ la halaaka꞉na꞉ Diopa da nane tapaeyekeme.

⁹Kutupa da kelepeeketa꞉ mo pota꞉na꞉ pu opu hao pa Diopa da teke pa꞉ta꞉ ipulu haena꞉ kone Pidata꞉ nate you tikekena꞉ haena꞉ mo da holuna꞉ a꞉meiya yeni pua piekeme.

¹⁰Kotoeki pitolo haena꞉ tea꞉ tieke wopu pieke handa ya nee hone witolo haena꞉ oni haliwekima꞉ ne amu peaaso haena꞉ Pidata꞉ u̱ yoka꞉ lupa peekeme.

¹¹Peliolo hata꞉ upama꞉ handeekepate oli ya akolopa꞉olu bao dapolo tiekema꞉ handeke ale honiki nane tonkopu mina꞉ alu alu pea mea lopa꞉niaeyekeme.

¹²Koto ale pa꞉ta꞉ta꞉ ma꞉na꞉ yeti ala꞉ta꞉ ala꞉ta꞉ make basunu paeyao kenkena꞉ ula꞉ keto ala꞉ta꞉ ala꞉ta꞉ sunu make mu pamba a꞉pa mea lopa꞉niaeyekeme.

¹³Kutupa pi ho̱la̱꞉makema꞉ alota꞉ Pidao. Tiao. Koto alemanu lia nae leekeme.

¹⁴Koto leekepate Pidama꞉ alota꞉ Tekehalio. Ota꞉ dia꞉me leekeme. I̱ta꞉ hoke ale manuta꞉ na no halome leekeme.

¹⁵Hande pi hoto yaapo peao paa alota꞉ Koda꞉ma꞉ wamo pea ula꞉ aleta꞉ hoepeao ula꞉ alee pi na lapeke leekeme.

¹⁶Kotoeki hoto tepo peao peata꞉ mo hande aleta꞉ oli ya nane pa mea a꞉meiyekeme.

¹⁷Pidata꞉ mo hande upata꞉ eki pulu piena꞉ pia꞉pe laa hone witolo haena꞉ Koniliesima꞉ tapaeyeke haliweki Saimonona꞉ data꞉ hando pa꞉ta꞉pe lolo pieke haliweki pota꞉ kake pa꞉ta꞉ a꞉pa hando haemekeme.

¹⁸Kutupa wi leekeme. Saimono Pidata꞉ koto pa꞉ta꞉ hala꞉pe la lota꞉ piekeme.

¹⁹Koto ekina꞉ Pidama꞉ mo hande upa piekeeki hone witolo pitina꞉ mo Holi Sipitidima꞉ alota꞉ Handa꞉e. Hali tepoma꞉ neke oni a꞉pa lota꞉ pita꞉la꞉ handa꞉e leekeme.