Aposolo 10:28-45

²⁸Diu halima꞉ kenke ma꞉nda꞉ hali yaapo ta꞉ma꞉ni pea꞉peke na yeke ipika꞉ da pa꞉ta꞉ pua꞉peke na ya꞉la꞉me ekita꞉ ika꞉ kone handelemepate Koda꞉ma꞉ Hali ma꞉nda꞉ta꞉ hoke hali o hoe peao hala꞉ halie pi na lapeke laa I̱ pa꞉ta꞉ walea꞉me leekeme.

²⁹Koto ekina꞉ mo haliwekima꞉ I̱ handa꞉ mulu epeeke handa I̱ta꞉ hone ma꞉nda꞉ na wiki epoa꞉me. Kota꞉ ekipeke I̱ handa꞉ mulu epena꞉ la pipe leekeme.

³⁰Kutupa Koniliesima꞉ alota꞉ Hoto tonkopu amba꞉ yopua nate dupitolo haena꞉ I̱ma꞉ta꞉ do da pa꞉ta꞉ hata꞉ welealo nane yeni pitolo hano hakepiki dau pambaake hali kuta kone a꞉pa I̱ teke pa꞉ta꞉ haya꞉me leekeme.

³¹Mo halima꞉ alota꞉ Koniliesio. Naka꞉ yeni pu haleeki make naka꞉ mani halo haleeki make Koda꞉ma꞉ hone wita꞉la꞉me.

³²Koto ekina꞉ mo Diopa da pa꞉ta꞉ mo hali Saimono biki ma꞉nda꞉ Pida hali ma꞉nda꞉ma꞉ handa꞉ mulu pena꞉ tapae la alota꞉ Mo halita꞉ ma꞉na꞉ yonkelekema꞉ hako wopu hala꞉ hali Saimonona꞉ da pa꞉ta꞉ hala꞉me lea꞉me. Mo data꞉ dawala ikali tea꞉na꞉ hala꞉me laa lea꞉me.

³³Koto ekina꞉ koto kone neke handa꞉ mulu pimi haliweki tapaowa꞉me leekeme. Kutupa epeke epeme leekeme. Ameta꞉ Tekehalima꞉ neke pa꞉ta꞉ dupa lapeke lea꞉ pimanu paeyao opoluekema꞉ do a꞉pa Koda꞉ pa꞉ta꞉ momba꞉la haloma꞉me leekeme.

³⁴Kutupa Pidama꞉ alota꞉ Ameta꞉ ota꞉ handolome. Koda꞉ma꞉ wanda꞉hali paeyao pa꞉ta꞉ hone ta꞉ta꞉ ta꞉ta꞉ na wiki homeke hone wita꞉la꞉eki handolome leekeme.

³⁵Kenke paeyaona꞉ hala꞉ hali epima꞉ Koda꞉ pa꞉ta꞉ paala꞉ma꞉ homolo hata꞉ ipika꞉ epeke hau pu haya꞉ka꞉na꞉ta꞉ Koda꞉ma꞉ koto hali milieke leekeme.

³⁶Ikana꞉ma꞉ do ekita꞉ amba꞉ ta handeleme handa꞉e. Koda꞉ma꞉ mo Isulai wanda꞉hali pa꞉ta꞉ pi tapaeyekeeki loa꞉me. Ipikana꞉ma꞉ mo a꞉nda꞉ peliaasa꞉ Pi Seliapota꞉ Yesu Ketiso pa꞉ta꞉ yama꞉ walena꞉ leekeme. Yesuta꞉ wanda꞉hali make ala꞉ta꞉ ala꞉ta꞉ make paeyaona꞉ Tekehalie.

³⁷Kutupa mo hande Diudia nane paeyao pa꞉ta꞉ ame do numaneke pimiki ekita꞉ I̱ma꞉ iki pa꞉ta꞉ na lolueke. Ikana꞉ma꞉ amba꞉ opimika꞉ta꞉me. Dionima꞉ bapitaisi hau peaeyeke nane wetepena꞉ mo Ka꞉lili nane kini pu miekeme.

³⁸Hande Na꞉sa꞉tete da halita꞉ Yesue. Ipikita꞉ Koda꞉ma꞉ wele peaaso hata꞉ mo Holi Sipitidima꞉ make suta꞉pe wiaeyekeeki opimika꞉ta꞉me. Kutupa ipikana꞉ma꞉ Koda꞉ ame̱le̱ hata꞉ epeke hau pea꞉tiki pu hao Sadanima꞉ hoeyaeyeke wanda꞉hali mea tiatiki pu hao pomu hayekeme.

³⁹Kutupa mo Diu wanda꞉halina꞉ kenke nane make mo Diutuseleme da pa꞉ta꞉ make ipikana꞉ma꞉ pia꞉ ekimanu paeyaota꞉ nikana꞉ma꞉ wekitisi haloma꞉me. Kutupa koto hoki naneta꞉ mo haliwekima꞉ ipiki meata꞉ tina꞉ tamendiao homena꞉ lememe.

⁴⁰Kutu pimipate hoto tepona꞉ wina꞉ laata꞉ Koda꞉ma꞉ paa mea tiaota꞉ peneme yao walea꞉me.

⁴¹Wanda꞉hali paeyaoma꞉ handena꞉ na leke pa Koda꞉ma꞉ amba꞉la talopu mieke wanda꞉halima꞉ homeke handena꞉ lea꞉me. Nikita꞉ ipika꞉ la haloloma꞉ haliweki haloma꞉me. Ipika꞉ homa paa tiao a꞉paata꞉ nikana꞉ma꞉ ipiki ame̱le̱ ne noma꞉me.

⁴²Kutupa ipikana꞉ma꞉ niki pa꞉ta꞉ mana꞉ alo hata꞉ alota꞉ dupae. Wanda꞉hali pa꞉ta꞉ pi walemeka꞉na꞉ta꞉ Koda꞉ma꞉ I̱ta꞉ homa꞉la꞉ wanda꞉hali make pa haleme wanda꞉hali make ika꞉ pi yokaalu peaalo polo hali mea hano lea꞉me lapa꞉peke lea꞉me.

⁴³Mo hande potopede haliweki paeyaoma꞉ ipiki pa꞉ta꞉ lemeke ekita꞉ dupae. Hali epima꞉ ipika꞉ pi miniki haya꞉ka꞉na꞉ta꞉ kota꞉ ipika꞉ bikina꞉ mo hoke hau piekeeki pa tombuaasa꞉eki milieke lemekeme leekeme.

⁴⁴Pidama꞉ koto pimanu alo haena꞉ kone mo Holi Sipitidima꞉ koto opimiki wanda꞉hali paeyao pa꞉ta꞉ hola꞉pa꞉niaeyekeme.

⁴⁵Hande Pida ame̱le̱ a꞉pa haemeke Ketiso haliwekima꞉ Diu haliweki kone leke opa wotu handaake wimikime. Koda꞉ma꞉ mo Diendaili wanda꞉hali pa꞉ta꞉ kone mo Holi Sipitidi haleeke handa pimikime.