Aposole 3:1-18

¹Yuu mende Pita Jonepa dolapome alemandi kiloko tepoma lelyamopa loma singi gii ongopa losuu anda andake dokonya peambi-pyaa.

²Dokopa akali mende dokonya petamo kandeambi-pyaa. Akali doko endangimi mandeamo gii dokopa moko koo mandea-pyaa. Akali mendatupame koteaka lao akali moko koo doko soo ipao losuu anda andake kame kambu Auu Pipae lenge dokonya yakinengema-pyaa. Baame akali loma sala ipatamino dupa-kisa opale apalepi tee lena lao pisingima-pyaa.

³Dopa piaminopa akali dokome Pita Jonepa kame dokonya kolandalanya piambino kandatala, “Nyakambame namba mende dyepa,” lao tee lea-pyaa.

⁴Dolapome akali doko kandokondape petala Pitame, “Embame nalimba kanda,” lea-pyaa.

⁵Akali dokome dolapome baa mende dyaambinona lao masetala kandokondape pyoo kandea-pyaa.

⁶Dopa piamopa Pitame baa lamaiyoo, “Muni toeapi kinapi dupanya mende namba-kisa nasilyamoaka doko, mende silyamo doko nambame emba dilyona, Jisasa Kataisa Nasatete tange dokonya kenge doko lao emba sakatatala moko katao kaita puu lelyona,” lea-pyaa.

⁷Pitame dopa latala akali dokonya kingi tolae-kaita minatala baa minalyiamopa etete pupae lao baanya moko lenge dupa kyoto jakamaiya-pyaa.

⁸Dopa piamopa baa yapa lao sakatao toya katapala kaita paya-pyaa. Akali dokome losuu anda andake dokonya dolapo-pipa awapa pao pituu, baame Gote lao tama pima-pima pyoo liyoo pea-pyaa.

⁹Akali dokome Gote lao tama pyoo peamopa endakali pitakame kandeami-pyaa.

¹⁰Baa kaita payamo doko kandatala endakali dokaitame akali dake losuu anda andake kame kambu Auu Pipae lenge dokonya pitipala oapi tee lao petengena lao masiami-pyaa. Baa auu pisetae epeamo doko kandatala dupame walu lao mona andeami-pyaa.

¹¹Akali dokome losuu anda andake kame Solomone lenge dokaita Pita Jonepa minatae kateamopa endakali dupa pitakame etete mona andapala dokonya alo pyao ipao kambu piami-pyaa.

¹²Dopa piamino doko kandatala Pitame dokaita lamaiyoo, “Nyakama Isataele dupame aipuma dake kandatala mona andelyamipi? Nyakama aipuma nalimba kandatae silyamipi? Nalimba tangenya pupu lapaepa mana epe miningipa dolapome akali dake auu pisetala kaita paena lelyambinona lao masilyamipi?

¹³Apotakamepi, Aisakepi, Jekopepi naimanya takange dupanya Gote dokome baanya kalai akali Jisasa doko tii pisia. Tii pisiamo dokoaka nyakamame anjoo soo Pailate maitala maita maiyami. Pailateme Jisasa mokatala pena latoo lao masiamo dokopa nyakamame daa leami.

¹⁴Dopa piamino dokome akali epe etete tolatae doko kandao daa leami. Dopa petala akali yango pyao kumasingi mende Pailateme mokekena lao tee leami.

¹⁵Dopa petala nyakamame akali lete katengenya tenge doko pyao kumasiami. Pyao kumasiaminoaka doko, Goteme baa malunya sakatasia. Sakatasiamo doko nalimbame lengeme kandatala doko lao panasoo kalyambano.

¹⁶Nyakamame akali kandengema kandapino dakeme Jisasa lao masoo minao pitipumu dokonya Jisasanya kenge dokome baa kyoto injisalamo. Masoo miningi Jisasame maingi dokome nyakama pitakanya enombanya akali dake etete mee jakamaiyome lamo.

¹⁷“Kini, kaimia paluma, nyakamame masala nayao piamina lao masilyo. Nyakamanya isingi dupame dopaka pyoo masala nayawaka piami.

¹⁸Nyakamame dopa piamino dokome wamba Goteme potopesa dupa pitakanya kambu dupanya baanya Kataisa doko tanda nyetana leamo doko angi jia.