Aposole 28:5-31

⁵Dokopa Polome kanopato doko lyanda lanya itatenya yangatala baa koyala nayao auu pyoo katea.

⁶Dopa piamopa yuu tange endakali dupame kanopatome Polo neamo dokonya andapala baa yapa lombapae soo kumalapomona lao masetala malisoo kateami. Gii longo malisoo katapala baa opale mende napiamosa dee masingi aloo petala, “Baa gote mende lamona,” leami.

⁷Endaki kainanya yuu singi doko isingi akali mupa Papiliasa lenge mende katenge-pyaa. Akali dokonya yuu mendapua naima kateamano makisa dosale singi-pyaa. Akali dokome naima lanyoo baanya andaka pupala kote tepoma naima etete auu pyoo setao palea.

⁸Dopa piamo gii dokopa Papiliasa takange doko yonge itaita pyoo taiyoko mandyuu yaina nyepala sia. Dopa pyoo siamopa Polome akali doko siamo dosa pao loma setala baa minatala yaina doko mee jakamaiya.

⁹Dopa petamopa yuu dokonya tange endakali yaina pyapae waka siamino dupame Polo kateamo dokonya ipata ipata piaminopa baame dupanya yaina dupa mee injeta pyakamaiyaka.

¹⁰Dopa piamopa dupame naima etete tama pyoo oapi longo lao diami. Dee maitakao naima paanya piamano gii dokopa oapi naima daa jiamo dupa nyoo pupale latala sipinya setekeami.

¹¹Naima kana tepoma yuu dokonya katapala maitakao sipi mende wamba koo kana paleamo gii dokopa yuu dokonya sia mendenya pituu peama. Sipi doko Alekesandia tange mende-pyaa. Sipi dokonya enombatena sambo gote Susa dokonya wane ane lapoma pakao mandipaena lao makande pyoo wasoo katatae katenge-pyaa.

¹²Sipi dokonya pituu Sitakusa taono dokonya pao pyakamatala kote tepoma kateama.

¹³Dokonya katao taono Lisiame lenge mendenya pao pyakameama. Yuu dokonya kote mendai katapeamanopa poo epe mende leamosa taita dopa pyoo sipinya pituu taono Pyutiolai lenge mendenya peama.

¹⁴Yuu dokonya masoo miningi kaiminingi mendapua kateamino kandeama. Dupame naima kote kalange awapa katamana leaminopa kateama. Dopa petala Loma yuu dokonya paanya kaitini peama.

¹⁵Masoo miningi kaiminingi Loma kateamino dupame naima epelyamino lapae sepala Apiasa Makesa dokopa Sisoa Tepoma lenge dokopa dolaponya kandanyemana lao epeami-pyaa. Dolaponya endakali dupa kandanyetala Polome Gote lao yaka pilino latala mona kyoto jia.

¹⁶Loma yuu dokonya pao pyakameamanopa kapomane dokome Polo baa anda mendenya palena latala amii mendeme awapa isoo katena lea.

¹⁷Kote tepoma pateamopa Polome Jutamanya akali andake dupa epena lea-pyaa. Ipao limbateaminopa Polome lao pituu, “Kaimia paluma, nambame naima tata dupa-kisa koopi mende napio. Dee naimanya yumbange dupanya manapi mende nepala nayoaka. Dopaka doko, Juta dupame Jetusaleme dokonya namba mee anjetala Loma tange kateamino dupa maiyami.

¹⁸Namba-kisa kosa pii seteamino dupa Loma tange dupame pisoo sepala namba pyao kumasepenge tenge mende nasianya kayapala mokalanya piami.

¹⁹Dopaka doko, Juta dupame etete daa leaminosa Kapomane Isingi Mupa dokome iki sakapengena leo. Doko nambame namba tata dupa-kisa tenge mende setalanya naleo.

²⁰Tenge dokonya minao indupa nambame nyakama kandatala pii langyanya ipupa lalo. Isataele dupame ipatana lao masoo malisoo kalyamino dokonyaka ŋili kende dakeme namba anjetae kalyamona,” lea-pyaa.

²¹Dopa leamopa dupame baa lamaiyoo, “Jutia yuu dokonya kalyamino dupame embanya pii mende lao pepa pyao naima-kisa peala nayami. Dee naimanya kaiminingi mendeme embanya pii koo mende naima ipao langya nayaka.

²²Kini, naimame sipumanopa yuu dupa pitakanya endakali dupame kaita enenge watao paenge tata wakale katenge doko kandao pii koo lelyamino. Ongonya naimame embanya masingi dupa semana emba tangeme laale lao masilyamanona,” leami-pyaa.

²³Dopa latala dokopa Polopi dupapimi kote gii mende makande peteaminopa gii dokonya endakali longo mendapua apata baa kateamo anda dokonya epeami-pyaa. Epeaminopa baame dupa yongama pituu pii lamaiyamo doko lamaiyoaka kateamopa yuu kuiya-pyaa. Baame pii tenge dupa lao lopalyoo lamaiyoo, Gotenya isingi dokonya lao etete pupu lao lamaiya-pyaa. Baame Mosesenya piipi potopesa dupanya piipi dupa lamaiyoo, Jisasanya lao lapae siamo dupa masoo minina lao masingi sakatasakamaiya-pyaa.

²⁴Dokopa yangi dupame Polome pii leamo doko sepala masoo miniami-pyaa. Yangi dupame masoo minala nayami-pyaa.

²⁵Dupame mona mendai iki palyala naenya, kayapala peami-pyaa. Dopaka doko, wambao pii mende dupa lamaiyoo pituu, “Wamba Oli Sipitisa dokome nyakamanya yumbange dupa kandao potopesa Aisayanya nengekaita dokonya dapa lea-pyaa:

²⁶‘Embame endakali datupa kalyamino dokonya pupala dapa lamaipi: “Nyakamame pii sepala dee setamiaka doko, etete masala nayatami. Nyakamame kandatala dee kandatamiaka doko, angi mende nakandatami.

²⁷Doko, endakali dupame kaleme soo lengeme kandao moname masoo petala nambame auu pisetale lao dee mona kapilyetala ipatamane lao nyakama tangeme mona pyakilyoo, kale poyao lenge iminjoo katapelyaminona,” ’ Aisayame lea-pyaana,” lea-pyaa.

²⁸Dopa latala dee baame dupa lamaiyoo, “Goteme pyoo nyiamo kalai doko endakali tata waka dupa-kisa pena lateana masalapape. Dupame setamina,” lea-pyaa.

²⁹Dopa lateamopa Juta dupame nyakamalapo etete pii yanda pyoloo pyoo peami-pyaa.

³⁰Polome anda mende sambao ee kana lapoma lunduta dokonya katao endakali baa kanja epeamino dupa yaka ipamini lamo lao katea-pyaa.

³¹Dopa pyoo katao baame Gotenya isingi dokonya lao pii lamaiyoo katao Kamongo Jisasa Kataisanya lao paka nakayao mana lamaiyoo kateamopa endakali mendeme kaena lao kaita lyokala naya-pyaa.