Aposole 27:11-38

¹¹Dopa leamoaka doko, amii isingi dokome sipi lyaa miningi akali dokopa sipi tange dokopa dolaponya pii iki sepala Polome leamo doko nasia.

¹²Koo kana doko ipatamopa yuu dokonya sipi ipao singi panda doko kapa napata lamona lao masetala sipi dokonya endakali petamino dupanya longo mendapuame monalena latala pii wasoo leami. Kapa pao pupenge jetamoaka kandao doko, koo kana palitamo dutupanya Pinikisa taono dokonya pao katatamana lao masiami. Pinikisa taono dokonya sipi ipao singi panda mende singi-pyaa. Yuu doko Kitita yuu dokonya niki lenge landa pingi yuu dotena-kaita joo singi-pyaa.

¹³Maitakao poo epe mende leamo dokopa dupame nyakamanya pii leaminoli pyoo kapa patamana lao masetala sipi pao pyalya miningi aene kenda pipae doko ketae nyokonyetala Kitita yuu dokonya-kaita endaki kilikili peama.

¹⁴Peamanopa maitakawale poo andake mende Kitita-kaita pupu lao lao epea. Poo dopale dupa niki pyakaenge dokaita-kaita joo katao lao epengena lengema-pyaa.

¹⁵Poo yale leamo dokome sipi doko nyoo kapilyalanya piamosa poo leamo dokonya enombatena-kaita paanya piama. Dopa piamanopa kapa napeanya minao kapilyetala poome naima peteta mee soo pena kayama.

¹⁶Yuu yakane endaki kainanya singi Kota lenge dokonya yangitena-kaita peama. Pao pituu, sipi dokonya sipi yakane maitakaita kendeme anjetae katao paenge doko etete lekeleke tao pyalya lao nyiama.

¹⁷Nyiamanopa sipinya kalai pingi akali dupame sipi yakane doko nyoo sipi andake dokonya ketae setapala yaki piami. Dopa petala sipi andake doko kyoto injina lao yaki pingi kende mendapuame sipi andake doko yaki piami. Dee dupame Lipia yuu dokonya tengesa joo endaki kee pingi panda dokonya sipi doko pao pyalya minatame lao paka kayapala sele andake doko tata lao isa nyiami. Dopa piaminopa poome naima mee soo pea.

¹⁸Poo andake leamo dokome endaki etete buli piamosa taita dopa pyoo pinju yangi endakinya soo pyandeami.

¹⁹Duma dopa pyoo sipinya kalai pingi akali dupame sipi dokonya kalai pingi opale apalepi siamo dupa nyoo endakinya pyandeami.

²⁰Koto longosa niki buipi dupa nakandeama. Poo andake dokome naima minao mangalya mangana pyoo kateamopa tendapi naima menda-kaita pao auu pitamana lao masala nayama. Daa, alu pimana iki lamo lao masiama.

²¹Sipinya peteamino endakali dupame yuu gii longo nee naneaminopa maitakao Polome nyakamanya kaina dokonya toya katapala lao pituu, “Anematupa, wamba nyakamame nambanya pii leo doko sepala Kitita yuu doko yakinala nayamili kandao doko, nyakama tanda nanao oapi dupa alu napipyali.

²²Dopaka doko, indupa nambame nyakama langyoo, mona kyoto jalapape. Nyakamanya akali mendaipi mende alu napitana, sipi iki koyatana lelyo.

²³Namba Gotenya akali mendena, nambame baa lao tama pyoo katenge. Indupa kuka baanya enjele mendeme ipupala namba dapa langyomo:

²⁴‘Polo, embame paka nakayape. Emba Kapomane Isingi Mupa dokonya enomba dokonya pao katapenge. Goteme kondo kayapala endakali emba-pipa awapa pelyamino dokaita pitaka emba ditilyamona,’ enjele dokome dopa langyomo.

²⁵Dopana, nyakama paka nakayalapape. Goteme langyomoli pyoo angi pyaapomona lao nambame masilyo.

²⁶Naima endaki kaina yuu singi mendenya pao pyalya minatana,” Polome dopa lea.

²⁷Koto gii kingi ita mende-kisa dee kitomende dokonya naima solowata pete Etia lenge dokonya soo pea. Soo peamopa kuka andatombe dokonya sipinya kalai pingi akali dupame yuu mendenya ipumano lao masiami.

²⁸Dopa lao masetala endaki doko aipa pyoo landa jilyape lao kanjanya kende mendenya kenda pipae mende anjetae katenge doko pyandatala makande piaminopa mita kingi ita kitomende landa jia. Dokopa kuki pupala dee pyandao makande piaminopa mita kingi ita tepoma landa jia.

²⁹Dokopa dupame sipi doko kanapi mendenya pao pyalya minatame lao pakame kumapala sipi pyalya miningi aene kenda pipae kitomende dutupame pyalya minina lao sipinya maitakaitatena isa pyandatala yuu yapa yongena lao loma soo peteami.

³⁰Dopa piaminopa sipi dokonya kalai pingi akali dupame paka mona lao masiami. Dopa lao masetala sipi pao pyalya miningi aene kenda pipae mendapua sipi enombatena pyandala pele latala sipi yakane doko pyandeami.

³¹Soo pyandeaminopa Polome amii isingi dokopi amii dupapi lamaiyoo, “Sipinya kalai pingi akali datupa sipi dakenya napitimili kandao, nyakama kapa pao auu napimilina,” lea.

³²Dokopa amii dupame sipi yakane doko nyoo anjetae kateamo kende dupa kepanya pyandeami.

³³Yuu ene yongalanya piamopa Polome nee napimili latala dokaita lamaiyoo, “Nyakamame yuu gii kingi ita mende-kisa dee kitomende nee nanenya mee pitimi.

³⁴Dopana, nambame nyakama nee nyoo nalapa lelyo. Dopa pitamino dokome nyakama niseta. Nyakama kindupapi mende napyalaminona,” lea.

³⁵Dopa latala Polo baame betesa mende nyepala dokaita pitakanya enomba ongonya Gote lao yaka pilino lea. Dopa latala baame betesa doko konjoo tee pyao nea.

³⁶Dopa piamopa dokaita pitakame mona yaepatala nee neamiaka.

³⁷Sipi ongonya peteamano endakali dupa pitaka pyasoo andate lapomanya dee kingi ita kalange-kisa wakao tokange petama.

³⁸Nee tiaka kayao napala, sipinya kalai pingi dupame wiisa mandipae siamo dupa sipi doko tayo lena lao endakinya soo pyandeami.