Aposole 25:15-21

¹⁵Namba Jetusaleme kateopa, pitisa mupa dupapi Jutamanya isingi akali dupapimi akali doko-kisa pii setapala baa pyao kumasepe lao namba langiami.

¹⁶Dokopa nambame dupanya pii yanu pyao, ‘Naima Loma tange dupanya mana dokome endakali mende mee pyao kumasala naenya, baame baa kosimi lelyamino endakali dupanya pii yanu pyatena lao malisingina,’ leo.

¹⁷Dopa latala akali dupa namba-pipa ae awapa epeama. Ipupala taita dopa pyoo nambame malisala naenya, kosa singi anda dokonya pituu akali doko laminao epena leo.

¹⁸Dokopa baa kosimi leamino akali dupa toya kateaminoaka doko, dupame baa kandao mana koo miningina lao tenge setao pii mende laamino lao nambame masioli pyoo laa nayami, daa.

¹⁹Nyakama tangenya Gote watao miningi manapi dee Polome akali Jisasa lenge mende kumia doko lete kalyamona leamo dupapi dupanya laanya leami-pyaa.

²⁰Nambame pii dopale dupanya tenge dupa aipa petala masoape lao kutao kayapala akali doko lamaiyoo, ‘Embanya kosa doko Jetusaleme sakatopa patepe?’ lao pisio.

²¹Dokopa Polome, ‘Nambanya kosa doko Kapomane Isingi Mupa dokomeaka sakatana anjingi andaka palitoo,’ lea. Dopa leanya Kapomane Isingi Mupa dokome sekena patena malisoo anjingi andaka palena leona,” lao Pesatasame Kiŋi Akotipa doko lamaiya-pyaa.