Aposole 20:1-28

¹Epesasa tange dupame ae lalya lana piamino doko etapeamopa Polome Jisasa masoo miningi endakali dupa epena lea-pyaa. Epeaminopa baame pii epe mendapua dupa pupu lasoo lamaiya-pyaa. Dopa petala dupa lasa latala baa Masetonia yuu dokonya pea-pyaa.

²Baame Masetonia yuu yakane dupanya payao endakali dupa pii longo lamaiyoo pupu lasetala Gitiki yuu dokonya pea-pyaa.

³Yuu dokonya kana tepoma katapala Sitia yuu dokonya sipinya pituu paanya piamopa Juta dupame baa pyao kumasalanya pii lao wasilyamino lapae doko sia-pyaa. Sepala Polome Masetonia yuu dokonya-kaita Sitia pilyetoana lao masia-pyaa.

⁴Betia tange Pitasa ikiningi Sopata lenge dokopi, Tesalonaika tange Atitakasa Sekandasapi, Depi tange Gayasa lenge dokopi Timoti dokopi Esia tange Tikikasa Topimasapi akali dutupa Polo-pipa awapa payami-pyaa.

⁵Dutupame wambao pupala naima malisoo Toasa yuu taono dokonya kateami-pyaa.

⁶Naima Pilipae yuu taono dokonya kateamanopa betesanya iisa napalyoo nenge gii doko epea. Gii doko ipao pateamopa naima kote yuungi nepao sipinya pituu Toasa yuu dokonya dupa kateamisa pupala kote kalange kateama.

⁷Angi Sandee dokonya Toasa tange dupa-pipa nee nyemana lao limbiamanopa Polome dupa pii lamaiya. Baa taita patona lao masetala pii lamaiyoaka kateamopa andatombe jia.

⁸Naima limbao peteamano anda palo ketae namba tepo dokonya lama kaiyepae longo mendapu sia.

⁹Wane patange Yutikasa lenge mende windoa kaita dokonya pii soo petea. Dopa piamopa Polome pii longo leamopa Yutikasa doko etete lemongati latala anda ketae namba tepo dokonya pituu isa mangea. Endakali dupame baa nyala peaminopa kumapae tupi siamo kandeami.

¹⁰Poleme isa pupala wane kumapae siamo doko kopinyetala lao pituu, “Nyakamame yako lao ee kayalapa. Wane dake dee lenge telyamona,” lea.

¹¹Dopa latala Polo-pipa anda palo kisa dokonya dee pupala nee nyiama. Nee nyepala pii longo waipa soo lamaiyoo kateamo dokopa yuu yongea. Yongateamopa Polo baa pea.

¹²Dokaitame wane doko lenge telyamona lao masetala mona etete yaepao andaka laminao peami.

¹³Polome naima sipinya pituu Asosa yuu dokonya wambao pataminopa baa itange kaitini pato lao masetala kaitini depa latea-pyaa. Dopa piamoli pyoo naima pupala Polo baa kandanyetala lanyema sipinya pituu awapa paamano lao masiama.

¹⁴Dokopa Asosa yuu dokonya Polome naima kandanyeteamopa naimame baa sipinya lanyepala pituu Mitilini yuu taono dokonya awapa peama.

¹⁵Naimame Mitilini yuu dokonya katao sipinya pituu taita dopa pyoo Kayosa yuu dokonya tengesa joo peama. Oo yongama sipinya pituu Semosa yuu dokonya peama. Oo yongama Mailitasa yuu taono dokonya peama.

¹⁶Polome Esia yuu dokonya koto longo nakatao yapa pato kandao Pendekosa gii doko kapa pao Jetusaleme dokonya kandatona lao masia. Dopa lao masiamosa naimame Epesasa pupenge doko kayapala sipinya pituu peama.

¹⁷Naima Mailitasa yuu dokonya pyakamatala Polome Epesasa tange sosa dokonya isingi akali dupa epena lao akali mendeme lanyala pena lea.

¹⁸Isingi akali dupa epeaminopa baame dupa lamaiyoo, “Wamba namba Esia yuu dakenya tee pyao ipupala nyakama-pipa koteaka lao aipa pyoo katee kandeamape lao doko nyakamame masilyamino.

¹⁹Juta dupame namba koyasalanya pii lao wasetala namba makande piami. Dopa piaminoaka doko, namba anasale joo katao Kamongonya kalai doko lekeleke tao pyakamaiyoaka kateo kandeami.

²⁰Nambame pii manapi nyakama auu pisepenge dupanya mendaipi mende nyakama-kisa yapae napyoo, nyakamanya limbingi pandapi palenge andapi dupanya katao pii doko panao mana langyoo kateo kandeami.

²¹Jutapi wakapi dupa pitakame koo dupa maita maitala Gote lao mona kapilyetala naimanya Kamongo Jisasa lao masoo minina lao nambame pii etete kyoto joo lamaiyo.

²²Oli Sipitisa dokome namba langipumuli pyoo Jetusaleme patopa, aki mende namba-kisa ipatape lao masala nayao pelyo.

²³Wamba namba taono waka waka dupanya pao kateopa Oli Sipitisa dokome anjingi kendepi kenda pipaepi dupa namba-kisa ipatana lao namba langiamo doko iki masoo pelyo.

²⁴Dopana, namba lenge tao kalyo doko angina lao masala naelyo. Nambame pipulyamo doko pyoo etapatoo. Gotenya mona epe palenge dokonya lao Wai Pii Epe lao panenge kalai Kamongo Jisasa-kisa nyio doko pyoo etasoani kaelyo.

²⁵Wamba amba nyakamanya yuu waka waka dupanya payao Goteme naima isilyamona lao pii doko lao kateo kandeami. Dee nyakama pitakame namba nakandatamina lao masilyo.

²⁶“Dopana, indupa nambame nyakama kiningi langilyo. Nyakamanya endakali mendaipi mende alu pitamo kandao doko, namba mambele daa.

²⁷Nambame paka nakayao Goteme pituna leamo dupa pitaka nyakama langio daape.

²⁸Nyakamame nyakama tangepi Jisasa minao paenge endakali dupapi dupa kandao isoo kalyepape. Oli Sipitisa tangeme kalai doko pyepape leamoli pyoo Gotenya sosa doko setao kalyepape. Goteme baanya Ikininginya taiyoko dokome dupa sambao nyiamo dokonya baanya joo kalyamino.