Aposole 17:10-33

¹⁰Dopa peteaminopa masoo miningi kaiminingi dupame Polo Sailasapa Betia yuu dokonya kuakama yapa pena leami-pyaa. Akali dolapo Betia yuu dokonya pyakamatala Jutamanya losuu anda dokonya kolandeambi-pyaa.

¹¹Juta endakali Betia kateamino dupame Juta endakali Tesalonaika kateamino dupa ita minao mona palenge akali kateami-pyaa. Dupame Wai Pii Epe doko etete putitimi kumao siami-pyaa. Pii doko Gotenya pii pepa pyapae singi dokonya kiningi dopaka lao pyapae silyape lao koteaka lao kandokondape pyoo kateami-pyaa.

¹²Dopa pyoo katao dupanya longo dupame masoo miniami-pyaa. Gitiki tange kenge singi enda mendapuapi akali longo mendapuapimi masoo miniamiaka-pyaa.

¹³Maitakao Juta endakali Tesalonaika kateamino dupame Polome Betia yuu dokonya Gotenya pii doko lamaitilyamoakana lapae sepala dupa yuu dokonya epeamiaka-pyaa. Ipupala endakali dupa minao kyakasoo mona koo palisakamaiyami-pyaa.

¹⁴Dopa piaminopa masoo miningi kaiminingi dupame Polo solowata pete singi yuu dokonya yapa pena leami-pyaa. Dokopa Sailasa Timotipa Betia mee kateambi-pyaa.

¹⁵Polo mapala peamino akali dupame Atenesa yuu taono dokonya mapeami-pyaa. Polome akali dokaita lamaiyoo, “Sailasa Timotipa namba kalyo angenya yapa epena lamaiyepape,” lateamopa pilyiami-pyaa.

¹⁶Polome Sailasa Timotipa Atenesa yuu dokonya malisoo katao kandeamopa taono dokonya sambo gote wasepe dupame tumbatae kateamo kandatala mona koo palea-pyaa.

¹⁷Dopa pyoo katao Polo Jutamanya losuu anda dokonya pupala Juta dupapi endakali tata waka Gote lao tama pingi dupa-pipapi pii laloo pia-pyaa. Dee baame koteaka lao makesa singi kamapi dokonya pupala endakali ipao kambu piamino dupa-pipa pii laloo piaka-pyaa.

¹⁸Epikutianamanya mana nyepae dupapi Setoikimanya mana nyepae dupapi dupanya masingi akali mendapuame ipao Polo-pipa pii yanda pyoloo piami-pyaa. Mendapuame lao pituu, “Kaina pii lao paenge akali dakeme aki masoo maku lelyape?” leami-pyaa. Yangimi lao pituu, “Akali dakeme gote yuu waka tange mendapuanya pii lao katata aipape?” leami-pyaa. Polome Jisasanya lao baa malunya sakateana lao lamaiyoo kateamo dokonya dopa leami-pyaa.

¹⁹Dupame Polo laminao Ateopakasa kanjole dupa kateamino dokonya peami-pyaa. Pupala lao pituu, “Embame mana enenge lamaingi pyomo doko sipuma laka lao masilyamano.

²⁰Naimame embanya pii doko sipumanopa mendepale jipumosa pii dokonya tenge dupa sipuma laka lao masilyamano,” leami-pyaa.

²¹Atenesa tange dupapi tata waka Atenesa ipao tisa nao katenge dupapimi pii enengepi mana enengepi dopale dupaka soani kayao katengema-pyaa.

²²Polome Ateopakasa kanjole dupanya kaina dokonya toya katapala lao pituu, “Atenesa tange akali nyakama, nambame kandapupa nyakamanya gote dupa lao etete minokondape pyoo miningima lamo.

²³Nambame payao pituu nyakamame tama pingima lamo dupa kanjo. Dee olata toko mendenya Naimame Nakandenge Gote doko lao pepa pyapae sipumu kanjoaka. Nyakamame nakandao mee tama pingima lamo dokonya lao nambame indupa langitoo.

²⁴Yuupi kaitipi dupanya silyamo dupa pitaka wapuiyamo Gote doko yuupi kaitipi dupanya Kamongo kalyamo. Dopana, baa endakali kingimi losuu anda petae dupanya nakatenge.

²⁵Baa opale mende daa jala naenge. Dee endakali mendeme baa kingi maipenge nanjingiaka. Baame iki endakali dupa pitaka lete katengepi, imambu singipi, oapi dupa pitaka maingi.

²⁶Baame endakali tata dupa pitaka yumbange mendainya pyakalyina latala yuu dupa pitakanya katena lea-pyaa. Wamba baame endakali dupanya gii dupa setakamaiyoo yuu dupa konjoo maitala dopa pia-pyaa.

²⁷Dupame mina kanda kanda pyoo Gote baa kutao kandapimi laka lao dopa pia-pyaa. Baa naimanya mendaipi mendepa tependa joo nakatenge.

²⁸“Naima baa mambele lete katao kaita payao kalyamano. Wamba nyakamanya wee pepa pingi akali mendapuame dopaka lao lao pituu, ‘Naima apata baanya mandipayakana,’ leami-pyaa.

²⁹Naima Gotenya mandipae kalyamano dokonya Gote baa opale endakalimi masetala kingimi etete auu pyoo golopi, silipapi, kanapimi wasingi dopalena lao masala nayapenge.

³⁰Wamba endakali dupame masala nayao koo piamino dokopa Goteme kanja naele pyoo kateamoaka doko, indupa baame yuu dupa pitakanya endakali dupa pitaka lamaiyoo, ‘Nyakama mona kapilyalapape,’ lelyamo.

³¹Doko, baame gii seteamo dokonya akali mende yapao nyiamo doko-kisa baame pii lao tolao mana tolatae doko minao endakali dupa pitaka yapata. Baame dopa pitana lao akali doko malunya sakatasiamo dokome endakali dupa pitaka auu pyoo laitaka peteana,” Polome lea-pyaa.

³²Endakali kumapae malunya sakatenge pii Polome leamo doko sepala endakali yangimi gii kayao kaa kaa leami-pyaa. Endakali yangimi, “Gii mendepa pii dokonya dee setamana,” leami-pyaa.

³³Dopa leaminopa Polome endakali dupa yakinatala pea-pyaa.