Aposole 16:28-40

²⁸Dopa piamopa Polome puu lao, “Embame emba tange koyasala nayape, naima pitaka angenya palelyamanona,” lea-pyaa.

²⁹Dokopa anjetae isingi akali dokome kia mende peena latala alo pyao andaka kolandea-pyaa. Kolandatala Polo Sailasapa paleambino dosa paka kayao walu lao tombauli sia-pyaa.

³⁰Tombauli soo sakatatala baame akali dolapo laminao kamanda pupala, “Akali andake anelyapo, Goteme namba pyoo nyina lao aipa pyuape?” lea-pyaa.

³¹Dopa leamopa akali dolapome baa lamaiyoo, “Embame Kamongo Jisasa lao masoo minape. Dokonya Goteme emba pyoo nyeta. Baame embanya andaka awapa palenge dupa pyoo nyetakana,” leambi-pyaa.

³²Dopa latala Polo Sailasapame baapi baanya andaka awapa palenge dupa pitaka Kamongonya lao pii lamaiyambi-pyaa.

³³Kuka gii dokopaka baame akali dolapo lanyepala pyapae dupa kaimbu pyao nepakamaiya-pyaa. Dopa piamopa dolapome baapi baanya andaka awapa palenge dupa pitaka-pipa Gotenya kaimbu doko pupae pyakamaiyambi-pyaa.

³⁴Kaimbu pyatakamaiyambinopa baame akali dolapo laminao palenge anda namba ketae dokonya kolandatala nee yangao maiya-pyaa. Baame Gote lao masoo miniamo dokonya baapi baanya andaka awapa palenge dupapimi mona yaepeami-pyaa.

³⁵Yuu yongateamopa taono isingi akali dupame yanda singi mendapuame akali dolapo mokena lao anjetae isingi akali doko lamaiya pena leami-pyaa.

³⁶Yanda singi dupame anjetae isingi doko dopa lamaitiaminopa baame Polo lamaiyoo, “Taono isingi akali dupame nyilyambo mokape lao wai peelyamino, dokonya nyilyambo kamaka ipupala mona yaepatala pupa,” lea-pyaa.

³⁷Dopaka doko, Polome yanda singi dupa lamaiyoo, “Nalimba Loma tange dolapo dupame kosa mende nalao endakali dupanya enombanya konjame pyapala anjingi andaka mee anjinya palyetala, dee indupa elyakao mokatala pupa lelyamipi? Doko kapa daana, anjiamino akali dupameaka mokao nyala epena kayalapa,” lea-pyaa.

³⁸Yanda singi dupame pupala taono isingi akali dupa Polome pii leamo doko lamaiyaminopa akali dolapo Loma tange lumu lao sepala paka kayami-pyaa.

³⁹Dokonya dupame ipao akali dolaponya mona auu pisakamaiyoo kamaka lanyiami-pyaa. Dopa petala akali dolapo kandao, “Anelyapo, nyilyambome taono dake yakinatala pupapoko,” leami-pyaa.

⁴⁰Dokopa akali dolapo anjingi anda doko yakinatala enda Litianya andaka peambi-pyaa. Pupala anda dokonya masoo miningi kaiminingi dupa kandatala mona epe palisakamaiyoo pii mendapua lamaiyambi-pyaa. Dopa petala dolapo peambi-pyaa.