Aposole 13:4-51

⁴Oli Sipitisa dokome Solopa Banapasapa pena leamopa Selusia yuu taono dokonya lanao peambi-pyaa. Yuu doko yakinatala sipi mendenya pituu endaki kainanya yuu singi Saipotasa lenge ongonya peambi-pyaa.

⁵Yuu dokonya ipupala taono Salamisa lenge dokonya Jutamanya losuu anda dupanya Gotenya pii doko lamaiyoo kateambi-pyaa. Dokopa Joneme akali dolapo nisoo kalai awapa pia-pyaa.

⁶Dupame Saipotasa yuu dokonya yangitena pupala yuu taono Peposa lenge dokonya pyakamameami-pyaa. Pyakamatala nemango tata dupa miningi akali sambo potopesa kenge Balanjisasa lenge Juta mende kandeami-pyaa.

⁷Akali doko kapomane andake Sesiasa Polo lenge dokopa awapa katea-pyaa. Sesiasa Polo doko masingi akali mende-pyaa. Baame Gotenya pii doko sipuli lao masetala Banapasapa Solopa dolapo epena lea-pyaa.

⁸Dolapo epeambinopa akali nemango miningi dokome dolaponya kaita lyokao katea-pyaa. Akali dokonya kenge mende Gitiki pii lengeli pyoo Elimasa lenge-pyaa. Baame kapomane andake dokome masoo naminina lao kaita lyokao katea-pyaa.

⁹Dokopa akali Solo kenge mende Polo lenge doko, Oli Sipitisa dokome tumbatae katao baame Elimasa doko kandokondape petala dapa lamaiya-pyaa:

¹⁰“Emba luingipi minakasingipi mana dupa pitakame tumbatae lamo! Emba Satanenya mandipae lamo! Emba mana epe dupa pitakanya yanda pimaingi akali lamo! Embame Kamongo dokonya kaita tolatae dupa uanga pisoaka katenge.

¹¹Kandeleno! Kamongo dokonya kingi pupu lapae doko emba-kisa ipupala embanya lenge dolapo iminjetamopa, niki doko gii mendatupa kapa pao nakanjapenona,” Polome dopa lea-pyaa. Gii ongopaka baanya lenge dolapo kopame sanga pili petala iminjia-pyaa. Lenge iminjeteamopa kaitini laitaka pina lao endakali mende mina kanda kanda soo payao kutia-pyaa.

¹²Dopa piamo doko kapomane andake dokome kandatala Kamongonya pii leambino doko soo masetala kiningi lumu lao walu lao masoo minia-pyaa.

¹³Dokopa Polo baa awapa paenge akali dupa-pipa Peposa yuu taono doko yakinatala sipi mendenya pituu Pambilia yuu dokonya pupala yuu taono Peka lenge dokonya pyakameami-pyaa. Gii dokopa Joneme akali dutupa yakinatala Jetusaleme pilyia-pyaa.

¹⁴Dutupame Peka yuu doko yakinatala Pisitia yuu taono Andioko dokonya pyakameami-pyaa. Sambasa gii dokopa dupame Jutamanya losuu anda dokonya kolandatala peteami-pyaa.

¹⁵Dokopa losuu anda isingi akali dupame potopesa dupanya pii mendapuapi mana setapae dupapi itaki pyao etapala dutupa kandao, “Kaimia paluma, nyakamame pii mende endakalipi dupa pupu lasoo lamaipenge jetamo kandao doko, lamaiyepa,” leami-pyaa.

¹⁶Dopa leaminopa Polome toya katapala kingi pee latala pii dake lamaiya-pyaa. “Nyakama Isataele endakalipi Gote lao paka kayao katenge tata waka dupapi nyakamame salapape.

¹⁷Isataele tata dakenya Gote dokome naimanya yumbange dupa yapao nyia-pyaa. Dokaitame Isipe yuu dokonya tisa nao kateaminopa baame dupa pee lasetala nyakamanya kenge minalyia-pyaa. Dopa petala baanya pupu lapae dokome dupa lanyepala laminao epea-pyaa.

¹⁸Dopa petala ee kana kingi ita kitomende dupanya endakali napalenge yuu dokonya luiyaminoaka doko, baame dupa yapa yakinala naya-pyaa.

¹⁹Enakao baame Kenane yuu dokonya tata kalange kateamino dupa pyao watapala yuu doko nyakamanya tenge jetana lao Isataele endakali dupa maiya-pyaa.

²⁰Maitiamopa Isataele dupame ee kana andate kitomende-kisa kingi ita yuungi dupanya yuu doko isoo kateami-pyaa. Maitakao baame dupanya isingi akali mendapua potopesa Samuele katatamo gii dokonya katao tuu lao katena lea-pyaa.

²¹Maitakao dupame kiŋi mende dina lao tee leaminopa Goteme Benjamene tata dokonya akali Kisa ikiningi Solo lenge doko dupa maiya-pyaa. Maitiamopa Solome ee kana kingi ita kitomende kiŋi katea-pyaa.

²²Dee Solo kaena latala alo pyoo Goteme Dapiti dupanya kiŋi katena lea-pyaa. Goteme Dapitinya lao endakali dupa lamaiyoo lao pituu, ‘Nambame Jesi ikiningi Dapiti doko kutao kandatelyo. Nambame baa auu kaenge. Nambame pina latoli pyoo baame dupa pitaka pitana,’ lea-pyaa.

²³Wamba Goteme mende pitona leamoli pyoo akali dokonya mandipae mendenya Pyoo Nyingi Akali Jisasa doko Isataele dupa maitia-pyaa.

²⁴Joneme wambao Isataele dupa pitaka kandao mona kapilyetala kaimbu nyina lao pii lamaiyoo katea-pyaa.

²⁵Joneme kalai pyoo etalanya pituu baame dokaita pisoo, ‘Nyakamame namba kandao apina lao masilyamipi? Namba akali nyakamame malisilyamino doko daana, akali mende namba watao maita pyao epelyamo. Akali dokonya moko pee pingi dolapo namba koo pingi akali dokome lyokakamaipenge daana,’ lea-pyaa.

²⁶“Kaimia paluma, nyakama Apotakame tatanya mandipae dupapi dee Gote lao paka kayao katenge tata waka dupapi dupa kandao nambame pii dake langilyo. Goteme naima pyoo nyepeamo dokonya pii dake naima-kisa epena latelyamo.

²⁷Jetusaleme kateamino endakali dupapi dupanya isingi akali dupapi dupame Jisasa doko masalakao masala nayami-pyaa. Dee potopesa dupanya pii koto Sambasa dii lao itaki pingima dupa masalakao masala nayamiaka-pyaa. Dupame baa kosimi leamino dokome wamba akali potopesa dupame dopa pitamina leamili piami-pyaa.

²⁸Dokaitame baa pyao kumasepenge tenge mende napaleamosa kutao kayapala Pailate dokome Jisasa mee pyao kumasepoko leami-pyaa.

²⁹Wamba potopesa dupame baa kandao pii pepa pyanya seteamino dupa pitaka pyoo etapala dokopa dupame baa ita pokonya yukuotae kateamo doko kondao isa nyepala malu piami-pyaa.

³⁰Dopaka doko, Goteme Jisasa baa malunya sakatasia-pyaa.

³¹Sakatasiamopa endakali baa-pipa Galili katao Jetusaleme peamino dupame kandena lao kote longo lao baa tange panata piamopa kandeami-pyaa. Kandeamino dupame indupa Isataele dupa kandao baa lao panasingi akali kalyamino.

³²Wamba Goteme naimanya yumbange dupa lamaiyoo pitona lea pyomo doko indupa Jisasa malunya sakatasiamo dokome naima wane dupa-kisa angi injisetelyamo. Dokonya naimame Wai Pii Epe dake nyakama langilyamano. Losuu Wee laponge dokome pii dokoaka lao pituu, ‘Indupa nambame emba mandipilyona, emba nambanya ikiningina,’ lapae silyamo.

³⁴Dee baame Jisasa malunya sakatasiamo doko baa dee kapa pao malunya pilyetala tamuala nayatana lao dapa lapae silyamo: ‘Nambame etete epe koyala naenge dupa Dapiti maitona leo dupa nyakama ditona,’ lapae silyamo.

³⁵Wee mende dapa lapae silyamoaka: ‘Embame embanya akali epe etete doko soo tamuina kayala nayatena,’ lapae silyamo.

³⁶Goteme masiamoli pyoo Dapitimi baanya tata doko nisoo kalai pyoo katao kumapala baanya yumbange dupa-pipa awapa malu petae katao tamuiya-pyaa.

³⁷Dapiti tamuiyamoaka doko, Goteme akali sakatasiamo doko tamuala naya.

³⁸Dopana, kaimia paluma, nyakamame pii dake auu pyoo masalapale lao naimame langilyamano: akali dokome nyakamanya koo dupa kunanya nepatekea. Naimame naimanya koo tata dupa pitakame anjetae kateamanopa Goteme mana setapae Mosese maiyamo dupame naima kapa pao mokao nyala naya. Dopaka doko, akali dokome baa lao masoo miningi endakali dupa pitaka mokao nyilyamo.

⁴⁰Dopana, aopyoo latala wamba potopesa dupame leaminoli pyoo apale mende nyakama-kisa ipatana, kandao kalyepape:

⁴¹‘Anematupa! Nyakama namba kilya kandao maita dingi endakali dupa mona andapala koyao alu pyepa! Doko, nambame nyakama kalyamino gii dakepa kalai mende pilyo. Dopa pilyo tenge doko endakali mendeme nyakama langitamopapi, nyakamame kiningina lao masala nayatamina,’ dopa lao pyapae silyamona,” latala Polome pii lao etea-pyaa.

⁴²Polopa Banapasapa kamanda paanya peambinopa, dokaitame dolapo lamaiyoo, “Sambasa gii mende ongonya pii dake naima dee langya ipupape,” lao tee leami-pyaa.

⁴³Pii latala tale peteaminopa Jutapi Juta joo Gote lao tama pyoo kateamino dupapi longo dupame Polopa Banapasapa dolapo watao peami-pyaa. Dokopa dolapome dupanya mona minao sakatasakamaiyoo, Gotenya mona epe palenge doko masetae katena lao lamaiyoo kateambi-pyaa.

⁴⁴Sambasa gii mende doko ipateamopa taono dokonya tange endakali dupa pitaka jowame Gotenya pii doko salanya limbiami-pyaa.

⁴⁵Pitaka limbiamino kandatala Juta dupame etete tilya nyepala Polome pii leamo doko yanda pimaiyoo pii koo lao lamba leami-pyaa.

⁴⁶Dopa leaminopa Polo Banapasapame paka nakayao dokaita lamaiyoo, “Gotenya pii doko nyakama wamba lamaiyakalapape leamo dokonya langitapumba. Dopaka doko, nyakamame pii doko tanga lao nepelyamino dokome nyakama tangeme lete etete nakatapenge daana latelyamino. Dokonya nalimbame kapilyetala endakali tata waka dupa lamaiya pelyambano, kanjepa.

⁴⁷Dopaka pyepale lao Kamongo dokome naima langyoo, ‘Emba endakali tata waka dupanya tii pisakamaingi akali joo kataseteo. Yuu dupa pitakanya endakali dupa emba-kisa pyoo nyepae katatamina,’ lea-pyaana,” leambi-pyaa.

⁴⁸Endakali tata waka kateamino dupame pii doko sepala mona yaepao Kamongonya pii doko tama piami-pyaa. Wamba Goteme endakali lete etete katatamina lao yapao nyiamo dupame masoo miniami-pyaa.

⁴⁹Dokopa Kamongonya pii doko yuu doko pitakanya taya-pyaa.

⁵⁰Juta dupame Gote lao tama pyoo petenge enda kenge singi dupapi yuu taono dokonya kenge singi akali dupapi dupanya mona minao sakatasetakamaitala Polo Banapasapa dolapo minao koyasina leami-pyaa. Dopa lateaminopa dokaitame dolapo nyakamanya yuu ongonya nakatena lao watao piami-pyaa.

⁵¹Dopa piaminopa dolapome yuu kuni kungumapi nyalambonya mokonya pateamo dupa tange-kisa lyanda lanya setapakamaitala Aikoniame yuu taono dokonya peambi-pyaa.