Aposole 12:2-18

²Baame Jone kaiminingi Jemesa konjua mendeme kepao kumasia-pyaa.

³Dopa piamo doko Juta dupame auu kayamino kandatala baame Pita anjiaka-pyaa. Betesanya iisa napalyoo nenge gii dokopa dopa pia-pyaa.

⁴Baame Pita anjoo nyepala anjingi anda dokonya pyandea-pyaa. Pyandatala pituu baame kambu kitomende dupanya yanda singi kitomende kitomende lawame Pita kandao katena lea-pyaa. Napinya Kayamo Gii doko ipao patatamopa, endakali dupanya enombanya Pita laminao epena latona lao masia-pyaa.

⁵Dokopa yanda singi dupame Pita anjingi anda dokonya isoo kateami-pyaa. Isoo kateaminoaka doko, Goteme Pita nisina lao sosa dokome loma sokondape pyoo siami-pyaa.

⁶Etoteme Pita taita dopa pyoo kosa laa epena latona lao masiamopa kuka gii dokonya Pita yanda singi lapomanya kaina dokonya ŋili kende lapomame anjetae palea-pyaa. Yanda singi mendatupame anjingi anda kambu dokonya katao isoo kateamiaka-pyaa.

⁷Dokopa pupae lao Kamongonya enjele mendeme Pita paleamo dokonya ipao kalyu pia-pyaa. Dopa piamopa Pita paleamo palo dokonya tii pia-pyaa. Enjele dokome Pitanya patali dokonya minao pyale tasoo, “Emba yapa sakata!” lea-pyaa. Dopa leamopa ŋili kende Pitanya kingi dolaponya anjetae kateamo dolapo mokala isa kopo lea-pyaa.

⁸Dokopa enjele dokome Pita lamaiyoo, “Embanya matapu petala moko pee pii!” lea-pyaa. Dopa leamopa Pitame leamoli pia-pyaa. Dopa piamopa enjele dokome Pita lamaiyoo, “Embanya yonge pee ketae pingi londe doko petala namba pelyo angenya watao ipu,” lea-pyaa.

⁹Pita baa paleamo anda palo doko yakinatala enjele doko watao pea-pyaa. Pao pituu enjele dokome piamo doko kiningina lao masala naenya, kombeame pelyona lao masia-pyaa.

¹⁰Pitapa enjele dokopa peambino doko pao yanda singi enomba nyoo isoo kateamo doko nyoo nepatala lapo pyoo isoo kateamo doko nyoo nepeambiaka-pyaa. Dopa petala taono dokonya paanya penge lome kambu dokonya pyakameambinopa lome kambu aeneme pai latae doko tangeme mee lumbia-pyaa. Dopa piamopa enjele dokopa Pitapa ipao kamanda pyakalyetala kaitini kembo mende nyiambi-pyaa. Dokopa enjele dokome Pita yapa yakinatala pea-pyaa.

¹¹Pateamo dokopa Pitame masokondape pyoo masetala, “Kiningi lamona lao masilyo. Kamongome baanya enjele doko epena latala Etotenya kingilyaka dokonyapi Juta dupame Etoteme pitamo kanjanya malisiamino dupa pitakanyapi baame namba nyokonyalame lamona,” lao masia-pyaa.

¹²Dopa lao masetala baa Matianya anda dokonya pea-pyaa. Matia doko Jone Make lenge dokonya endangi-pyaa. Endakali longo dupa anda dokonya limbatala loma soo peteami-pyaa.

¹³Pitame ipao kamaka lome kambu doko watawata piamopa kalai enda Lota lenge dokome lumbala epea-pyaa.

¹⁴Enda dokome Pita lumu lao sepala baa etete mona auu kayapala kaita doko lumbala naenya, andaka alo pyao kolandatala, “Pita ipao lome kambunya kalyamona!” lea-pyaa.

¹⁵Dopa leamopa endakali peteamino dupame, “Emba kekeleno,” leami-pyaa. Dopa leaminopa enda dokome kyoto joo, “Etete kiningi baa kalyamona,” lea-pyaa. Dopa leamopa, “Doko baanya imambu doko kalyumuna!” leami-pyaa.

¹⁶Pitame lome kambu dokonya watawata pyoaka katea-pyaa. Dopa piamopa kaitini lumbapeaminopa baa kateamo kandatala mona andeami-pyaa.

¹⁷Dokopa Pitame pii kaena lao kingi pee latala, Kamongome baa anjingi andaka mokao nyepala kamanda laminao peamoli pyoo dupa lamaitala lao pituu, “Nyakamame pii dutupa Jemesapi masoo miningi kaiminingi dupapi dupa lamaiyepape,” lea-pyaa. Dopa latala baa kamanda pupala yuu mendakaita pea-pyaa.

¹⁸Yuu yongateamopa yanda singi dupame Pita aipa pyape lao walu koo leami-pyaa.