Aposole 11:15-30

¹⁵Nambame pii sakatao leo dokopa Oli Sipitisa doko wamba naima-kisa epeamoli pyoo dutupa-kisa epea.

¹⁶Wamba Kamongo dokome lao pituu, ‘Joneme endakimi endakali dupanya kaimbu pyakamaiyamoaka doko, Takange dokome Oli Sipitisa dokome nyakamanya kaimbu pyakatana,’ leamo doko gii dokopa nambame dee masio.

¹⁷Naimame Kamongo Jisasa Kataisa lao masoo miniamanopa Goteme epe mende naima mee diamo mendai dopaleaka mende dupa mee maiya. Maiyamopa namba api kaita Gotenya kaita doko lyokakamaitope lao masiona,” Pitame dopa lea-pyaa.

¹⁸Jetusaleme tange Juta dupame Pitame pii leamo dutupa sepala nyakamanya pii doko kayami-pyaa. Dopa petala, “Endakali tata waka dupa lete etete katenaka lao Goteme mona kapilyakamaiyoaka kalyumuna,” lao tama piami-pyaa.

¹⁹Sitipena pyao kumaseteaminopa masoo miningi endakali dupa-kisa kenda pipae mende epeamosa dupa tale piami-pyaa. Tale pyoo pao Pinisiapi, Saipotasapi, taono Andiokopi yuu dupanya pupala endakali tata waka dupa pii epe doko lamaiya naenya, Juta endakali dupa iki lamaiyoo kateami-pyaa.

²⁰Tale piamino dupanya Saipotasa tangepi Saitini tange akali mendapuapi kateamino dupame Andioko yuu dokonya pupala endakali tata waka dupa Kamongo Jisasanya lao Wai Pii Epe doko lamaiyamiaka-pyaa.

²¹Kamongo dokome pii epe lamaiyamino dupa nisoo kingi maiyamopa endakali longome masoo minao katao Kamongo doko watao minao kateami-pyaa.

²²Dopa pilyamino lapae doko Jetusaleme tange sosa dokome sepala Banapasa Andioko yuu dokonya pena leami-pyaa.

²³Banapasame Andioko yuu dokonya pao pyakamatala Goteme mona epe palipala dupa-kisa piamo doko kandatala mona yaepea-pyaa. Endakali dupa pitakame moname Kamongo doko kyoto joo masoo minina lao baame pii lamaiyokondape pyoo lamaiyoo katea-pyaa.

²⁴Banapasa baa akali epe mende Oli Sipitisapa masoo miningipa dolapome tumbatae katenge-pyaa. Dokopa Kamongome endakali longo baanya jina lao nyoo konda pia-pyaa.

²⁵Maitakao Banapasame Tasasa yuu taono dokonya Solo kutala pea-pyaa.

²⁶Kutao kandatala baa laminao Andioko yuu dokonya pilyia-pyaa. Ee kana mende itata akali dolapome Andioko tange sosanya endakali dupa-pipa awapa katao Gotenya pii doko endakali longo dupa mana lamaiyoo kateambi-pyaa. Andioko tange dupame Kataisa lao masoo miniamino endakali dupa kandao kenge Kitisene doko kandasoo leami-pyaa.

²⁷Gii dokopa akali potopesa mendapua Jetusaleme katao Andioko yuu dokonya lanao epeami-pyaa.

²⁸Potopesa dupanya mende kenge Akapasa lenge dokome toya katapala Sipitisanya pupu lapae dokome pii mende panao lao pituu, “Lopo andake mende yuu dupa pitakanya setana,” lea-pyaa. Maitakao Kolotiasame yuu isoo kateamo gii dokopa Akapasanya pii leamo doko angi jia-pyaa.

²⁹Dokopa Andioko tange masoo miniamino dupame, “Naima mendai mendai lawame naima-kisa opale mende setamoli pyoo masoo miningi kaiminingi Jutia yuu dokonya kalyamino dupa nisoo pyasakamaimana,” lao pii wasiami-pyaa.

³⁰Pii lao wasiaminoliaka pyoo dupame Banapasapa Solopame Jetusaleme tange isingi akali dupa maiya pena leami-pyaa.