Aposol nup meme 9:13-40

¹³Kembunöŋ keu mewö jii möta meleŋnök, “O Kembu, ambazip gwötpukŋan azi miaŋgö kösohotŋi lök jiget möral. Yaŋön Jerusalem sitinöŋ göhöreŋ könagesöurup sarakŋi mi gwötpuk eŋgum ureim ak eŋgiba malök.

¹⁴Jike nup galöm bohonŋi yeŋön nam köla kukösum waŋgigetka Damaskus siti kiaŋgöreŋ mewöyök nup miyök memamgöra kayök. Ambazip göhö qetki qeta köulukömakzini, yaŋön mönö nini körek pakpak neŋgömemba jöhöm neŋgimamgö mötza.”

¹⁵Mewö meleŋnökmö, Kembunöŋ jii mörök, “Nöŋön azi mi meköm waŋgibiga qetni bisiba nöŋgöra bim qeba malma. Mewö mala gölmeŋi gölmeŋi liliköba Buŋani jim sehiiga Israel aka kian kantri ambazipnöŋ mötme. Keu jakeŋi jakeŋi miaŋgöreŋ örögetka azi kembu gwötpuk yeŋgö jeŋine aŋgota Buŋani jii mötme. Miaŋgöra mönö töndup anöŋ.

¹⁶Yaŋön qetni bisiba miaŋgöra sihimbölö gwötpuk mötma. Nöŋön miaŋgö areŋi kondel waŋgimamgö mötzal.”

¹⁷Mewö jii möta Ananaiasnöŋ anda miri miaŋgö uruŋe öŋgöba böröyahötŋi Solgö nöröpŋe ala jiyök, “Sol alani, köna namŋe kanöŋga Jisösnöŋ asuhum gihiyöhi, Kembu miaŋön mönö melaim niŋgiiga kazal. Göhö jegan kunbuk tohoiga Uŋa Töröŋan urugi kokolak qemawaŋgöra jiiga kazal.”

¹⁸Mewö jiiga miaŋgöreŋök yuai sönuetŋambuk tandök miaŋön jeŋeyök tala et teköi jeŋi tohoyök. Jeŋi tohoiga ui asariiga wahörök. Wahöta jiiga o melun mem waŋgiyök.

¹⁹O melun mem waŋgiiga nene nemba köhöiyök. Solnöŋ köhöiba gwarek yeŋgö sutŋine Damaskus sitinöŋ wehön tosatŋi malök. Mewö.

²⁰Mala miaŋgöreŋök wahöta Juda yeŋgö köuluk miriŋi miriŋi miaŋgöreŋ öŋgöba Jisösgö könaŋi jim asariba ambazip uruŋini kuŋguba kewö jiyök, “Jisösnöŋ mönö Anutugö nahönŋi akza.”

²¹Mewö jii möta körek yeŋön auruba welipköba jiget, “Jerusalem sitinöŋ qet mia qet köulukögeri, azi kiaŋön mi eŋgum ureiba malök me qahö? Mewöŋanök kiaŋgöreŋ kayöhi, mi mönö nini jöhöba neŋguaŋgita jike nup galöm bohonŋi yeŋgö böröŋine al neŋgimamgöra kayök. Miaŋgöra mönö denöwö letota nanŋak Anutugö keu miyök naŋgöba jiza?”

²²Mewö jigetmö, Anutunöŋ Sol ösum-mumu waŋgii kunbuk köhöiba malök. Köhöiba mala Juda ambazip Damaskus sitinöŋ malgeri, yeŋgö uruŋini kuŋguba kewö jiba malök, “Jisösnöŋ ölŋa Anutugöreŋ Amötqeqe Toŋi Kraist akza.” Keu mi jim köhöiba könaŋi kondela maliga yeŋön köŋkuŋ aka keu mi qeapköbingö osiba malget.

²³Silim gwötpuk teköiga miaŋgöreŋ Juda yeŋön tokoba keu nup memba Sol qeget kömumapkö aŋgönaŋi alget.

²⁴Aŋgönaŋi algetmö, miaŋgö buzupŋi mi Solgö kezapŋe gei mörök. Solnöŋ Damaskus siti mosötmamgö aiga miaŋgöreŋ qeget kömumapköra siti kiripo naŋguŋe yaŋgöra suŋgem asak je galöm memba malget.

²⁵Mewö memba malgetmö, gwarekurupŋan suŋgem kunöŋ sakap (misak) ketaŋi memba kösönöŋ jöhöba Sol sakapnöŋ ala siti selgö kinimŋeyök alget geba anök. Mewö.

²⁶Solnöŋ anda Jerusalem sitinöŋ aŋgota Jisösgö gwarekurup yembuk esapköba toroqeyökmö, körek yeŋön Sol gwarek aka malöhi, mi qahö möt narigeraŋgöra aka yaŋgöra keŋgötŋini mötket.

²⁷Keŋgötŋini mötketmö, azi qetŋi Barnabas yaŋön ala ak waŋgiba köyan köla waŋgita aposol yeŋgöreŋ anda kondela kösohotŋi kewö jim asarim eŋgiyök, “Sol azi kiaŋön könanöŋ kaiga Kembunöŋ asuhum waŋgii ehiga keuŋi jii mörök aka könaŋgep Jisösgö qetŋi mi Damaskus sitinöŋ jim asariba köhöikŋanök uru kuŋgum eŋgiba malök.”

²⁸Kösohotŋi mewö jim asarim eŋgiiga yembuk toroqeba Jerusalem siti uruŋe liliköba awösamkakak kinda Kembugö qetŋi aukŋe qeta ambazip urukuŋgukuŋgu köhöikŋi al eŋgiba malök.

²⁹Mi al eŋgiba mala Juda ambazip Grik keu möta malgeri, yembuk eraum möta möndömkösök keu meleŋqeleŋ ahökmö, yeŋön Sol kapaŋ köla qeget kömumapkö mötket.

³⁰Mi esapkögetka alaurupŋan Sol miwikŋaiba waŋgita Sisaria taonöŋ anda kinda melaigetka nanŋök toroqeba ahuahu taonŋi qetŋi Tarsus miaŋgöreŋ anök. Mewö.

³¹Solnöŋ uruŋi meleŋniga miaŋgö andöŋe urumeleŋ könagesö pakpak Judia, Galili aka Samaria prowins dop köla malgeri, yeŋön luai miwikŋaigetka Uŋa Töröŋan i mem köhöiba naŋgöm eŋgiiga malget. Mewö mutulaŋgöba Kembugö keuŋi oŋgitpinbuköra keŋgötŋini möta nup megetka urumeleŋ könagesöŋinan qarim sehiiga malget. Mewö.

³²Pitönöŋ miriŋi miriŋi liliköba Jisösgö könagesö sarakŋi eŋgeka anda mala nalö kunöŋ taon qetŋi Lida miaŋgöreŋ aŋgorök.

³³Aŋgota miaŋgöreŋ azi kun qetŋi Ainias miwikŋaiyök. Likepŋi kömukömuŋi aiga dumnöhök ahöba mali (yara) yambu 8 teköyök.

³⁴Pitönöŋ i miwikŋaiba kewö jiyök, “Ainias, Jisös Kraistnöŋ gi mem ölöwak gihiza. Miaŋgöra mönö wahöta tumbulahöpki qezaköman.” Mewö jiiga miaŋgöreŋök wahörök.

³⁵Mewö asuhuiga Lida aka Saron ambazip pakpak yeŋön i eka uruŋini meleŋda Kembugöreŋ qekötahöget. Mewö.

³⁶Jopa taonöŋ gwarek ambi kun qetŋi Tabita malök. (Qet mi Grik keunöŋ Dorkas, nanine keunöŋ teu, Iŋklis keunöŋ deer.) Yaŋön nalö dop nup ölöpŋi ölöpŋi memba kalem sehisehiŋi mendeŋda ambazip etqeqeŋi bauköm eŋgiba malök.

³⁷Pitönöŋ gölme miaŋgöreŋ mali Tabitanöŋ nalö miaŋgöreŋ kawöl asuhum waŋgii kömuyök. Kömui qamötŋi saŋgoŋda memba miri uruŋi kunöŋ öŋgöba alget.

³⁸Lida mi Jopa taon kösutŋe tarök. Miaŋgöra Pitönöŋ Lida malöhi, gwarek yeŋön mi möta azi yahöt melaim etkigetka anda Pitö kewö qesim waŋgiyohot, “Gi mönö zilaŋ kanöŋga netpuk Jopa taonöŋ anbin.”

³⁹Qesim waŋgiyohotka miaŋgöreŋök amqeba yetpuk anget. Anda aŋgotketka qamöt miri uruŋe ahöyöhaŋgöreŋ waŋgita öŋgöget. Öŋgögetka ambi malö pakpak Pitö liliköba sahöta Dorkasnöŋ yembuk mala opo maluku uhum memba eŋgiyöhi, mi kondel waŋgiget.

⁴⁰Kondel waŋgigetmö, Pitönöŋ jii körek yeŋön gem tekögetka simin köla köuluköyök. Köuluköm teköba qamöt mesohol köla kewö jiyök, “Tabita, mönö wahötnöŋ.” Mewö jiiga jeŋi uba Pitö eka wahöta tarök.