Aposol nup meme 8:6-37

⁶Mia jim asarim eŋgiba aŋgöletot meiga letotketka ambazip kambu yeŋön mi eka keu jiyöhi, mi urumohot aka kezap ala möta aŋgön kölget.

⁷Filipnöŋ nup meiga Anutugö ösumŋan öme gwötpuk mi ambazip uruŋineyök eŋguataŋgöyök. Eŋguataŋgöiga qet bölöbölö qeta kota anget. Nup meiga ambazip sehisehiŋi likepŋini kömukömuŋi aka lokon malgeri, mi ölöwaket.

⁸Mewö aiga Samaria sitinöŋ sösöŋgai öŋgöŋgöŋi asuhuba ahöyök. Mewö.

⁹Sösöŋgai ahöyökmö, Samaria siti miaŋgöreŋ suŋa jinaŋ azi kun qetŋi Saimon malök. Yaŋön (yara) yambu tosatŋi qarösoŋgo amötqeqe nup memba Samaria ambazip welipköm eŋgiiga malget. Mewö malgetka “Azi öŋgöŋgöŋi akzal,” jiba nanŋaŋgöra möri öŋgöyök.

¹⁰Ambazip öŋgöŋgöŋi eretŋi yeŋön körek pakpak Saimongö keugöra kezap ala möta kewö jimalget, “Anutugö ösumŋi qetŋi ‘Kukösum ketaŋi,’ qetzei, miaŋön mönö azi miaŋgö uruŋe geiga ahöza.”

¹¹Saimonöŋ qarösoŋgo amötqeqe nup mi nalö köröpŋi memba ambazip welipköm eŋgiiga malget. Mewö ak eŋgiyöhaŋgöra aka yaŋgöreŋ qekötahöba malget.

¹²Mewö malgetmö, Filipnöŋ kaba Anutugö bemtohoŋe aŋgotpingö Ölöwak Buŋaŋi aka Jisös Kraist qetŋaŋgö könaŋi mi jim asarim eŋgiyök. Mi jim asarim eŋgiiga ambazip gwötpukŋan Buŋa keu möt nariba uruŋini meleŋgetka o melun mem eŋgiyök.

¹³Mewö aketka Saimonöŋ mewöyök keu mi möt nariiga o melun mem waŋgigetka Filipkö kösutŋe kaba mala wuataŋgöyök. Mewö aiga Filipnöŋ aŋgöletot aiwesök ketaŋi ketaŋi mei asuhugetka mi eka welipköba malök. Mewö.

¹⁴Samaria ambazipnöŋ Anutugöreŋ Buŋa keu mewö möt aŋgön kölgeri, miaŋgö buzupŋan sehiba Jerusalem sitinöŋ ani aposol yeŋön mötket. Yeŋön mi möta Pitö aka Jon meköba melaim etkigetka yeŋgöreŋ anohot.

¹⁵Anda aŋgota yeŋgöra aka köuluköba Uŋa Töröŋan uruŋine gemapköra Kembu qesiyohot.

¹⁶Könaŋi kewögöra qesiba köuluköyohot: Yeŋön Kembu Jisösgö qetŋe o melun mem eŋgigetmö, Uŋa Töröŋan yeŋgöreŋök kungö uruŋe qahö gei öne malget.

¹⁷Miaŋgöra köuluköba böröŋiri nöröpŋine alohotka Uŋa Töröŋan uruŋine geiga meget. Mewö.

¹⁸Aposol yetkön böröŋiri ambazip nöröpŋine alohotka Anutunöŋ miaŋgö dop Uŋa Töröŋi yeŋgö uruŋine aliga Saimonöŋ mi eka moneŋ memba kaba kewö jiyök,

¹⁹“Iŋiri mönö kukösum mewöŋi mi nia kun niŋgiyohotka memba böröni denike yeŋgö nöröpŋine almami, Uŋa Töröŋan mönö yeŋgö uruŋine gema.”

²⁰Mewö jiyökmö, Pitönöŋ kewö jim waŋgiyök, “Aek! Yapmakek! Göŋön Anutugö kalemŋi mi moneŋnöŋ söŋgöröŋi memamgöra jizan. Miaŋgöra gi mönö moneŋgabuk könöp sianöŋ geman.

²¹Göhö urugan mönö Anutugö jeŋe qahö diŋgiza. Miaŋgöra gi Buŋa keu kiaŋgö ölŋi kun qahöpmahöp meman.

²²Bölöŋamgeyök mönö urugi meleŋda Kembu köulukönöŋga yaŋön uru mötmötkahö siŋgisöndokŋi mi mosötpawak.

²³Göhö urugan mönö kömbuhiiga wösökömbuk ewö jula kokolak qem gihiza. Siŋgisöndokan mönö kösö ewö köpeim gihiiga qaközan.”

²⁴Pitönöŋ mewö jiiga suŋa jinaŋ azi Saimonöŋ kewö meleŋ etkiyök, “Mönö nöŋgöra aka Kembugö köuluköyohotka keu jizahori, miaŋgö ölŋi kun qahö asuhum niŋgibawak.”

²⁵Aposol yetkön Kembugö Buŋa keu mi siti miaŋgöreŋ naŋgöba jiba jim asariba eŋgömosöta anohot. Könanöŋ anda Samaria prowinsgö miriŋi miriŋi liliköba ambazip uruŋini Ölöwak Buŋa keunöŋ kuŋgum eŋgiba mala Jerusalem sitinöŋ liliŋgöba anohot. Mewö.

²⁶Kembugöreŋ garata kunŋan Filipköra keu kewö jii mörök, “Gi mönö Jerusalem siti mosöta Saut göröken anman. Gölme qararaŋkölkölŋe köna isikŋi (walŋi) Gaza taonöŋ gemakzei, mönö miaŋgöreŋ anman.”

²⁷Mewö jii möta Filipnöŋ amqeba mosöta anök. Anda Afrika azi kunŋan miriŋe liliŋgöba ani könanöŋ miwikŋaiyök. Yaŋön Etiopia kantrigö kandasi qingö jembonŋi öŋgöŋgöŋi aka ambi kembugö jakömbuak miriŋe moneŋ aka inap yuaiŋi galöm köla malök. Sileŋaŋgö yuaigöra aka Juda azi akŋamgö osiyökmö, töndup Anutugö waikŋi memba möpöseimamgöra Jerusalem sitinöŋ kayök.

²⁸Kaba miriŋe liliŋgömamgöra hos karenöŋ öŋgöiga hosnöŋ örögetka könanöŋ anök. Miaŋgöreŋ anda kezapqetok azi Aisaiagö buk kötula oyoŋda tarök.

²⁹Mewö aiga Uŋa Töröŋan Filipköra saŋep ala keu kewö jiyök, “Gi mönö hos kare miaŋgö qöhöröŋe anda mötöteiba anman.”

³⁰Uŋa Töröŋan mewö jiiga miaŋgöreŋök ösumŋan kösutŋe anök. Anda azinöŋ kezapqetok azi Aisaiagö buk miaŋgö Buŋa keuŋi oyoŋni mörök. Möta kewö qesim waŋgiyök, “Keu oyoŋjani, mi ölöp möt asarizan me qahö?”

³¹Qesim waŋgiiga jiyök, “Kunŋan qahö jim asariiga nanak mi denöwö möt asaribileŋak?” Mewö jiiga hos karenöŋ öŋgöiga mohotŋe tarohot.

³²Buŋa Kimbi oyoŋnöhi, mi kewö, “Azinöŋ lama qem yandibingöra memba waŋgitzei, yaŋön mönö miaŋgö dop ösöŋ sororoŋgöba ahöyök. Galömŋan lama moröŋaŋgö jupŋi fitanöŋ mitiiga qöhöröŋe göröŋ qeba tim gwiriŋi qahö kinjawi, yaŋgö numbuŋaŋgö dop mönö qahö waumgöba aŋaŋiyök.

³³Memba et al waŋgigetka kunŋan keu jakeŋe keuŋaŋgö likepŋi qahö naŋgöba jiiga öne jim teköget. Gölmenöŋ malmalŋi mewö waŋgitket. Gwölönarökurupŋi qahö mewö kömuyök. Miaŋgöra kunŋan qet areŋi könaŋgep qahö oyoŋda jima.”

³⁴Jembonöŋ mi oyoŋda Filip kewö qesim waŋgiyök, “Kezapqetok azinöŋ keu mi dagöra jiza? Mi nanŋaŋgöra me azi kungöra jiza? Gi ölöp miaŋgö könaŋi jinöŋ mötpi.”

³⁵Qesim waŋgiiga kezapqetok yeŋgöreŋ Buzup Kimbinöhök könahiba Jisösgö Ölöwak Buŋa mi könaŋambuk jim asarii mörök.

³⁶Mewö eraum möta könanöŋ anda o kösutŋe aŋgorohotka qin jembonŋan jiyök, “Eknöŋ, o töwatŋi ki ahöza. Miaŋgöra gi ölöp o melun mem niŋgiman. Keu kunöŋ aŋgön köl gihiza me qahö?”

³⁷(Mewö jiiga Filipnöŋ jiyök, “Gi keu jibi mötzani, mi urugi jömuk Anutugöreŋ ala möt narizan ewö, mi ölöp akŋam.” Jiiga keu kewö meleŋnök, “Jisös Kraistnöŋ Anutugö Nahönŋi akza, nöŋön mi möt narizal.”