Aposol nup meme 7:22-50

²²Mewö maliga Ijipt yeŋgöreŋ mötmöt aka aiaka pakpak mi kusum waŋgigetka miaŋgö dop Ijipt yeŋgöreŋ mötkutukutu azi ketaŋi ahök. Yaŋön keuŋi aka ahakmemeŋi mi ösum-mumu qakŋe jiba aka malök.

²³“Mosesgö (yara) yambuŋi 40 teköiga miaŋgöreŋ Israel darumunurupŋi yeŋgö prowinsnöŋ anda eŋgekŋamgö mötmöriba keuŋi jöhöba anök.

²⁴Anda Ijipt azinöŋ Israel azi kun yambuk öne töhön aŋgururuk aka öröm ureim ak waŋgiba qeyöhi, mi ehök. Mi eka anda Israel azi mi bauköm waŋgiba andöŋe anda likepŋi meleŋda Ijipt azi mi qeba qem kömuyök.

²⁵Qem kömuiga Anutunöŋ Mosesgöreŋ nariba Israel ambazip farao kiŋgö böröŋeyök meköm eŋgimamgöra kukösum waŋgii kayök. Yeŋön Moses eka könaŋi mewö ölöp möt asarize, mewö mötmöriyökmö, yeŋön mi qahö möt asariba öne tönpin malget.

²⁶“Miri giaŋiiga kunbuk yeŋgöreŋ ani Israel azi yahötŋan auyohotka etkehök. Etkeka esapköba sutŋire luai ahumapkö möta kewö jiyök, ‘Azi yahöt, iŋiri darumuna. Nanŋiri mohot miaŋön mönö wuanöŋgöra mewö ayuhum aŋguzahot?’

²⁷Mewö jiyökmö, azinöŋ alaŋi mem bölim waŋgiyöhaŋön mönö Moses könöpuk utala kewö jim waŋgiyök, ‘Gi mönö neŋgöreŋ galöm aka jimtekötekö azia akzan me? Daŋön mewö kuŋgum gihiiga kinjan?

²⁸Gi uran Ijipt azi qenöŋ kömuyöhi, mönö mewö ni nuŋgumamgöra jizan me?’

²⁹Mewö qesim waŋgiiga keu miaŋgöra aka Ijipt kantri mosöta ölöŋ köla Midian gölmenöŋ anda kiana malök. Mewö mala ambi memba nahönyahötŋi yahöt qiwikŋaim etkii malget.” Mewö.

³⁰Stiwenöŋ keu toroqeba kewö jiyök, “Mewö malgetka (yara) yambu 40 teköiga miaŋgöreŋ Mosesnöŋ gölme qararaŋkölkölŋe liliköba kunduŋi qetŋi Sainai miaŋgö könaŋe mali Suep garata kunŋan asuhuyök. Mi ip köhösö kembaŋe könöp bölam asuhuba qahö jem kutuyöhi, miaŋgöreŋ asuhum waŋgiyök.

³¹Mewö asuhum waŋgiiga tandök miaŋgöra welipköba könaŋi eka möt kutumamgöra kösutŋe ani Anutugöreŋök keu kun kewö kai mörök,

³²‘Nöŋön göhö ambösakonurupki yeŋgö Anutuŋina akzal. Nöŋön Abraham, Aisak, Jeikob yeŋgö Kembuŋina mala kota maljal.’ Mewö jii möta jönömŋi könahiba unduiga miaŋgöreŋ göröken uba ekŋamgö keŋgötŋi mörök.

³³“Keŋgötŋi mörökmö, Kembunöŋ kewö jii mörök, ‘Gölme tiba kinjani, mi gölme kömbukŋa. Miaŋgöra gi mönö köna esugi qeköman!

³⁴Nöŋgö ambazip kambu-urupni Ijipt maljei, mi mulumgöm eŋgigetka sihimbölö qakŋe aum-möriba malje. Nöŋön mi eka maljal. Yeŋön osoŋgom eŋgui sahöt uletzei, nöŋön mi möt teközal. Nöŋön yeŋgö böröŋineyök meköm eŋgimamgöra etzal. Miaŋgöra gi mönö dölki wahöta ki kanöŋga melaim gihibiga Ijipt anman!’ Mewö jiyök.”

³⁵Stiwenöŋ keu toroqeba kewö jiyök, “Yeŋön Moses qaŋ köla köndat waŋgiba kewö jiget, ‘Gi mönö galöm aka jimtekötekö azia akzan me? Daŋön mewö kuŋgum gihiiga kinjan?’ Mewö qaŋ köla jigetmö, Anutunöŋ Moses mi melaim waŋgiiga yeŋgö pom kembuŋina ahök. Suep garatanöŋ ip köhösönöŋ bölam jeyöhaŋgöreŋ asuhum waŋgiyöhi, yaŋön mönö Anutugöreŋ buzup keu mi memba kaba uruŋi kuŋgui mekömekö aziŋina ahök.

³⁶Israel mekömekö aziŋina aka ambazipurupŋi mi aiwesök aŋgöletot könaŋi könaŋi memba Ijipt kantrinöhök meköba eŋguaŋgiriga mosöta Köwet Pisikŋi miaŋgöreŋ kaget. Emu kagetka miaŋgöreŋ aka gölme qararaŋkölkölŋe mewöŋanök toroqeba aiwesök aŋgöletot murutŋi murutŋi mi (yara) yambu 40 miaŋgö uruŋe memba kondeli eka malget.

³⁷Mosesnöŋ pom kembuŋina mala Israel könagesö yeŋgöra kewö jiyök, ‘Anutunöŋ Juda kambu eŋgö sutŋineyök kezapqetok azi kun möwölöhöba kuŋguiga ni ewö akŋa.’

³⁸“Israel yeŋön gölme qararaŋkölkölŋe kaba malgetka pom kembuŋini aka nanine ambösakonurupnini yembuk mala könagesöŋini galöm köl eŋgiyök. Galöm köl eŋgiba kunduŋi qetŋi Sainai miaŋgöreŋ öŋgöi Suep garata kunŋan keu jii möta yambuk malök. Mewö mala Anutunöŋ malmal köhöikŋaŋgö keuŋi sundan jii möta malöhi, yaŋön keu mi miaŋgö dop jiiga neŋgö Buŋaya ahök.

³⁹“Yaŋön pom kembuŋina malökmö, nanine ambösakonini yeŋön keuŋi tem köl waŋgibingö ölan eŋgöhöiga andö qeget. Andö qeba utal waŋgiba uruŋini möŋaiiga Ijipt kantrinöŋ kunbuk liliŋgöbingö sihimŋi mötket.

⁴⁰Mewö möta Mosesgö datŋi Aron yaŋgöra kewö jiget, ‘Mosesnöŋ pom kembunini aka Ijipt kantrinöhök meköba neŋguaŋgiriga kaini, yaŋön kunduŋe öŋgöba tandök denöwö akzawi, nini mi qahö mötzin. Mi qahö mötzinaŋgöra göŋön ölöp tandö lopioŋ menöŋga mieŋön jitŋememenini aketka könaŋine toroqeba anbin.’

⁴¹“Mewö jiba miaŋgöreŋök goul memba miaŋön lopioŋ kun bulmakau moröŋaŋgö tandök meget. Mi memba jöwöwöl memba kaba al waŋgiba lömbuaŋ ohoba yuai böröŋinan megeri, miaŋgö sösöŋgai aka möpöseiget.

⁴²Mewö aketmö, Anutunöŋ mi eka ölan yöhöiga andö eŋgui Suepkö seŋgelau Toŋi waikŋini memba möpöseim eŋgimegöra eŋgömosörök. Kezapqetok azi Amosnöŋ keu kun ohoi Buzup Kimbinöŋ ahözawi, mönö miaŋgö dop kewö aket, ‘O Israel ambazip, iŋini gölme qararaŋkölkölŋe kaba (yara) yambu 40:gö dop mala nalö miaŋgöreŋ sömbup jöwöwöl ohoba naluk tosatŋi memba kaba niŋgiba malget me qahö?

⁴³Mi qahöpmö, eŋön mönö bem qetŋi Molok yaŋgö opo seri koumŋi mi aŋguget aka bem qetŋi Refan yaŋgöreŋ seŋgelau imutŋi mi aŋguba kaba malget. Eŋön imut lopioŋ mi waikŋiri memba möpöseim etkibingö meget buŋaŋina ahök. Miaŋgöra aka nöŋön mönö iŋini közöl eŋgibi kerökurupŋinan kaba eŋguaŋgitketka anda mala köröwen Babilon kantrigö andöŋe öŋgöba malme!’” Mewö.

⁴⁴“Ambösakonurupnini yeŋön gölme qararaŋkölkölŋe kaba mala Anutugö dangunuŋi kuŋguba opo seri jike memba aŋguba malget. Mi memba aŋguba Anutunöŋ jikeŋi memegöra Moses jim kutum waŋgiba söpsöp imutŋi kondel waŋgii ehöhi, mönö miaŋgö dop meget kinök.

⁴⁵Mosesnöŋ ambösakonurupnini galöm köl eŋgiiga yeŋön opo seri jike mi aŋguba malget. Könaŋgep Josuanöŋ wahöta galöm köl eŋgii gwölönarökurupŋinan jike mi buŋa qem aŋguba toroqeba kaba mala kantri ki kaŋgotket. Kantri ki kaŋgotketka Anutunöŋ gölme toŋi kambuŋi kambuŋi eŋguataŋgöi angetka gölmeŋini aŋgön köla meget. Memba tata malgetka kiŋ Deiwidnöŋ asuhuyök.

⁴⁶“Yaŋön asuhuba Anutu jemesoholŋe kalem möriamŋi miwikŋaiba kewö qesim waŋgiyök, ‘Anutu Jeikobkö bemŋi, göŋön ölöp jinöŋga nöŋön jim kutubi nini göhöra jöwöwöl jike bohonŋi membin.’

⁴⁷Mewö qesim waŋgiyökmö, Solomonöŋ jiiga Anutugöra jöwöwöl jike meget.

⁴⁸Mi megetmö, Öŋgöŋgöŋi Ketaŋi yaŋön azinöŋ miri böröŋinan megeri, miaŋgöreŋ qahö malja. Miaŋgö keuŋi kezapqetok azi kunŋan kewö ohoi ahöza,

⁴⁹‘Kembunöŋ jiza: Nöŋgöreŋ jakömbuak dum tatatni mi Suepnöŋ ahöiga gölme mi könanaŋgö döpŋi aiga miaŋgöreŋ tiba tatzal. Iŋini mönö nöŋgöra miri tandökŋi denöwö megetka dop kölbawak? Me miri denikeaŋgöreŋ miwikŋaim niŋgigetka miaŋgöreŋ öŋgöba luhut memba malbileŋak?

⁵⁰Yuai pakpak mi mönö nanak nani börönan miwikŋaim eŋgial mi mötze.’” Mewö.