Aposol nup meme 5:13-39

¹³Mewö tokoba malgetka ambazip tosatŋan keŋgötŋini möta ziriŋziriŋ aketka kunŋan totokoŋine qahö öŋgöyök. Mewö qahöpmö, ambazip kambu yeŋön göda gwötpuk qem eŋgiba malget.

¹⁴Mewö tokoba malgetmö, töndup ambazip sehisehiŋi yeŋön kambuŋini toroqem eŋgiba malget. Azi aka ambi kambuŋi kambuŋi yeŋön Jisös möt nariba uruŋini meleŋgetka kambuŋinan qariba sehiyök.

¹⁵Aposol yeŋön nup mewö megetka ambazip sehisehiŋan ölöwaket. Mewö ölöwakeraŋgöra aka tosatŋan kawöl ambazip eŋguaŋgita kululu köla aŋguba köna göraŋe mewöyök dum möhamgöba möki tumbula miaŋgöreŋ al eŋgiba kewö jiget, “Pitönöŋ kaba neŋgoŋgitmawi, imutimutŋan mönö nalö miaŋgöreŋ yeŋgöreŋök kungö qakŋe öŋgöi ölöwakawak!”

¹⁶Mewöyök taon aka miri Jerusalem siti liliköba tat anjei, mieŋgöreŋök ambazip kambu gwötpukŋan öröba kaget. Mewö kaba ambazip kawöl eŋgöhöyöhi aka ömenöŋ töŋöt memba kölköljiŋjiŋ ak eŋgigeri, mi eŋguaŋgita kaba kaŋgotket. Kaŋgotketka körek yeŋön ölöwaket. Mewö.

¹⁷Mewö aka malgetka jike nup galöm bohonŋan aka yaŋgö suŋgurumurupŋi Sadyusi (Jike nupkö kapaŋkölköl) pati naŋgöm waŋgigeri, körek yeŋgö irimŋini seholiiga urupik aket.

¹⁸Urupik aka aposol eŋgömemba jöhöba gawmangö kösö mire al eŋgiget.

¹⁹Al eŋgigetmö, suŋgem miaŋgöreŋ ahögetka Kembugöreŋ garata kunöŋ kösö miri naŋguŋi öröba eŋguaŋgita yaigep eta kewö jiyök,

²⁰“Mötket! Iŋini mönö anda jöwöwöl jikenöŋ öŋgöba ambazip jeŋine kinda malmal dölökŋaŋgö könaŋi pakpak aukŋe jigetka mötme.”

²¹Mewö jii möta miri giaŋiiga jöwöwöl jikenöŋ öŋgöba kinda Buŋa keu kusum eŋgiget. Mewö kinda kusum eŋgigetka jike nup galöm bohonŋi aka alaurupŋan naŋgöm waŋgigeri, yeŋön aŋgota jike kaunsöl kambu aka Israel jitŋememeurup köl öröm eŋgigetka mohotŋe tokoget. Tokoba kinda opotöröp tosatŋi aposol eŋguaŋgitpingö melaim eŋgigetka kösö mire anget.

²²Angetmö, i miaŋgöreŋ qahö miwikŋaim eŋgiba öne liliŋgöba kösohotŋini kewö alget,

²³“Nini ölŋa kösö mire aŋgota naŋguŋi köhöikŋi kötökŋi kölget kini wahip azinöŋ naŋgunöŋ kingetka ehin. Mi ehinmö, naŋguŋi öröba öŋgöba miaŋgöreŋ azi kun qahö miwikŋaizin.”

²⁴Mewö jigetka jikegö kiripo galöm bohonŋi aka jike nup galöm bohonŋi yeŋön keu mi möta uruŋini lalalulu siksauk aiga jiget, “Opopoŋ! Merak mewö asuhuba könaŋgep kunbuk supapköiga denöwö akapuk!”

²⁵Mewö jigetka kunŋan kota kewö jii mötket, “Mötket, azi kösö mire al eŋgigeri, yeŋön mönö jöwöwöl jikenöŋ kinda ambazip Buŋa keu kusum eŋgize!”

²⁶Mewö jii mötketka jikegö kiripo galöm bohonŋan opotöröp eŋgömeiga anget. Anda “Ambazipnöŋ köt gila neŋgubepuk!” jiba keŋgötŋini möta lolonŋanök jöwöwöl jikenöŋ öŋgöba aposol eŋguaŋgita kaget.

²⁷Mewö eŋguaŋgita kaba jike kaunsöl kambu yeŋgö jeŋine alget kingetka jike nup galöm bohonŋan kewö qesim eŋgiyök,

²⁸“Iŋini Jisösgö qetŋe keu kun kude kusum eŋgime! Neŋön mewö jiba soŋgo köhöikŋi al eŋgiinmö, keu miaŋgö ölŋan mönö denöwö asuhuyök? Eŋön mönö toroqeba kusum eŋgiba mala Jerusalem siti ki Jisösgö keunöŋ kokolak qegetka maljin. Aiga azi miaŋön kömumba sepŋi mokoiga eŋön neŋgöra kewö jimakze, ‘Yaŋgö keuŋan mönö Juda neŋgö qakŋine öŋgöyöha ahöza.’”

²⁹Mewö jiyökmö, Pitö aka aposol tosatŋan kewö meleŋget, “Neŋön ambazip eŋgö jimkutukutuŋini tem kölbingöra aka Anutugöreŋ keu andö qeinga qahö dop kölma. Qahö!

³⁰Anutunöŋ nanine ambösakonurupninaŋgö bemŋina akza. Iŋini Jisös ip kembaŋe möndöba qegetka kömuyökmö, Anutunöŋ i mem gulii wahörök.

³¹Anutunöŋ i mem guliba waŋgita öŋgöi nanŋi böröŋi ölŋe ali tatza. Euyaŋgöreŋ tari Anutunöŋ siŋgisöndoknini mosöt neŋgimamgöra kuŋgui Pom Kembunini aka Amötqeqe Tonini akza. Mewö aka Israel könagesö urumeleŋ ak neŋgimamgö mötza.

³²Nini yuai mi eka keu pakpak mi naŋgöba jiba dangunuŋi aka kinjin. Uŋa Töröŋan mewöyök keu mi naŋgöba jimakza. Anutunöŋ Uŋa Töröŋi ambazip jitŋi tem köl waŋgimakzei, mönö yeŋgö uruŋine ala buŋa qem eŋgiza.”

³³Pitönöŋ keu mewö jiiga jike kaunsöl kambu yeŋön mötketka uruŋini sounöŋ qesiŋqesiŋ ewö qesiŋnök. Qesiŋniga uruŋini könöp jeiga aposol eŋguget kömumegö mötket. Mewö.

³⁴Mewö mötketmö, Farisi (Köna keugö kapaŋkölköl) azi kun qetŋi Gamaliel yaŋön jike kaunsöl kambu yeŋgö sutŋine tarök. Yaŋön Köna keugö böhi azia mali ambazip pakpak göda qem waŋgigetka jitŋememeŋina ahök. Mewö aka wahöta aposol eŋguaŋgitketka yaigepŋe geba borom kun mambötmegöra jim kutuyök.

³⁵Mewö jim kutui gegetka jitŋememe alaurupŋi kewö jii mötket, “Israel aziurup, iŋini azi ki denöwö ak eŋgibeak, miaŋgöra mönö ölöpŋanök galöm mem aŋgume.

³⁶Mutuk emune azi kun qetŋi Teudas yaŋön wahöta ‘Nöŋön ketaŋamŋina akzal,’ jiiga merak (yara) yambu tosatŋi teköi maljin. Teudasnöŋ mewö jiiga azi 400:gö dop yambuk öröröŋ jöhöba mindiriba malgetmö, kunŋan qei kömui tosatŋan aziurupŋi imbi köl waŋgigeri, mi kuŋgum eŋgigetka buratigetka qeburuŋinan pömsöm qeba qahöwahök.

³⁷“Yaŋgö andöŋe Galili azi kun qetŋi Judas asuhuyök. Yaŋön takis memegöra ambazip qetŋini ohoba areŋgögeri, nalö miaŋgöreŋ asuhuyök. Asuhuba ambazip mölöwörim eŋgiiga karim akŋegöra suŋgurum alabaukurupŋi aket. Mewö aketmö, i mewöyök qegetka kömuyök aka tosatŋan suŋgurumurupŋi imbi köl waŋgigeri, mi kuŋgum eŋgigetka buratiget.

³⁸Mewö aiga nöŋön kewö jibi mötket: Iŋini mönö azi kieŋgö sileŋine yuai laŋ kude akŋe. Yeŋön nup ki megetka qeburuŋ ahuzawi, mi gölme ambazipkö mötmöt areŋineyök ahuza ewö, mi mönö sohoba pömsöm qeba qahöwakŋa. Miaŋgöra i mönö eŋgömosötketka etme.

³⁹Mi qahöwakŋapmö, Anutugö mötmöt areŋnöhök ahubawak ewö, eŋön mönö qeburuŋ mi jöhöbingö osime. Iŋini Anutu nanŋi qetala tuarenjoŋ ak waŋgiba malbepuk. Nanŋini könaŋini mewö miwikŋaibepuköra mönö galömŋini mem aŋgume!”