Aposol nup meme 4:9-36

⁹Niri lokon azi denöwö alabauk ak waŋgiziga könaŋi guliba ölöwahök, merak mewö qesim netkize.

¹⁰Miaŋgöra miaŋgö likepŋi mi ölöp jibiga iŋini aka Israel ambazip könagesö pakpak mötme. Eŋön Nazaret azi Jisös, Amötqeqe Tonini maripomnöŋ qegetmö, Anutunöŋ i mem gulii kömupnöhök wahörök. Jisös qetŋaŋgö ösumŋan mönö azi ki möhamgöiga eŋgö jeŋine ölöwaka kinja.

¹¹Keu kun kewö, ‘Miri meme azinöŋ köt tandö kun andö qeba mosötketmö, Anutunöŋ mi aliga ain tandö kömbönaŋi bohonŋi akza.’ Ain tandö bohonŋi mi Jisös.

¹²“Jisös mohotnöŋ mönö amöt qem neŋgiza. Qet kun köuluköinga mi osimemö, Jisösgö qetŋan mönö dop kölja. Anutunöŋ qet kun Suepkö bapŋe qahö neŋgiiga ahöza. Qahö! Qet mohot mi qeta letota Suepkö buŋaya akin.”

¹³Mewö jim teköiga tandökŋiri eka kewö jiget, “Azi yahöt kietkön mötmöt mire qahö öŋgöba töndup keu köhöikŋi köhöikŋi jiba awösamkakak kinda suahö ewö akzahot.” Mewö jiba köŋkuŋ aka welipköba könaŋiri möt kutuba jiget, “Alakŋa! Azi yahöt mietkön mönö Jisösbuk mala letorohot.”

¹⁴Könaŋiri möt kutuba jiba lokon azinöŋ ölöwaka yetpuk kinöhi, mi eka keuŋiri qeapköbingö osiget.

¹⁵Mi osiba jike kaunsöl kambu eŋgömosöta yaigep gemahotkö jim kutuget geyohotka nanŋinök keu jaruba goro aket.

¹⁶Goro aka jiget, “Nini azi yahöt ki mönö denöwö ak etkibinto? Yetkön jim kutuyohotka aŋgöletot qainŋi kun asuhuyöhi, mi Jerusalem körek pakpak yeŋön möt teköze aka nini mi mewöyök qaŋ kölbingö osizin.

¹⁷Mi osizinmö, miaŋgö keuŋi ambazip sutŋine kunbuk sehiba anbapuköra mönö ölöp kewö jim kutum etkiinga dop kölma, ‘Iŋiri mönö Jisösgö qetnöŋ keu kunbuk kude jimahot.’ Mewö jiba köhöikŋanök jim qetal etkiinga sörauyohotka kunŋan kun mi qahö möri teköma.”

¹⁸Mewö jim jöhöba etkoholget öŋgöyohotka kewö jim kutum etkiget, “Iŋiri mönö Jisösgö qetnöŋ keu kun kude toroqeba jiba ambazip kusum eŋgimahot.” Mewö jiba soŋgo köhöikŋi al etkiget.

¹⁹Mewö jim kutum etkigetmö, Pitö Jon yetkön meleŋda kewö jiyohot, “Netkön eŋgö jimkutukutuŋini tem kölbitköra Anutugöreŋ keu memba et aljiga omaŋi akapuk. Mi Anutugö jemesoholŋe dop kölja me qahöwi, mi mönö nanŋinak kewöta jiba jöhöme!

²⁰Mewö me mewö jiba jöhöbeakmö, netkön yuai eka möriri, mi köyatiba keu bök malbiraŋgö dop qahö.”

²¹Mewö jiyohot mötketka ambazip körekŋan aŋgöletot asuhuyöhi, miaŋgöra Anutu möpöseiget. Mewö möpöseigeraŋgöra aka “Likepŋi denöwö ak etkibinak?” jiba köna kun qahö miwikŋaiget. Qahö miwikŋaiba galöm meme keu köhöiba jim etkiba etkömosötketka erohot.

²²Aŋgöletot asuhuiga lokon azi ölöwahöhi, mi (yara) yambuŋi 40 lök oŋgita malök. Miaŋgöra mönö Anutu gwötpuk möpöseiba malget. Mewö.

²³Jike nup galöm bohonŋi aka jitŋememe yeŋön Pitö Jon galöm meme keu jim etkiba etkömosötketka nanŋiri alaurupŋiri yeŋgöreŋ liliŋgöba anohot. Anda keu pakpak jigeri, mi jiyohotka mötket.

²⁴Mi jiyohotka möta urumohot aka uruŋini qezaköba jölŋini memba wahöta Anutu kewö köuluköm waŋgiget, “O Kembu öŋgöŋgöŋi ketaŋi, göŋön Suep, gölme, köwet aka yuai pakpak mieŋgöreŋ ahözawi, mi miwikŋaim eŋgiba Toŋina akzan.

²⁵Göŋön mönöwök nangi Uŋa Töröŋi melainöŋ eta nup azigi Deiwid, neŋgö ambönini yaŋgö numbuŋe keugi ali göhö jitki memba kewö jiyök, ‘Urumeleŋgö kopa yeŋön mönö wuanöŋgöra göjuŋi göjuŋi memakze? Kantriŋi kantriŋi yeŋön mönö denöwögöra aka mötmöt omaŋi omaŋi mötmörimakze?

²⁶Gölmegö kiŋ kembuŋi kembuŋi yeŋön gölmeŋinaŋgö dop wahörakze. Pom jembonŋi jembonŋi yeŋön mindiriba tokomakze. Mewö qeburuŋ yöhöi Kembu aka yaŋgö Amötqeqe Toŋi qetal etkimakze.’

²⁷Ölŋa, keu miaŋgö dop siti kiaŋgöreŋ asuhuyök. Gi Nahöngi Töröŋi Jisös kuŋgunöŋga Amötqeqe Tonina akza. Yaŋön asuhuiga azi kembu yahöt Herod aka Pontius Pailöt yetkön Rom gawman galöm aka nanine Israel isikurupnini yembuk mindiriba totoko ala tuarenjoŋ ak waŋgiget.

²⁸Gi nangak ösumgi aka jitkahö dop yaŋgöra yuai asuhumapkö keuŋi jiba qeljiŋe jöhöba areŋgönöŋ. Yeŋön yuai mi ak waŋgigetka keu areŋ pakpak mi mewö ölŋambuk ahök.

²⁹“O Kembu, nini gi welen qem gihiinga merak galöm meme keu neŋgizei, gi mönö mi eka naŋgöm neŋginöŋga ölöp göhö Buŋa keugi suahö ewö awösamkakak kinda jiba malbin.

³⁰Göŋön mönö börögi surunöŋga kawöl ambazip mi Nahöngi Töröŋi Jisösgö qet ösumŋe ölöwakŋe aka aŋgöletot aiwesök murutŋi murutŋi asuhumakŋe. Keu mi ölŋa.”

³¹Mewö köulukögetka miri tokoba tatkeri, gölme mi memenjaliba utuköiga Uŋa Töröŋan körek pakpak uruŋini kokolak qeiga anda suahö ewö awösamkakak kinda Anutugö Buŋa keu jiba malget. Mewö.

³²Urumeleŋ kambu ketaŋi yeŋön urumohot aka mötmöt mohot aka malget. Yuai pakpak ahöm eŋgiyöhi, mi göhöreŋök me nöŋgöreŋök, mewö qahö jigetmö, yuai pakpakŋini mi mutulaŋgöba mohot aiga malget.

³³Mewö malgetka Anutugö ösumŋan eŋgualöŋniga köhöigetka aposol yeŋön jitŋini memba dangunu ewö kinda Kembu Jisösnöŋ kömupnöhök guliba wahöröhi, keu mi naŋgöba jiba malget. Mewö malgetka Anutunöŋ kalem möriamŋi ketaŋi mokom eŋgiiga ambazipnöŋ göda qem eŋgiget.

³⁴Mewö malgetka miaŋgö dop sutŋine kunŋan yuai kungöra qahö mözöröŋgöba osiba malök. Körek pakpak nene nupŋi nupŋi aka miriŋi miriŋi mieŋgö toŋi akeri, yeŋön mi bohonŋi memegöra alget. Mewö algetka söŋgöröŋi moneŋ kaiga mi memba kaget.

³⁵Memba kaba aposol yeŋgö böröŋine algetka körek pakpak mözöröŋgöba osigeraŋgö dop mi sutŋine mendeŋda eŋgiba malget.

³⁶Azi kun qetŋi Josef, aposol yeŋön qetŋi Barnabas qetkeri, mi nanine keunöŋ: Uru naŋgönaŋgö azi, yaŋön gölme jölanŋi qetŋi Saiprus miaŋgöreŋ asuhuba qariba jike nup azia (Liwait) malök.