Aposol nup meme 21:15-35

¹⁵Sisaria taonöŋ malin nalö mi teköiga amgöba mözözömgöba eŋgömosöta anda Jerusalem sitinöŋ öŋgöin.

¹⁶Sisaria miaŋgöreŋök gwarek tosatŋan mewöyök neŋgö köinini kaget. Kaget yeŋön kewö jiget, “Iŋini Saiprus azi qetŋi Nason yaŋgö mire ahöba malme.” Mewö jiba neŋguaŋgita yaŋgö mire anin. Nasonöŋ mutuhök uruŋi meleŋda Jisösgö gwarekŋi aka mala korök. Mewö.

¹⁷Neŋön Jerusalem aŋgoringa urumeleŋ alaurup yeŋön neŋgömemba söŋgaiba jölöŋnini jiget.

¹⁸Jölöŋnini jigetka ahöba wahöta Polnöŋ nembuk bisop Jeims ekingö möta anin. Aninga urumeleŋ könagesögö jitŋememe yeŋön körek pakpak miaŋgöreŋ kaŋgota tatket.

¹⁹Tatketka Polnöŋ jölöŋini jiba kösohotŋi alök. Anutunöŋ köiput aka nam köl neŋgiiga kian kantri yeŋgö sutŋine anda liliköba misin nup meinga ölŋi ahuyöhi, miaŋgö kösohotŋi mesiŋda mohot mohot mi körekŋanök jii mötket.

²⁰Mi jii möta Anutu möpöseigetka azi ipŋi kunŋan kewö jiyök, “Pol alanini, Juda ambazip tausenŋi tausenŋi yeŋön Jisös möt nariba uruŋini meleŋda töndup körek pakpak toroqeba Mosesgö Köna keu mi törörök wuataŋgöbingö kapaŋ kölje.

²¹Mewö kapaŋ köljemö, göhö buzupki mi kewö laŋ jiget mötket, ‘Juda ambazip deŋda kian kantri yeŋgö sutŋine anda maljei, göŋön liliköba i kewö kusum eŋgiba maljan, jimakze, “Iŋini mönö Mosesgö köna keu andö qeba Anutugöreŋ aiwesök mi azi morosepsep sileŋine kude yandime aka Juda ahakmeme tosatŋi mi kude wuataŋgöme.” ’

²²“Mi jimakzeaŋgöra aka göŋön kazani, yeŋön mi möta miaŋgöreŋök öröba kambu ketaŋi köla tokobeak. Miaŋgöra nini waimanjat möta mönö denöwö ahinga dop kölbawak?

²³Miaŋgöra neŋön dölki keu göhöra jibini, göŋön mönö miaŋgö dop akŋan. Azi 4:ŋan yuai akingö keuŋini Anutugöreŋ jiba jöjöpaŋ keunöŋ jöhöget.

²⁴Mi keunöŋ jöhögetmö, moneŋgöra osiba mamböta sutnine ki malje. Miaŋgöra göŋön mönö i eŋgömemba yembuk köl könjörat ak aŋguba yeŋgöra aka naluk alnöŋga dop köli ölöp nöröp jupŋini mitigetka keuŋini köhöima. Göŋön mewö aka Mosesgö Köna keu tem köla wuataŋgöba maljani, körek pakpak göhö könaŋamgi mi törörök eka möt asarime. Mi möt asariba göhöra keu jiget mötkeri, mi ölŋi kun qahö miwikŋaigetka omaŋi aiga kömuma.

²⁵Göhöreŋ keu kömumapmö, kian kantri yeŋön Jisös möt nariba uruŋini meleŋgeri, neŋön yeŋgöra keu kewö jöhöba kimbi ohoba alin anök, ‘Sömbup busuŋi bem lopioŋ yeŋgö naluk buŋa qeba könaŋine algetka ösumŋinan walöŋnöhi, mi mönö kude neme. Mewöyök sep me sömbup jölŋini qeqeŋi miaŋgö busuŋi mi kude neme. Serowilin kude akŋe. Yuai kanjamŋambuk 4 mi mönö mosöta andö qegetka dop kölma.’”

²⁶Jitŋememe yeŋön mewö jigetka Polnöŋ azi 4 mi eŋgömemba ahöba wahöta yembuk köl könjörat ak aŋguget. Ak aŋgugetka jöwöwöl jikenöŋ öŋgöba azi mohot mohot eŋgöra naluk ala jöwöwöl ohogetka köl könjörat nalöŋini tekömawi, miaŋgö nalö buzupŋi jii mötket. Mewö.

²⁷Polnöŋ mi jii mötketmö, silim 7 mi tekömamgö aiga Juda tosatŋi Eisia prowinsnöhök kageri, yeŋön Pol jöwöwöl jikenöŋ öŋgöi eket. Eka ambazip kambu körek uruŋini kuŋgum eŋgiget wahöri Pol qeraköba meget.

²⁸Qeraköba memba kewö qetket, “Israel ambazip, mönö bauköm neŋgiget! Azi kiaŋön mönö gölmeŋi gölmeŋi liliköba miri dop kusum eŋgiba uruŋini kewö kuŋgum eŋgimakza: Iŋini pakpak mönö Israel ambazip kambu qetala mem bölim neŋgime. Nanine Köna keu mosöta jöwöwöl jikenine laŋ öŋgöba iwilele aka malme. Mewö kusum eŋgiba malök aka merak Grik azi mi tok waŋgita jöwöwöl jikenöŋ öŋgöiga miri kömbukŋi kiaŋön mönö töwiba kölköljiŋjiŋambuk akapuk.”

²⁹Mi kewögöra qetket: Efesus azi Trofimus yaŋön mutuk siti könanöŋ Polbuk ani etkeka kewö mötmöriget: Polnöŋ i waŋgiri mohotŋe jöwöwöl jikenöŋ öŋgöbahotpuk.

³⁰Mewö qetketka ambazipnöŋ eŋololoŋ aka ösumŋinan luluŋda kaba tokoba göjupmajup aketka qeburuŋ ketaŋi yöhöi siti körek dop kölök. Mewö aiga Pol qeraköba jöhöba jöwöwöl jikenöhök öröba yaigep eta miaŋgöreŋök jikegö kiripo naŋguŋi pakpak mi miaŋgöreŋök köla jöhöget.

³¹Pol jöhöba qebingö kapaŋ kölgetka buzupŋi sehiba Rom yarö kambugö suahö galöm bohonŋi yaŋgö kezapŋe keu kewö geiga mörök, “Jerusalem pakpak yeŋön karim aka bim qeze.”

³²Mewö möta miaŋgöreŋök yarö azi kambu tosatŋi suahö galömŋinambuk eŋguaŋgita luhuba yeŋgöreŋ geget. Gegetka i eŋgeka Pol qegeri, mi mosötket.

³³Mosötketka suahö galöm bohonŋan sutŋine anda jim kutuiga Pol memba tapep (muŋgamuŋga) yahötnöŋ jöhöget. Jöhögetka kewö jiba qesim eŋgiyök, “Azi ki niŋia?” aiga “Wania aiga qeze?”

³⁴Qesim eŋgiyökmö, ambazip kambunöhök keu murutŋi murutŋi meleŋda laŋlaŋ qetket. Mewö laŋlaŋ qeta göju megeraŋgöra aka könaŋi törörök mötmamgö osiyök. Mi osiba miaŋgöra jim kutuiga Pol waŋgita yarö azi yeŋgö ain kiripo uruŋe anget.

³⁵Waŋgita angetka ambazip kambu ketaŋi yeŋön könaŋine eŋguataŋgöba kaba kewö qetket, “Mönö qeget kömuma. Yapmakek!” Mewö qetketka yarö azi yeŋgö ain kiripo naŋguŋe aŋgoriga könöpuk anda kaba göjupmajup ketaŋi akeraŋgöra aka gwötpuk lömböriyök. Miaŋgöra yarö azi yeŋön Pol memba aŋguba anget. Mewö.