Aposol nup meme 20:1-13

¹Efesus miaŋgöreŋ göjupmajup miaŋön sörauba teköiga Polnöŋ gwarekurupŋi eŋgoholi kagetka urugö naŋgönaŋgö keu qambaŋ eŋgiba yaizökzök jiba eŋgömosöta Masedonia prowinsnöŋ anök.

²Masedonia anda gölmeŋi gölmeŋi kutuba liliköba miaŋgöreŋ qambaŋ keu gwötpuk jiba mala Grik kantrinöŋ kayök.

³Grik kaba köiŋ karöbut malök. Mi mal teköiga waŋge memba köwet kutuba Siria anmamgö mörök. Mewö mörökmö, Juda jitŋememe yeŋön könanöŋ qebingö aŋgönaŋi algetka kezapŋe gei mörök. Mi möta miaŋgöra Masedonia prowins kutuba gölme köna miriŋe liliŋgömamgö keuŋi uruŋan jöhöyök.

⁴Keuŋi jöhöi suŋgurumurupŋi kewöŋan yambuk anget: Berea azi qetŋi Sopater Pirusgö nahönŋi, Tesalonaika azi qetŋiri Aristarkus aka Sekundus, Derbe azi qetŋi Gaius, Timoti aka Eisia prowinsgö azi qetŋiri Tikikus aka Trofimus.

⁵Yeŋön qeljiŋe Troas anda miaŋgöreŋ neŋgöra mamböta malget.

⁶Troas anda malgetmö, Luk ni aka tosatŋi neŋön beret yistŋi qahöpkö kendon mi Filipai sitinöŋ tarin. Mi tarin teköiga waŋgenöŋ öŋgöinga opo seri öröba möröreŋgögetka luhutnöŋ naŋgöi anda wehön 5 aiga Troas yeŋgöreŋ aŋgorin. Troas aŋgota miaŋgöreŋ wehön 7 toroqeba malin. Mewö.

⁷Wehön 7 malin teköiga Polnöŋ wehön 8 miaŋgöreŋ eŋgömosöta anmamgö mörök. Mi möta suŋgem kondikŋi Sondagie miaŋgöreŋ tokoba Jisös mötmöriba beret mindipköbingöra tarin. Mewö taringa Polnöŋ yembuk eraum möta keuŋi jim köriba mali mali suŋgem bibiŋi ahök.

⁸Nini miri uruŋi kungö qakŋe eu öŋgöba tokoba taringa lambe gwötpukŋan jeba asariget.

⁹Tokoba taringa azi gwabö kun qetŋi Yutikus yaŋön jeŋgenaŋnöŋ tarök. Tari Polnöŋ keu jiba mali möri nalö köriiga gaunŋaŋgö möta ahöba gwörörök öröba könakembayök tala imbiŋi qahö möta miri uruŋi karöbut oŋgita gölmenöŋ geba qeyök. Geba qeiga luhuba geba memba wahöringa kömuyöhi, ehin.

¹⁰Mewö ehinmö, Polnöŋ geba kepölaköba jiyök, “Kunbuk söŋgörö ösum ala guliza. Miaŋgöra kude awöwöliget.”

¹¹Mewö jiba kunbuk eröhaŋgöreŋ öŋgöba beret mindipköba neyök. Nemba yembuk nalö köröpŋi keu jiba mala mala miri giaŋiigun eŋgömosöta könanöŋ anök.

¹²Aniga azi gwabö mi waŋgitketka guliba malöhi, mi eka urukölalep ketaŋi möta anget. Mewö.

¹³Yeŋön angetmö, Polnöŋ nanŋak gölme köna anmamgö möta kewö jim kutum neŋgiyök, “Iŋini mönö qeljiŋe köwet köna miri qetŋi Asos miaŋgöreŋ angetka aitoŋgöba noaŋgitketka waŋgenöŋ öŋgöbin.” Miaŋgöra neŋön mosöta waŋgenöŋ öŋgöinga opo seri öröba möröreŋgögetka luhutnöŋ naŋgöi anda Asos miaŋgöreŋ aŋgorin.