Aposol nup meme 19:19-41

¹⁹Tosatŋan qarösoŋgo amötqeqe memba malgeri, yeŋgöreŋök gwötpukŋan buk papiaŋini memba kaba tokoba ambazip pakpak yeŋgö jeŋine kinda aukŋe könöpnöŋ gilget jeyök. Buk papia mieŋgö söŋgöröŋini oyoŋda mindirigetka mindimindiri jaŋgöŋini mi silwö moneŋ (Kina) 50.000 miaŋgö dop ahök.

²⁰Tandök mewö aketka Kembugö Buŋa keuŋan mönö ösum-mumuŋambuk sehiba köhöiba anök. Mewö.

²¹Yuai pakpak mi asuhum teköiga Uŋa Töröŋan Pol sölölöhöm waŋgii keuŋi jöhöba kewö jiyök, “Ni köwet kutuba Grik kantrigö likepŋi yahöt Masedonia aka Akaia miaŋgöreŋ liliköbi teköiga mosöta Jerusalem sitinöŋ anmam.” Mewö jiba toroqeyök, “Miaŋgöreŋ anda tata Jerusalem mosöta Rom siti mewöŋanök anda ekŋam.”

²²Mewö jiba neŋakŋi yahöt Timoti aka Erastus melaim etkiiga Masedonia anohotka nanŋak toroqeba nalö tosatŋi Eisia prowins uruŋe malök. Mewö.

²³Efesus sitinöŋ Kembugöreŋ köna wuataŋgögetka miaŋgöra nalö miaŋgöreŋ eŋololoŋ göjupmajup keta bölökŋi asuhuyök.

²⁴Silwö nup meme azi kun qetŋi Demitrius yaŋön silwö ohoiga kolkolgöiga qekötahöba bem ambi qetŋi Artemis yaŋgö jöwöwöl jikegö dop imut morömorö memba malök. Mi meiga bohonŋi memba malgetka moneŋ öŋgöŋgöŋi öröi kölköl-örörö alaurupŋan mendeŋda meget.

²⁵Megetka Demitrius aka kambu tosatŋan nup mewöŋi memba malgeri, mi mohotŋe eŋgoholi kaba tokogetka kewö jii mötket, “Azi alaurup, nini nup ki meinga bohonŋi ölöpŋi asuhuba kamakza, mi mötzin.

²⁶Mi mötzinmö, Pol azi miaŋön Efesus kiaŋgöreŋ kaŋgota ambazip uruŋini esiba ki aka Eisia prowins pakpak dop köla ambazip kambuŋi kambuŋi kuŋgum eŋgii jaŋjuŋ akzei, mi nalö kewöŋe ölöp eka mötze. Yaŋön kewö jimakza, ‘Bem börönöŋ memeŋi mi bem ölŋi qahö.’

²⁷“Mewö jiba maliga nini kölköl-örörö nupnini memakzini, miaŋgö qetŋi mem bölii jijiwilit akepukö urulömböt akza. Aka miyöhök qahöpmö, urulömböt kun kewö ahöza: Ambazip pakpak Eisia prowins uruŋe aka gölmeŋi gölmeŋi pakpak miaŋgöreŋ bem ambi öŋgöŋgöŋi Artemis waikŋi memba möpöseimakzei, yaŋgö bem qetbuŋaŋi ketaŋan ayuhuba ösumŋan etpapuk aka jöwöwöl jikeŋaŋgö qetŋan böliba ambazip jeŋine eta omaŋi akapuk. Urulömböt mewö ahöza. Miaŋgöra waimanjat möta keu ki jizal.”

²⁸Demitriusnöŋ mewö jiiga suŋgurum alaurupŋan mi möta irimŋini seholiiga kewö jiba qet gigilahöget, “Efesus neŋgöreŋ Artemis mi öŋgöŋgöŋi!”

²⁹Qet gigilahögetka eŋololoŋ göjupmajup miaŋön sehiba sehiba siti körek dop kölök. Mewö aiga Masedonia azi yahöt qetŋiri Gaius aka Aristarkus Polgö suŋgurumyahötŋi mi qeraköba etkömemba örörahöm etkiba qezakqezak mirinöŋ anda totoko alget.

³⁰Totoko algetka Polnöŋ mewöyök ambazip kambulelembe yeŋgö sutŋine anmamgö mörökmö, urumeleŋ ambazipnöŋ i aŋgön köl waŋgiget.

³¹Eisia prowinsgö galömkölköl azi tosatŋan Polgö alaurupŋi akeri, yeŋön mewöyök kolek ala kewö ulet waŋgiget, “Qezakqezak mirinöŋ totoko aljei, gi mönö nangi miaŋgöreŋ kude kondel eŋgiman.”

³²Totoko algeri, miaŋgöreŋ ambazip gwötpukŋan kinda tokogeraŋgö könaŋi kun qahö mötkeraŋgöra nanŋik nanŋik laŋlaŋ qet gigilahöba siksauk eŋololoŋ ketaŋi megetka sehiba anök.

³³Mewö ani Juda yeŋön azi qetŋi Aleksander kuŋguba naŋgögetka kambu yeŋön öröba köna algetka qaikŋe eu öŋgöba kinök. Öŋgöba kinda ambazip jemesoholŋine keu likepŋi meköba jimamgö möta börö pözöŋ misiba aiwesök mem eŋgiyök.

³⁴Aiwesök mem eŋgiyökmö, Juda azia akzawi, mewö möt kutuba miaŋgöreŋök numbuŋini mindiriba körekŋan könahiba keu kewö qetket, “Efesus neŋgöreŋ Artemis mi öŋgöŋgöŋi!” Mewö qeta mala aua yahötkö dop silata qeta kinget.

³⁵Qeta kingetka siti pomŋan ambazip kambu uruŋine memba eta ali göröŋ algetka kinda kewö jiyök, “Efesus ambazip, nini nanine siti kiaŋgöreŋ Artemis öŋgöŋgöŋi mi möpöseiba maljin. Nini yaŋgöreŋ jöwöwöl jike aka köt imutŋi kömbukŋi Suepnöhök eröhi, mi galöm köla maljin. Keu mi iŋini körek ölöp mötze.

³⁶Mi kunŋan qaŋ kölmawaŋgö dop qahö. Miaŋgöra iŋini mönö uruŋini ösöŋ memba eta ala bönjöŋ malme. Kezapjupjup yuai kun kude akŋe.

³⁷Azi ki jöwöwöl jikenöŋ öŋgöba yuai kun qahö kiom qeba mem böliyohot. Bem ambinini qahö ilit waŋgiyohot. Iŋini töndup i etkuaŋgitketka ki kinjahot.

³⁸“Demitrius aka yaŋgö kölköl-örörö alaurupŋan tosatŋi yembuk aŋgururuk aka keu jim aŋgubeak ewö, kiap mönö ahöze aka keu jakegö totokoŋi totokoŋi mi keu mindiŋgöbingöra alakze. Miaŋgöra mönö ölöp miaŋgöreŋ anda keu jakeŋe al aŋguba aröŋda kingetka dop kölma.

³⁹Iŋini yuai kun toroqeba jibingö mötpeak ewö, siti kiaŋgö toŋan mönö ölöp könagesö öröm eŋgiiga qenjarök sombemnöŋ tokoba keu kewöta jim teköme.

⁴⁰Merak eŋololoŋ göjupmajup ketaŋi ki könaŋi qahöpmö, töndup imbisölöm asuhuzawi, mi Rom gawman yeŋön möta kewö jibepuk, ‘Efesus yeŋön Rom mindimindiri gawman qetala bim karim akze.’ Mewö jiba keu jakeŋe al neŋgibepuk. Miaŋgö urulömbötŋi akza, mi mötzal. Keu jakeŋe al neŋgiba karim kiaŋgö könaŋaŋgöra qesim neŋgibeak ewö, nini mönö likepŋi gagabe köla jibinaŋgö dop qahö mötzin.”

⁴¹Efesus siti pomŋan keu mewö jiba ambazip kambu köndeŋ eŋgiiga sörörauba deŋda anget. Mewö.