Aposol nup meme 18:1-15

¹Yuai mi asuhuiga Polnöŋ Atens siti mosöta Grik siti kun qetŋi Korint miaŋgöreŋ anök.

²Korint anda Juda azi kun qetŋi Aqila miwikŋaiyök. Aqila yaŋön Eisiagö prowinsŋi qetŋi Pontus miaŋgöreŋ ahuba könaŋgep mindimindiri siti Rom anda malök. Miaŋgöreŋ mali sisa kiŋ qetŋi Klodius yaŋön jimkutukutuŋi kewö alök, “Juda ambazip iŋini mönö körek pakpak Rom siti mosöta deŋme.” Mewö jiyöhaŋgöra aka Itali kantri mosöta Grik geba nalö miaŋgöreŋ Korint kaŋgorök. Kaŋgoriga Polnöŋ miwikŋaiba i aka anömŋi qetŋi Prisila yetköreŋ anök.

³Malmalŋiri naŋgöbitköra opo koumŋi koumŋi meyohot. Polnöŋ mewöyök opo seri koum meme azia. Miaŋgöra yetköreŋ ani nupŋini öröröŋ ahöiga yetpuk mala ahöba opo seri koum nup mohotŋe meget.

⁴Memba malgetka Sabat kendon dop köuluk mire öŋgöba Juda aka Grik ambazip yembuk Jisösgö könaŋi erauba mesiŋda uruŋini meleŋmegöra kuŋgum eŋgiba malök.

⁵Kuŋguba mali alayahötŋi Sailas Timoti yetkön Masedonia prowinsnöhök kaŋgorohotka Jisösgö Buŋaŋi nalö dop jim asariba malök. Mewö mala Jisösnöŋ Amötqeqe Toŋi Kraist akzawi, miaŋgö könaŋi aukŋe kondela keu miaŋön Juda ambazip uruŋini kuŋguyök.

⁶Uruŋini kuŋguyökmö, Pol tuarenjoŋ aka uruqeqe keu töhöreŋ jim waŋgigetka böröŋan jeŋine kuŋguba sölburamŋi tönjörari eriga kewö jiyök, “Nöŋön köpösihit qahö akiga iŋini ayuhuba miaŋgö likepŋi mi mönö nöŋgö qakne albingö osime. Mi nanŋinak bisime. Iŋini Buŋa keu qetalgetka nöŋön ölöp eŋgömosöta merak kinda öŋgömawi, miaŋgöreŋ kian kantri ambazip yeŋgöreŋ eleŋda anmam.”

⁷Mewö jiba eŋgömosöta köuluk miri göraŋe azi kun qetŋi Titius Jastus yaŋgö mire öŋgöba malök. Yaŋön Juda azia qahöpmö, töndup Anutugö waikŋi memba möpöseiba malök.

⁸Göraŋe anökmö, köuluk mirigö galöm qetŋi Krispus aka yaŋgö anöm-moröŋi yeŋön körek uruŋini meleŋda Kembu möt nariget. Mewöŋanök Korint ambazip tosatŋi Polgöreŋ keu mötkeri, yeŋgöreŋök gwötpukŋan Jisös möt nariba uruŋini meleŋgetka o melun mem eŋgiget.

⁹Polnöŋ suŋgem kunöŋ gaun ahöiga Kembunöŋ kutum wasöriga imut ehiga kewö jii mörök, “Gi keŋgötki kude mötmanmö, Buŋa keu mönö köhöiba jiba malman.

¹⁰Siti kiaŋgöreŋ ambazip kambu gwötpuk yeŋön nöŋgö buŋaya akze. Miaŋgöra nöŋön göbuk malbiga kunŋan yuai kun qahö könahiba mem bölim gihima.”

¹¹Mewögöra Polnöŋ nalöŋi mem köriba yeŋgö sutŋine (yara) yambu mohot aka köiŋ 6 miaŋgö dop mala Anutugöreŋ Buŋa keu kusum eŋgimalök.

¹²Kusum eŋgimalökmö, Rom yeŋön azi Galio kuŋgugetka Akaia prowinsgö kiap gawönö malöhi, nalö miaŋgöreŋ Juda jitŋememe yeŋön mindiriba Pol tuarenjoŋ ak waŋgiba öröba keu jakeŋe al waŋgiget.

¹³Keu kewögöra al waŋgiget, “Azi kiaŋön ambazip eŋololoŋ ak eŋgimakza. Rom yeŋön jimkutukutuŋini alget ahözawi, yaŋön ambazip köna mi qösököba Anutugö waikŋi memba möpöseimegöra uru kuŋgum neŋgimakza.”

¹⁴Keu mewö sileŋe ala jigetka Polnöŋ keu jimamgö aiga kiap gawönö Galio yaŋön Juda ambazip yeŋgöra jiyök, “Juda ambazip eŋgö sutŋine kunŋan azi qei kömumbawak me pinjit bölöŋi kötökŋi kun akawak ewö, miaŋgöra nöŋön ölöp keuŋini kezap ala mötpileŋak.

¹⁵Mimö, eŋgö sutŋine mötnaripkö keu asuhuiga qet murutŋi murutŋi qeta aŋgururuk aka jimkutukutuŋini denöwö akŋei, mi mönö nanŋini lömbötŋina. Nöŋön yuai mewöŋi mi kewöta jim tekömamaŋgö dop qahö akzal.”