Aposol nup meme 16:16-36

¹⁶Nini nalö kunöŋ köuluk rowoŋqeqeŋe gebingö köna namŋe aninga welenqeqe ambi kunöŋ miwikŋaim neŋgiyök. Ambi mi andö lawönŋambuk mala ambazip könaŋini aukŋe jim miwikŋaimamgö mörök. Mi möta kezapqetok keu asambötŋi jim miwikŋaiba mewö miaŋön moneŋ yuai mi gwötpuk öröba mali tourupŋi yeŋgö böröŋine geyök.

¹⁷Yaŋön Pol aka nini neŋgeka neŋgö andönine kaba kewö jiba qerök, “Azi kieŋön Anutu öŋgöŋgöŋi ketaŋaŋgö welenŋi qeba Suepkö buŋaya akingö könaŋi jim asarim eŋgimakze.”

¹⁸Mewö jiba sömaŋi gwötpuk qeta malök. Mi malökmö, Polnöŋ tököba miaŋgöra sihimbölö mörök. Mi möta nalö kunöŋ liliŋgöba ömeŋi kewö jim kutum waŋgiyök, “Ni Jisös Kraistkö qetŋe jizal: Gi mönö ambi kiaŋgö uruŋeyök kota anöŋ.” Mewö jim kutum waŋgii miaŋgöreŋök kota mosöta anök.

¹⁹Mi anökmö, ambi tourupŋan mi möta moneŋ yuai öröbingö könaŋi jöpköyöhi, mi miwikŋaiba irimŋini seholiyök. Irimŋini seholiiga Pol Sailas etkömemba jöhöba maket sombemŋe öröm etkiba galöm azi yeŋgö jeŋine etkuaŋgita anget.

²⁰Etkuaŋgita anda keu jake galöm yeŋgö jeŋine al etkiba sileŋire keu kewö ala jiget, “Nini siti kiaŋgöreŋ luainöŋ maljinmö, azi yahöt kietkön kaba eŋololoŋ ak neŋgimakzahot. Yetkön Juda azia akzahot

²¹aka Juda silikŋini kusum neŋgimakzahot. Nini Rom mindimindiri kantrigö tohoŋ toŋi akzin. Miaŋgöra nini silikŋini mi ölöp qahö möt aŋgön kölbin. Mi memba wuataŋgöbingö soŋgo ahöi osizin.”

²²Sileŋire keu mewö aka jim etkigetka ambazip kambu yeŋön mewöyök wahöta mindiriba qetal etkim köhöiget. Qetal etkim köhöigetka galöm yeŋön kuŋgum eŋgigetka sileötaŋiri öröba munjukunjuratket aka jim kutum eŋgigetka arawambu kömbinöŋ etkuget.

²³Gwötpuk etkum teköba kösö mire al etkibingö etkuaŋgita wahibuknöŋ ölöpŋanök galöm mem etkimapkö jim kutum waŋgiget.

²⁴Mewö jim kutum waŋgigetka möta etkömemba kösö miri bibiŋe miri uruŋi kunöŋ anda könayahötŋiri ip özöpaŋ sutŋire ala kösönöŋ jöhöba miri uruŋi miaŋgö naŋguŋi yahöt mi ki misigetka tarohot. Mewö.

²⁵Pol Sailas yetkön mewö tarohot. Tata mala suŋgem bibiŋi aiga miaŋgöreŋ Anutu köuluköba liŋet köla möpöseiba malohotka kösö azi körekŋan kezap ala mötket.

²⁶Mewö aketka miaŋgöreŋök wölaŋ kenöŋ (naŋ) ketaŋi giliga kösö mirigö tandöŋi pakpak anjaŋanjaŋ kölget. Mewö kölgetka miaŋgöreŋök naŋgu pakpak talgetka kösö azi pakpak yeŋgö ain tapepŋinan (muŋgamuŋga) lolohoba erök.

²⁷Mewö asuhuiga kösö miri galöm yaŋön gaun uruŋeyök wahörök. Wahöta kösö mirigö naŋguŋi pakpak tal tekögeri, mi eka jiyök, “Kösö azinöŋ an teköze me denöwö?” Mewö jiba mötmöriba jönömŋi unduiga bimgö sou ketaŋi mi kupinŋeyök öröba nanŋi aumamgö ahök.

²⁸Nanŋi aumamgö ahökmö, Polnöŋ pauŋpauŋ teriŋgöba kewö jiyök, “Nini körekŋanök ki tatzin. Mönö nangi silegi öne kude ayuhuman.”

²⁹Mewö jii möta kiwa waŋgimegöra qesii waŋgigetka ösumŋan kösö miri uruŋe anda jönömŋi unduiga Pol Sailas yetkö kösutŋire anda simin köl etkiyök.

³⁰Simin köl etkiba kösö mireyök etkuaŋgita eta kewö qesim etkiyök, “Azi ketaŋi yahöt, ni mönö denöwö akiga Anutunöŋ amöt qem niŋgiiga letotpileŋak?”

³¹Qesim etkiiga jiyohot, “Mönö urugi meleŋda Kembu Jisös möt narim waŋginöŋga gi aka saiwaurupkan mewöyök letota Suepkö buŋaya akŋe.”

³²Mewö jiyohotka miriŋe angetka könagesöurupŋi pakpak yembuk tokogetka Anutugöreŋ Buŋa keu jiyohot mötket.

³³Jiyohot möta suŋgemgö aua miaŋgöreŋök etkuaŋgita anda uziŋiri saŋgoŋnök. Saŋgoŋniga miaŋgöreŋök i aka saiwaurupŋi pakpak mi o melun mem eŋgiyohot.

³⁴O melun mem eŋgiyohotka etkuaŋgiri nene mire öŋgöba nene ohoba ala etkiyök. Etkiba nanŋi aka saiwaurupŋi yeŋön körek Anutu möt narigeraŋgöra sösöŋgai aket. Mewö.

³⁵Miri giaŋiiga keu jake galöm (majistreit) yeŋön opotöröp melaim eŋgigetka kösö mire kaba kewö jiget, “Azi yahöt mi mönö pösat etkinöŋga etmahot.”

³⁶Mewö jigetka wahibuknöŋ kaba buzup mi Polgöra kewö jii mörök, “Majistreit galöm yeŋön keu kewö alget kaza: Iŋiri mönö kösöŋiri pösatpiga etmahot. Miaŋgöra etkön mönö dölki mosöta eta luainöŋ anmahot.”