Aposol nup meme 15:8-21

⁸Anutunöŋ ambazip pakpak urunini möt kutuzawaŋön könaŋamŋi kondela Uŋa Töröŋi Juda ambazip neŋgöra melaiiga eröhi, miaŋgö dop mönö kian kantri ambazip yeŋgöra mewöŋanök i melaii uruŋine geyök.

⁹“Melaii geiga mewö miaŋön Juda ambazip qahö eŋgek soriba kantri tosatŋi qahö qepureim eŋgiyök. Qahöpmö, yeŋön Anutu möt narigetka siŋgisöndokŋini mosöta uruŋini saŋgoŋniga sarakŋi aket.

¹⁰Miaŋgöra iŋini mönö wuanöŋgöra Anutu esapesapnöŋ al waŋgibeak? Wuanöŋgöra gwarek dölökŋi yeŋgö qakŋine tem könjöŋ toroqeba alinga aŋgubeak? Tem könjöŋ mewöŋi mi nanine ambösakoninan me naninak mewöyök aŋgubingö dop qahö akmalin.

¹¹Mewö qahöpmö, kewö möt narizin: Kembu Jisösgö kalem möriamŋan mönö Anutu nam köl waŋgiiga amöt qem neŋgiiga Suepkö buŋaya akin. Kian kantri yeŋön mewöyök köna mohot miyök wuataŋgöba letota Suepkö buŋaya akingö möt narimakze.”

¹²Mewö jiiga kambu yeŋön lökŋanök keu jaruba bök tatket. Tatketka Pol Barnabas yetkön keu kösohotŋiri kewö jiyohot, “Anutunöŋ nam köl netkii kian kantrinöŋ anda sutŋine misin nup meziga aiwesök aŋgöletot ketaŋi ketaŋi asuhuget.” Mewö jiyohotka kezap ala mötket. Mewö.

¹³Pol Barnabas yetkön kösohotŋiri jim teköyohot mötketka Jeimsnöŋ keu kewö jiyök, “Azi alaurupni, nöŋön keu jibi kezap ala mötket.

¹⁴Anutunöŋ nalö mutukŋi kian kantri ambazip mesohol köl eŋgiba sutŋineyök ambazip nanŋaŋgöra möwölöhöm eŋgiiga qetŋi bisiba könagesöŋi toroqeget. Anutunöŋ mewö aka könaŋamŋi kondel neŋgiyöhi, Saimon Pitönöŋ miaŋgö keuŋi jii mötzin.

¹⁵Keu mewöŋi mi kezapqetok ambazip yeŋön mewöyök naŋgöba jize. Yeŋön keu kun kewö ohoget ahöza,

¹⁶‘Miaŋgö andöŋe nöŋön liliŋgöba kaba kiŋ Deiwidkö kantri tohoŋi kunbuk memba wahötmam. Yaŋön mutuk jakömbuak koumŋi qeba ambösakonini galöm köl eŋgiiga koumŋan buratiba tiŋgita erökmö, nöŋön mi kunbuk möhamgöba kuŋgubiga kantrinöŋ ölöwaka kinma.

¹⁷Mi kewö asuhumapköra akŋam: Ambazip kambu tosatŋi pakpak yeŋön Kembu jarume. Kian kantri pakpak nani buŋani akŋegöra eŋgoholali, yeŋön Kembu ni göraim niŋgime. Kembu nöŋön mewö jizal aka miaŋgö dop kantriŋini mem ölöwakŋam.

¹⁸Mewö ahakzali, mi mönö möpŋaŋgö möpŋeyök möta kota malje.’

¹⁹“Miaŋgöra Jeims nöŋön keu mi kewöta mötmötnan kewö möta jizal: Kian kantri ambazip uruŋini Anutugöreŋ meleŋjei, neŋön mönö lömböt könjöŋ ketaŋi yeŋgö qakŋine alinga qahö dop kölma.

²⁰Mewö qahöpmö, yeŋgöra kimbi kewö ohoinga dop kölma: Yeŋön sömbup busuŋi bem lopioŋgö naluk buŋa qeba könaŋine algetka ösumŋinan walöŋnöhi, mi kude neme. Sero yoŋgorö kude akŋe. Sömbup jölŋi qeqeŋaŋgö busuŋi aka sep mi kude neme. Yuai 4 mi mosötmegöra jim köhöibinak.

²¹Mosesgö Köna keu mi mönö möpŋaŋgö möpŋeyök miri dop jim asariba kota maljin. Mi Sabat kendon dop köuluk mirinine oyoŋda mörakzin. Miaŋgöra keu 4 mi ölöp qahö mosötpin.” Mewö.