Aposol nup meme 13:1-35

¹Antiokia sitinöŋ tosatŋan uruŋini meleŋda urumeleŋ könagesö aketka jitŋememeŋini kewöŋan kezapqetok keu jiba kusum eŋgiba malget: Qetŋini Barnabas aka Simeon qetŋi kun Injaŋi (Grik keunöŋ Naijö) aka Lusius (Sairini gölmegöra), Manain (mi kembu gawönö Herod yambuk öröröŋ mala qariyohot) aka Sol.

²Urumeleŋ könagesö yeŋön Kembugö waikŋi memba möpöseiba nene siŋgi malgetka miaŋgöreŋ Uŋa Töröŋan kewö jiyök, “Nöŋön Barnabas aka Sol nup qainŋi kun memahotköra etkoholal. Miaŋgöra eŋön mönö i jim teköba melaim etkigetka anmahot.”

³Mewö jiiga köulukömegöra nene siŋgi mala böröŋini nöröpŋire algetka Kembugö ösumŋan etkualöŋniga melaim etkigetka anohot. Mewö.

⁴Uŋa Töröŋan mewö melaim etkiiga miri qetŋi Selusia miaŋgöreŋ geyohot. Miaŋgöreŋ geba waŋgenöŋ öŋgöyohotka opo seri öröba möröreŋgögetka luhutnöŋ naŋgöi anda gölme jölanŋi Saiprus miaŋgö wehön kotkotŋe aŋgotket.

⁵Aŋgotketka siti qetŋi Salamis miaŋgöreŋ anda Juda ambazip yeŋgö köuluk miriŋi miriŋi miaŋgöreŋ öŋgöba Anutugö Buŋa keu jiba uru kuŋgum eŋgiyohot. Azi qetŋi Jon i mewöyök waŋgirohotka yetpuk anda kaba alabaukŋira malök.

⁶Mewö mala gölme jölanŋi jömukŋi liliköba kutuba likepŋe wehön gegeŋe Pafos sitinöŋ aŋgotket. Miaŋgöreŋ aŋgota Juda azi qetŋi Barjisös miwikŋaiget. Yaŋön suŋa jinaŋ azia aka kezapqetok azi takapulakaŋi malök.

⁷Suŋa azi mi gölme jölanŋi miaŋgö kiapŋi qetŋi Sergius Pol yaŋgö mire tata malök. Kiap miaŋön mötkutukutu azia malök. Mewö mala Anutugöreŋ Buŋa keu mötmamgö sihimŋi ahöiga Barnabas Sol köl öröm etkii yaŋgöreŋ kayohot.

⁸Kayohotmö, Elimas, (suŋa memegöra qetŋi Grik keunöŋ mewö jimalgeri,) yaŋön kiapnöŋ Anutu möt narim waŋgibapuköra tuarenjoŋ ak etkiba kiap uruŋi keunöŋ eŋololoŋ memamgö esapköyök.

⁹Esapköiga Sol, qetŋi alaŋi Pol qetkeri, Uŋa Töröŋan yaŋgö uruŋi kokolak qei Elimas törörök ek kutuyök.

¹⁰Ek kutuba kewö jiyök, “Yei! Timbiqimbilim azi gi mönö Bölöŋi Toŋaŋgö moröya akzan! Satanöŋ urugi isimkakaleknöŋ kokolak qeiga silenöŋ alal könaŋi könaŋi aka malakzan. Keu diŋdiŋi pakpakö kerökŋi aka Kembugöreŋ köna diŋdiŋi möwöramgönöŋga goŋgimakzawi, mi mönö mosötman me?

¹¹Miaŋgöra mötnöŋ! Kembunöŋ mönö böröŋi qake aliga ösumŋan turum gihiiga jegi gömölii wehön asakŋi ekŋamgö osiman. Yaŋön nalö meyöhaŋgö dop mönö jaŋjuŋ aka malman.” Jii miaŋgöreŋök söŋaupnöŋ qakŋe eta turui ömuŋ köla jipjap aka iliŋgösöŋ anda kaba böröŋe memegö qesiba böröŋan mezaŋqezaŋ ahök.

¹²Yuai mi asuhuiga kiapnöŋ mi eka Kembugö Buŋa keu mötmötŋaŋgöra welipköba möt narim waŋgiyök. Mewö.

¹³Polnöŋ neŋakurupŋi yembuk Pafos miri mosöta waŋgenöŋ öŋgögetka opo seri öröba möröreŋgögetka luhutnöŋ naŋgöiga anda mala Pamfilia prowinsgö siti qetŋi Perga miaŋgöreŋ aŋgotket. Miaŋgöreŋ aŋgota kinda Jonöŋ etkömosöta eleŋda Jerusalem sitinöŋ liliŋgöyök.

¹⁴Liliŋgöyökmö, yetkön Perga siti mosöta toroqeba anda Pisidia prowinsgö taon qetŋi Antiokia miaŋgöreŋ aŋgorohot. Miaŋgöreŋ aŋgota Sabat kendonöŋ köuluk miriŋine öŋgöba tarohot.

¹⁵Tarohotka köuluk mirigö galöm yeŋön Mosesgö Köna keu aka kezapqetok yeŋgöreŋ Buzup Kimbi oyoŋda welen algetka eta kewö qesim etkiget, “Azi alayahöt, etköreŋ keu kun könagesö urunini kuŋgubingöra ahöza ewö, mi mönö ölöp jiyohot mötpin.”

¹⁶Mewö jigetka Polnöŋ wahöta börö misiba kewö jiyök, “Israel kianurup aka gölme toŋi nembuk Anutu waikŋi memba möpöseimakzei, iŋini mönö kezap ala mötket.

¹⁷Israel ambazip kambu nanine bemnini mi Anutu. Yaŋön bömönurupnini möwölöhöm eŋgiiga ambösakonurupninan Ijipt gölmenöŋ anda kian aka malget. Anutunöŋ nalö miaŋgöreŋ Israel ambazip kambu mi töhötmöriam eŋgiiga sehiba qetbuŋaŋinambuk aket. Mewö aketka Anutunöŋ aŋgöletot aka kukösumŋi kondela miaŋön eŋguaŋgiri Ijipt kantri mosöta yaigep kaget.

¹⁸“Kaba mala gölme qararaŋkölkölŋe kutuba kaba ahakmeme bölöŋi aka malgetka Anutugö irimŋan seholiiga (yara) yambu 40:gö dop urubölö möta malök.

¹⁹Möta malökmö, töndup kaba mala Kenan gölmenöŋ kaŋgotket. Kaŋgotketka miaŋgöreŋ ambazip kambu 7 közöla köndeŋ eŋgiba gölmeŋini memba mendeŋda isikurupnini toŋe toŋe akŋegö buŋa qem eŋgiyök.

²⁰“Mewö asuhuiga (yara) yambu 450 miaŋgö dop anök. Miaŋgö andöŋe Anutunöŋ jimtekötekögö azi kembuŋi kembuŋi kuŋgum eŋgiyök. Mi kuŋgum eŋgii mala kotketka Samuelnöŋ asuhuyök. Yaŋön jimtekötekögö azi kembu qöndökŋi aka kezapqetok azia malök.

²¹“Samuelnöŋ asuhuba mali nalö miaŋgöreŋ kiŋ kembugöra uletketka Anutunöŋ azi qetŋi Sol eŋgiyök. Sol yaŋön Benjamin isikurup yeŋgöreŋök azi qetŋi Kis yaŋgö nahönŋa ahök aka (yara) yambu 40:gö dop kiŋ kembuŋina malök.

²²Mi malökmö, Anutunöŋ Sol uteköba salupŋe azi qetŋi Deiwid kiŋ azi kembuŋini akŋapköra möwölöhöba kuŋguyök. Kuŋguba könaŋamŋi jim asariba kewö jiyök, ‘Nöŋön Jesigö nahönŋi Deiwid miwikŋaizal. Yaŋgö uruŋi kewöta mötpi ölöp dop köl niŋgiza. Yaŋön mönö ahakmemeŋi pakpak miaŋgöreŋ nöŋgö jitni tem köla malma.’

²³Anutunöŋ mönöwök Amötqeqe Toŋi melaim neŋgimapkö jiyöhi, jöhöjöhö keu miaŋgö ölŋan mönö kewö asuhuyök: Deiwidkö gwölönarökurupŋi yeŋgöreŋök azi qetŋi Jisös asuhuiga Anutunöŋ i Israel kambu neŋgö Amötqeqe Tonini aka malmapköra kuŋguyök.

²⁴“Jisösnöŋ qahö asuhuiga qeljiŋe miaŋgöreŋ Jonöŋ mutuk kaba kewö jiba malök, ‘Iŋini mönö uruŋini meleŋget. Uruŋini meleŋgetka nöŋön o melun mem eŋgimam.’ Mewö jiba Israel ambazip kambu pakpak uru kuŋgum eŋgiba malök.

²⁵Mewö malökmö, yaŋön mirililik nupŋi mem tekömamgö aka miaŋgöreŋ kewö jii mötket, ‘Iŋini nöŋgöra denöwö mötmörize? Yuai mötmörizei, nöŋön mia qahöpmö, mötket, nöŋgö andöne azi kun kama. Yaŋön kaiga nöŋön yaŋgö qöhöröŋe eretŋi maljalaŋgöra wayangösöŋi teŋgöba köna esu kösöŋi pösatmamgö qötötaŋgömam.’

²⁶“O alaurupni, Abrahamgö gwölönarökurupŋi aka gölme toŋi eŋön nembuk Anutu waikŋi memba möpöseimakzei, Anutunöŋ amöt qem neŋgimapkö Buŋaŋi mi ali neŋgöreŋ kaza.

²⁷Miaŋgö könaŋi kewö: Jerusalem toŋi aka galömurupnini yeŋön Jisösgö könaŋi qahö möt kutuget. Kezapqetok yeŋgöreŋ Buzup Kimbi Sabat kendon dop oyoŋmakzemö, miaŋgö könaŋi qahö möt asarimakze. Mewö tönpin maljemö, töndup galömkölköl aziurupninan Jisös kömumapkö keuŋi jim tekögetka kezapqetok ambazip yeŋgöreŋ keu mi mewö miaŋön ölŋambuk ahök.

²⁸Yeŋön Jisös kömupkö buŋa akŋawaŋgö dop keu könaŋi jaruba kun qahö miwikŋaiba töndup “Yapmakek!” qetket. Qeta Pailötnöŋ jim teköi kömumapkö qeta uletket.

²⁹“Yaŋgöra keu pakpak ohoget ahözawi, yeŋön mönö miaŋgö dop aketka ölŋi ahum teköiga Jisös ipnöhök meköba eta qaksirinöŋ anda köt köteŋ uruŋe alget.

³⁰Algetmö, Anutunöŋ i kömupnöhök mem gulii wahörök.

³¹Wahöri yambuk Galili prowinsnöhök Jerusalem sitinöŋ kageri, yeŋgöra mönö silim gwötpuk miaŋgöreŋ asuhum eŋgiyök. Alaurupŋi asuhum eŋgiyöhi, yeŋön nalö kewöŋe ambazip sutŋine dangunu ewö kinda könaŋi naŋgöba jim asariba malje.

³²Anutunöŋ Juda ambösakonurupnini yembuk yuai akŋamgö keu jim jöhöiga nini yeŋgö gwölönarökurupŋini ahinga keu walŋi miaŋgö ölŋan mönö nalö kewöŋe neŋgöra kewö asuhuyök: Yaŋön Jisös mem gulii wahöta malja. Miaŋgöra neŋön miaŋgö Buŋa ölöpŋi mi jim asarim eŋgizin.

³³“Anutunöŋ Jisösgöra keu jii Deiwidnöŋ möri Sumbara (Buŋa liŋet Sam) jaŋgö yahöt miaŋgöreŋ kewö ohoi ahöza, ‘Göŋön nani nahöna akzani, nöŋön mi merak ambazip eŋgöra kondelbiga eka mötze.’ Yaŋön keu miaŋgö dop Jisös mem gulii wahörök.

³⁴Jisös mem gulii kömupnöhök wahöta köhöiba mala könaŋgep kunbuk qahö kömuma. Miaŋgö keuŋi Anutunöŋ kewö jii ahöza, ‘Ni kalem möriamni kiŋ Deiwid waŋgiba malbiga sarakŋi aka pöwöwöm köhöiba kinöhi, miaŋgö dop mi mönö eŋgöra tököm eŋgimam.’

³⁵Deiwidnöŋ miaŋgö keuŋi mi Sumbara (Buŋa liŋet Sam) kun miaŋgöreŋ mewöyök kewö ali ahöza, ‘Nangahö wölböt azigi sarakŋi i mönö qahö mosötnöŋga kömupkö lömnöŋ qahö gisahöma.’