Aposol nup meme 12:3-15

³Mewö jii kömuiga Juda ambazip tosatŋan mi mötket ölöwahiga ehök. Mi eka miaŋgöra toroqeba jiiga Pitö mewöyök memba jöhöget. Yuai mi beret yistŋi qahöpkö kendon nalöŋe jiiga asuhuyök.

⁴Miaŋgöra kiŋnöŋ kewö jiyök, “Nöŋön ak-kömukömu kendon teköiga Juda yeŋgö keu jakeŋe almam.” Mewö jiba jii kösö mire alget. Algetka yarö azi 16 yeŋön sutŋine kambu 4 köla nalö utekutek aketka azi 4:ŋan sundan suŋgem asak kinda galöm mem waŋgiba malget.

⁵Pitö mewö galöm mem waŋgiba malgetka kösö mire ahöyökmö, urumeleŋ könagesö yeŋön sundan dop yaŋgöra aka Anutu kapaŋ köla köuluköba malget. Mewö.

⁶Köuluköba malgetka ak-kömukömu (Pasowa) kendon teköiga suŋgem miaŋgöreŋ yarö azi yahötŋan Pitö tapep (muŋgamuŋga) yahötnöŋ jöhöm köhöiyohotka sutŋire gaun ahöyök aka wahibuk tosatŋan naŋgu andöŋe kinda kösö miri galöm meget. Kiŋ Herodnöŋ miri giaŋiiga Pitö waŋgita keu jakeŋe almamgö mötmöriba areŋ ali gaun ahöget.

⁷Gaun ahögetmö, Kembugö garata kunŋan wölaŋ asuhuba Pitö qöhöröŋe kini kösö mirigö uruŋi asarim teköi Pitögö nambulŋe qeba jiyök, “Mönö zilaŋ wahötnöŋ.” Mewö jii tapep (muŋgamuŋga) yahötŋan miaŋgöreŋök Pitögö böröŋeyök öne sulohot.

⁸Sulohotka garatanöŋ jii mörök, “Mönö opogi jöhöba köna esugi utnöŋ.” Mi möta mewö ahök. Mi aiga toroqeba jii mörök, “Mönö malukugi kölnöŋ geiga ni nuataŋgöba kaman.”

⁹Mewö jii möta miri uruŋi mosöta wuataŋgöyök. I wuataŋgöba anökmö, garatanöŋ yuai ahöhi, mi ölŋa asuhuyök me qahö, yaŋön miaŋgöra möri jaŋjuŋ ahök. Yaŋön gaun ahöba imut ehöhi, miaŋgö tandöktandök möri ahök.

¹⁰Miri uruŋi mosöta naŋgu mutukŋe galöm memba kinohori, mi etkoŋgita naŋgu kunöŋ aŋgota etkoŋgita öne kutuba anda kösö miri sileŋaŋgö ain kiripoŋe aŋgorohot. Aŋgorohotka naŋgu köhöikŋi ketaŋi miaŋön mönö nanŋök öne taliga yaigepŋe siti köna numbuŋe geyohot. Geba köna namŋi strit kun toroqeba anohotka garatanöŋ wölaŋ Pitö mosöta sök alök.

¹¹Sök aliga Pitögö uruŋi tohoiga kewö jiyök, “O Kembunöŋ mönö garataŋi melaii kaba Herodgö böröŋeyök meköm niŋgiza, mi mötzal. Juda ambazipnöŋ nöŋgö silene yuai asuhumapköra mambötzei, yaŋön mönö yuai pakpak miaŋgöreŋök bohoni jöhöza. Nöŋön dölki mi ölŋa möt kutuzal.”

¹²Mewö möt kutui asariiga Jongö namŋi Mariagö mirinöŋ göröken anök. Jon miaŋgö qetŋi kun Mak qetket. Miri miaŋgöreŋ ambazip gwötpukŋan tokoba Anutu köuluköba malget.

¹³Mewö malgetka Pitönöŋ kaba söndaknöŋ kinda naŋgunöŋ qeyök. Naŋgunöŋ qeiga welenqeqe ambi qetŋi Roda yaŋön kaba “Gi daŋön?” jiba qesiyök.

¹⁴Qesiba kinda Pitögö jölŋi möt kutuba “I-ia kazan!” jiba söŋgaiba luhuba naŋgu qahö öröba ösumŋan miri uruŋe öŋgöba jiyök, “Pitönöŋ kaba naŋgunöŋ kinja.”

¹⁵Jii möta yaŋgöra “Urugi sohoi jizan,” jiget. Jigetmö, yaŋön bohon köla “Keu ölŋa jizal!” jiyök. Mewö jiiga jiget, “Mi mönö Pitögö garataŋan kinja.”