Aposol nup meme 11:4-15

⁴Mewö jigetka könakönahiŋeyök könahiba yuai asuhuyöhi, mi körek pakpak areŋambuk jim asarim eŋgiba kewö jiyök,

⁵“Nöŋön Jopa sitinöŋ mala köuluköbiga Kembugö alburupŋan nuŋguiga tata imut kun kewö ehal: Suepnöŋ aŋaŋiiga könde ketaŋi kun erök. Könde mi opo tuatŋi ketaŋaŋgö tandök ewö ahök. Garata yeŋön yuai miaŋgö waŋgömŋi 4 miaŋgöreŋ memba naŋgöbeak, miaŋgö tandök ewö nöŋgö kösutneyök eta ahöyök.

⁶Eta ahöiga yuai miaŋgö uruŋe törörök ekiga sömbup könaŋi könaŋi miaŋgöreŋ tatket. Sömbup tosatŋi mi gölmenöŋ köna 4:ŋan tiba anakze. Tosatŋi kalŋi könöpŋinambuk akze. Tosatŋan wösöŋinan ölölöŋgöba anakze. Mewöyök nei könaŋi könaŋi könakemba bölbölgöba anakzei, yuai mewö mi könde miaŋgö uruŋe mohotŋe etketka eŋgehal.

⁷Eŋgekiga qet kun mewöyök asuhuba kewö jii möral, ‘Pitö, mönö wahöta yuai ki qeba ohoba nenöŋ.’

⁸“Mewö möralmö, nöŋön kewö jial, ‘O Kembu, ni miaŋgöra imbiloŋloŋ mötzal. Yuai dönqizin aŋgöjörakŋambuk mewöŋi mi nalö kungen nöŋgö numbunan qahö oseiyök. Miaŋgöra mi mönö qahö kötökŋi nemam.’

⁹Mewö jibiga qet miaŋön kunbuk Suepnöhök asuhuba kewö jiyök, ‘Anutunöŋ yuai jim könjörari ahözawi, göŋön miaŋgö qetŋi aŋgöjörakŋambuk mewö kude qetman.’

¹⁰Yuai mewöŋi mi indimŋi karöbut asuhuyök. Mewö asuhuiga yuai pakpak mi kunbuk örögetka Suepnöŋ liliŋgöba öŋgöyök.

¹¹Öŋgöba atatop (jiatatoŋ) köliga nalö miaŋgöreŋök Korniliusnöŋ Sisaria taonöhök azi karöbut melaim eŋgii nöŋgöreŋ kageri, yeŋön miri tarini, miaŋgö naŋguŋe kinget.

¹²“Naŋguŋe kingetka Uŋanöŋ kewö jim kutum niŋgii möral, ‘Gi mönö uruyahöt yaköriba yembuk anman.’ Keu mi mötpiga urumeleŋ alaurupni 6 yeŋön mewöyök Jopa mosöta nömbuk Sisaria taonöŋ anin. Sisaria aŋgota suahö galöm miaŋgö mire öŋgöin.

¹³Öŋgöinga keu kösohot kewö ak neŋgiyök, ‘Garata kunŋan nöŋgö mire asuhuiga ekiga kinda kewö jii möral: Gi mönö Jopa mire kolek ala azi qetŋi Saimon, qetŋi kun Pitö i waŋgita kaget.

¹⁴Yaŋön kaiga Buŋa keu jiiga gi aka saiwaurupkan mi möt nariba uruŋini meleŋgetka körek amöt qem eŋgiiga letotme.’

¹⁵“Kösohot mi ak neŋgiiga nöŋön könahiba Buŋa keu jial. Mi jibi mötketka Uŋa Töröŋan könakönahiŋe neŋgö urunine geyöhi, mönö miaŋgö dop kezap ala mötketka yeŋgö uruŋine mohot geyök.