Aposol nup meme 10:30-47

³⁰Mewö jiiga Korniliusnöŋ meleŋnök, “Ni mare kunöŋ nalö kewöŋe 3 kilok miaŋgöreŋ mirine tata köuluk nup memba mala kotpi merak sömaŋi 4 akza. Köuluk nup memba malbiga miaŋgöreŋök azi kun sileötaŋi asakmararaŋambuk miaŋön asuhuba wösöne kinök.

³¹“Wösöne kinda kewö jiyök, ‘Kornilius, gi köuluköba malnöŋga keugi Anutugöreŋ öŋgöiga möri ölöwakza. Gi kalemŋi kalemŋi ambazip wanapŋi mendeŋ eŋgimakzani, mi Anutunöŋ möta aŋgön köla göhöra mötmöriba melaim niŋgiiga kazal.

³²Miaŋgöra mönö dölki kolek alnöŋga Jopa taonöŋ aniga azi qetŋi Saimon, qetŋi kun Pitö qetzei, ia waŋgita kame. Yaŋön sömbup sileŋaŋgö nup meme azi Saimon yaŋgö mire köwet jitŋe malja.’

³³“Mewö jiyöhaŋgöra aka nöŋön miaŋgöreŋök kolek albiga göhöreŋ kaget. Göŋön keuni möta kazanaŋgöra uruni ölöwakza. Kembunöŋ keu pakpak jimangö jim kutum gihiyöhi, göŋön mi ölöp jinöŋ mötpin. Nini pakpak dölki miaŋgöra tokoba Anutugö jemesoholŋe ki tatzin.” Mewö.

³⁴Korniliusnöŋ mewö jiiga Pitönöŋ könahiba kewö jiyök, “Aha! Anutunöŋ ambazip tosatŋi qahö eŋgek soriba tosatŋi qahö qepureim eŋgimakzapmö, dop mohotnöŋ kewöt neŋgimakza. Yaŋgö jeŋe kunŋan aŋgöjörakŋambuk qahö akza. Nöŋön mi dölki ölŋa möt kutuzal.

³⁵“Mewö qahöpmö, ambazip kambuŋi kambuŋi körek yeŋgö sutŋine denike yeŋgöreŋök kunŋan Anutu waikŋi memba möpöseiba aiakaŋan köna diŋdiŋi wuataŋgözawi, yaŋön mönö Anutugö jeŋe dop kölja.

³⁶Jisös Kraistnöŋ ambazip körek neŋgö Kembuya aka luai qem neŋgimakzawi, Anutunöŋ Buŋa keuŋi mi Israel könagesö neŋgöreŋ ali kayök. Buŋa miaŋön kaiga nini miaŋgö Ölöwak Buŋaŋi jim asariba maljin.

³⁷Jonöŋ ambazip uruŋini kuŋguba kewö jiyök, ‘Iŋini mönö uruŋini meleŋgetka nöŋön o melun mem eŋgimam.’ Mewö jiiga miaŋgö andöŋe keu mi Galili prowinsnöŋ könahiba jiget sehiba anda Judia prowinsnöŋ aŋgota körek dop kölök. Iŋini mi lök mötze.

³⁸“Anutunöŋ Uŋa Töröŋi Nazaret azi Jisösgö uruŋe mokoiga kukösum buŋa qem aŋguba gölme dop liliköba malöhi, mi yambuk kiniga anda ambazip ak kömum eŋgiyök. Bölöŋaŋgö Toŋan ambazip ösumŋan jöhöba öröm eŋgii gegeri, yaŋön mi pakpak mem ölöwak eŋgim teköyök.

³⁹Yuai mi Juda neŋgö gölmenöŋ aka Jerusalem sitinöŋ aka memba maliga ip kembaŋe ala qeget kömuyök. Nini mi pakpak eka naŋgöba jiba dangunuŋi aka kinjin.

⁴⁰Kömumba ahöi sömaŋi karöbut aiga Anutunöŋ mem gulii wahörök. Wahöta indimŋi gwötpuk ambazip asuhum eŋgiyök.

⁴¹“Yaŋön ambazip kambu pakpak yeŋgöra qahö asuhuyökmö, Anutunöŋ mutuhök nini möwölöhöm neŋgiiga Jisösnöŋ kömupnöhök wahöta malöhi, nalö miaŋgöreŋ yambuk keu eraum möta nene aŋgum nem malini, mönö neŋgöra asuhuiga nini miaŋgö keuŋi naŋgöba jiba kinjin.

⁴²Mewö kininga Jisösnöŋ kewö jim kutum neŋgiyök, ‘Anutunöŋ kuŋgum niŋgiiga nöŋön ambazip maljei aka kömugeri, yeŋgöreŋ jimtekötekö Toŋina akzal. Miaŋgöra eŋön mönö nöŋgö könaŋamni mi ambazip kambu dop yeŋgöra naŋgöba jim asariba malme.’

⁴³Ambazip denike yeŋön Jisös möt narim waŋgiba qetŋi qerakzei, Anutunöŋ mönö qet mi möta yeŋgö siŋgisöndokŋini mosöta saŋgoŋmakza. Yaŋgö könaŋamŋi mewö ahözawi, mi kezapqetok ambazip körek yeŋön naŋgöba jim asariba ohoget ahöza.” Mewö

⁴⁴Pitönöŋ keu mewö jibayök kiniga Uŋa Töröŋan ambazip kezap ala mötkeri, yeŋgö uruŋine geyök.

⁴⁵Anutunöŋ Uŋa Töröŋ kalemŋi mi kian ambazip yeŋgö uruŋine mewöyök mokoi geyöhi, mi Pitögö alaurupŋan eka auruget. Juda ambazip sileŋine Anutugö aiwesökŋi yandigetka uruŋini meleŋda Jisös möt nariba Pitö wuataŋgöba kaba tatkeri, mieŋön mönö auruba kewögöra welipköget:

⁴⁶Yeŋön kantri tosatŋi yeŋgö keuŋini murutŋi murutŋi könahiba jiba Anutu möpöseiget. Miaŋgöra welipkögetka Pitönöŋ kewö qesiba jiyök,

⁴⁷“Yeŋön Uŋa Töröŋi mi neŋön ahin ewö aŋgön köla buŋa qem aŋguzei, mi mötzin. Miaŋgöra i ölöp o melun mem eŋgiinga dop kölma. Mi ahinga daŋön qetal neŋgibawak?”