Aposol Gawoŋ Meme 10:25-36

²⁵Keuma Piitonoŋ mirinoŋ umambaajoŋ ano Korniliusnoŋ waama kamaaŋ joloŋa jeŋ kanianoŋ kemeŋ usugoŋ muro.

²⁶Usugoŋ muroto, Piitonoŋ borianoŋ meŋ kobibiiro waaro kokaeŋ ijoro, “Mono waaba, nii kaaŋiadeeŋ baloŋ ejaga koloojeŋ.”

²⁷Kaeŋ ijoro iwo amiŋ moma miri uutanoŋ uri ejemba mamaganoŋ ajorooŋ ragiti, ii iŋiiro.

²⁸Iŋiima kokaeŋ iŋijoro mogi, “Oŋo Juuda ejemba nonoo kanianana moju. Juuda nono ejemba wabaya oŋoo mirinoŋ uma oŋowo ainjoloŋ rarawaa soŋgo ero amamaaŋkejoŋ. Ii amamaaŋkejonto, Anutunoŋ qaaya moŋ qendeema noma kokaeŋ nijoro, ‘Giinoŋ ejemba ii me woi yoŋoo qagia ii aŋgonjora arokuukuuyawo kaeŋ mende qaba.’

²⁹Kawaajoŋ oŋo qele ama koma horoŋ noŋgi niinoŋ mende qotogoŋ kaŋ koujeŋ. Kouma kokaeŋ qisijeŋ: Oŋo mono naambaajoŋ qele ama koma horoŋ noŋgi? Ii saanoŋ jegi momaŋa.”

³⁰Kaeŋ iŋijoro moma Korniliusnoŋ meleeno, “Nii mare moŋnoŋ kambaŋ kokaamba 3 kilok kanoŋ mirinanoŋ rama qamakooli gawoŋ meŋ laligoŋ koube kete somaŋa 4 kolooja. Qamakooli gawoŋ meŋ laligowe iikanoŋadeeŋ eja moŋ selekopaaya asamararaŋawo kanoŋ asugiŋ bananoŋ nano.

³¹“Bananoŋ nama kokaeŋ nijoro, ‘Kornilius, gii qama kooliŋ laligona qaaga Anutuwaanoŋ uro moro awaa kolooja. Gii kaleŋa kaleŋa ejemba wanaya mendeema oŋomakejaŋi, ii Anutunoŋ moma aŋgoŋ koma goojoŋ romoŋgoŋ wasiŋ nono kajeŋ.

³²Kawaajoŋ mono keteda koi qele ana Jopa taonoŋ keno eja qata Saimon, qata moŋ Piito qajuti, iiga wama kawu. Iinoŋ oro selianoŋ gawoŋ meme eja Saimon iwaa mirinoŋ kowe goraayanoŋ laligoja.’

³³“Kaeŋ nijorotiwaajoŋ ama niinoŋ iikanondeeŋ qele ambe goonoŋ kagi. Giinoŋ qaana moma kajaŋiwaajoŋ uuna qeaŋgoja. Poŋnoŋ qaa kuuya jewagiwaajoŋ jeŋ kotoŋ gonoti, giinoŋ ii saanoŋ jena moboŋa. Nono kuuya keteda koi iikawaajoŋ ajorooŋ Anutuwaa jaasewaŋanoŋ koi rajoŋ.” Kiaŋ.

³⁴Korniliusnoŋ kaeŋ jero Piitonoŋ kanaiŋ kokaeŋ jero, “Ahaa! Anutunoŋ ejemba tosaaŋa mende iŋiisosorooŋ tosaaŋa mende sureeŋ oŋomakejato, so motooŋgonoŋ gosiŋ nonomakeja. Iwaa jaanoŋ moŋnoŋ aŋgonjorayawo mende kolooja. Niinoŋ ii keteda koi oŋanoŋ moma kotojeŋ.

³⁵“Kaeŋ qaagoto, ejemba tuuŋa tuuŋa kuuya noŋoo batunananoŋ daeŋ yoŋoonoŋga moŋnoŋ Anutu waeya meŋ mepeseeŋ kaiyakayanoŋ kana dindiŋa otaaji, iinoŋ mono Anutuwaa jaanoŋ sokonja.

³⁶Jiisas Kraistnoŋ ejemba kuuya ananaa Poŋnana kolooŋ luae qeŋ nonomakeji, Anutunoŋ Buŋa qaaya ii Israel kanageso nonoonoŋ ano karo. Buŋa iikanoŋ karo nono iikawaa Oligaa Buŋaya jeŋ asariŋ laligojoŋ.