Aposol 9:2-25

²ome antahigegeno mago'a avona kremigeno erino Damaskasi vuno atruma nehu'za mono nehaza nontamimpi (sinagogs) marerino huama huno, agrama veo, aro Kraisti amage' nentaza vahe'ma zamagesuno'a, kina rezmanteno eteno zamareno Jerusale vugahie huno kre'ne.

³Agrama vuno Damaskasi urava'o nehigeno'a, ame huno monafinkati hanavenentake tavi'mo agrite remsa huntegeno,

⁴traka huno mopafima nemseno'a, agrama mago kezankema antahi'nea kemo'a anage hu'ne, Sol! Sol! Na'a higenka Nagrira kna nenamine?

⁵Higeno kenona'a, Ramoka, Kagra izage? huno higeno, Agra huno, Nagra Jisasine, kagrama knama nenamina Nere.

⁶Hu'neanagi otinka ana kumapi ufrenka vuge'za, kagrama nankna'zama hanana zamofo kea kasmigahaze.

⁷Soli enema nevaza vene'nemo'za kea osu'za oti'za mani'ne'za, kema hia agerura antahi'nazanagi, mago vahera onke'naze.

⁸Soli'a mopafinti otigeno, avumo'a hari hu'neanagi, mago'zana onke'ne. Magoka vu'naza vahe'mo'za azante avazu hu'za Damaskasia avare'za ufare'naze.

⁹Taregi magoki zagene haninena, avua onkeno ne'zane, ti'nena oneno amane mani'ne.

¹⁰Magora Jisasi amage' nentea nera, Ananaiasi'e nehaza ne'mo Damaskasi kumatera mani'neno, ava'na keankna huno negegeno, Ramo'a anage huno asami'ne, Ananaisi'o! Higeno ke nona hunteno, ama mani'noe Ramoka.

¹¹Anante Ramo'a asamino, otinka fatgoe nehaza kuma kampi vunka, Judasi nonte vunka, Tesasiti nera, Soli'e nehaza neku ome zamantahigo, na'ankure menina manino nunamu huvava nehie.

¹²Ana nehigeno Soli'ma ava'nagna'zama kefina, Ananaisi'ema nehaza ne'mo efrea zamo avuma kesigura azanteno nunamu hunentegeno, ana avanagnazampina ke'ne.

¹³Hianagi Ananaisi'a ke'nona'a huno, Ra Anumzamoka nagra rama'a vahepinti, nama'a vahe krerafama Kagrite'ma zamentintima nehaza vahe'ma Jerusale kumapima mani'naza zamahe'neana ana ne'mofo agenkea nagra antahi'noe.

¹⁴Nehuno ama kumapi eno, ugagota kva (hai pris) vahe'mo'za hugnare huntageno, iza'o Kagri kagima ahesaza vahera zamareno kina huzamante kva agi eri'ne.

¹⁵Hianagi Ramo'a anage huno agrira asami'ne, Vuo, na'ankure agrira ko huhampri ante'noakino, Nagri eri'za ne' manigahie. Hagi Nagri nagi nagenkea erino megi'a vahete'ene, kini vahete'ene, Israeli vahetera vugahie.

¹⁶Na'ankure nama'a kna'zama Nagri nagire'ma eri'sia zana, Nagra averi hugahue.

¹⁷Huno higeno, Ananaisi otino mani'nea nonte vuno, azama omenteno nunamuma hunteteno anage huno asami'ne, nenafu Soliga, kantegama neankeno, Ra Jisasi'ma kagrite efore'ma hu'nemo, kagrama etenka kavu negenka, Ruotge Avamura eri avitesane huno hunantege'na nagra e'noe.

¹⁸Anagema nehigeno'a, ame huno avuragafinti irikna'zamo knope ramigeno, avua eteno negeno otino mono ti fre'ne.

¹⁹Hagi anante ne'za neno hanavema e'nerino'a, Jisasima amage' nentaza disaipol naga'ene Damaskas mago'a kna mani'ne.

²⁰Ame huno, ana zupage Jisasi agigenkea osi mono nompi marerino, ama Nera Anumzamofo Mofavre huno huama huno zamasmi'ne.

²¹Hige'za maka antahiza vahe'mo'za tusiza hu'za antri nehu'za, anage hu'naze, Ama'na nera Jerusalema mani'neno, Jisasi agire'ma zamazeri havizama nehia nero? Menina eno Jisasi agima huama nehaza vahera kina huzamanteno zamareno ugota ra mono (hetprisi) kva vahete vunaku ne-eo? Hu'naze.

²²Hianagi Soli'a, antahintahi'afina hageno nevuno Jisasi'ema nehaza nera tazahu ne' Kraisi'e huno eri ama huno tusiza huno hanavetino nehigeno, ana kema Damaskasima mani'naza Jiu vahe'mo'za, nentahiza inankna huta nanekea huntesune ha hu'za kea osu'naze.

²³Mago'a knama evutege'za, Jiu vahe'mo'za komoru hu'za Solina ahenaku hu'naze.

²⁴Hu'nazanagi ana komoru hu'naza kemo'a Soli agesafi efre'ne. Zgene haninena ahe fri'snagu zamurga ra vihu kafante ke ankerete'za mani'naze.

²⁵Hu'nazanagi, Polima amage'nentaza disaipol nagamo'za kerage'afi avare'za eka eka kupi antete'za, kumamofo vihu keginamofo megi'a kankamumpi nofi rentete'za mago kaziga avazu nehu'za atrageno urami'ne.