Aposol 7:2-26

²Higeno Stiveni'a huno, nafuhetane nafaheta mika'motma nagri kea antahiho, nerageho Abrahamu'a, Mesapotamia mani'negeno, Msanentake Anumzamo'a avure ehanati'tegeno henka'a atreno Harania umani'negeno,

³Anumzamo'a amanage huno asami'ne, Vaheka'ane mopaka'anena atrenka, kaveri hanua mopare vuo. (Jen-Agf 12:1)

⁴Anante Kaldia mopa atreno, Harani kumate umani'ne. Anante Abrahamu nefa frigeno, Anumzamo'a huntegeno amama menima mani'nana mopare e'ne.

⁵Anumzamo'a mago mopa manisana zane huno Abrahamuna omi'ne, mago osi atupa'e huno refako huomi'ne. Mofavrea onte'tfa hunananagi Anumzamo'a huvempa hu'ne, ana hu'neanagi Nagra kagri'ene mofavre zgaka'a henka zamigahue huno hu'ne.

⁶Hianagi Anumzamo'a amanahu ke huno Abrahamuna asami'ne, Kagehe'za ru vahe mopafi, mopazmi omne vahe umanigahaze. 400 ti'a zgegfu'mofo agu'afina, mopa agafa vahe'mo'za kazokzo eri'za vahe zamavrente'za, kva huso'e huozmantegahaze.

⁷Hianagi Nagrani'a kazokzo eri'za zamisaza mopare vahera, nona'a zamazeri haviza huzmantegahue, huno Anumzamo'a hu'ne. Anama hute'za henka zamagra atre'za e'za ama mopare Nagrira eme nagi hanta vazigahaze. (Jen-Agf 15:13-14)

⁸Anumzamo'a Abrahamu'ene huvempa hagerafikea huno oku avufama tagahu nanekea hutegeno, Abrahamu'a, Aisakina nefaza higeno 8'a zgegnama nemaniana, oku avufa taga hu'naze. Aisaki'a Jekopu nefaza higeno, Jekopua 12fu'a tagehemofona nezmafa mani'ne. (Jen-Agf 17:10-14)

⁹Ana tagehe'mo'za Josefena kanive rente'za mizante atrage'za ru vahe'mo'za avare'za Isipi vu'naze. Ana hu'nazanagi Anumzamo'a agrane mani'neno,

¹⁰knama nemizageno'a aza nehuno, knare avu'vazane, antahizana Josefena amigeno, Isipi kini ne'mofo Fero avurera knare higeno, Fero'a huntegeno ugagota kva Isipia hu'neno, noma'afima me'neazane nemania vahetera anazanke huno kegva hu'ne.

¹¹Anante Isipi mopare'ene Kenani moparera ne'zana fanane higeno, vahe'mo'za tusi'a zamagate'zampi mani'zage'za, tagehe'za mago kavera hakare'za eri fore osu'naze.

¹²Hianagi ne'zana Isipi me'ne kema Jekopu'a nentahino'a, tagehemofona esete ne'za omerihogu huzmantege'za vu'naze.

¹³Anante'ma mago'ane (second time) vazageno'a, Josefe'ne huno agra'agu huama higeno, Fero'a, Josefe afuhe'za e'naza kea antahi'ne.

¹⁴Anantera Josefe'a ke naneke atrenteno nefa Jekopunku ene ana miko tuzgarazga'agura nagritega eho huno hu'ne, ana mika'a 75fu'e.

¹⁵Hanki Jekopu'a Isipi umani'neno, anantega agrane tagehezanena fri'naze.

¹⁶Anantegatira zaferina'a eri'za Sekemu vazazamo'za, Abrahamuma zagoma atreno Hamori mofavre nagapinti'ma mago'a zagoreti'ma mizama asente'nea kerigampi Sekamu ome asente'naze. (Jen-Agf 50:13)

¹⁷Hu'neanagi, Anumzamo'ma, Abrahamuma huvempama hunte'nea knamo'a kofta huno eku nehigeno, Isipima tagri vahe'ma mani'naza vahe'mo'za tusi vahe krerfa fore hu'naze.

¹⁸Henka Josefema antahino keno osu'nea kini ne' Isipi fore huno kegva hu'ne.

¹⁹Ana kinimo'a vahetia rezmatga nehuno, tagehe'ina havi avu'ava hunezmanteno kasefa mofavrema ksentenazana megi'a zamatrenke'za friho huno huhanavetine. (Ekso-Uti 1:8–2:15)

²⁰Anama hianknafi Mosesena ksentegeno Anumzamofo avurera hentofa mofavre fore huteno, 3'a ikamofo agu'afina nefa nompi manitegeno,

²¹henka avare'za megi'a ometrageno, Fero mofamo'a avareno agri'a mofavregna huno kegva hu'ne.

²²Mosese'a Isipi vahe'mofo antahi'zana rempi huno maka eriteno, kema hu'zampine, avu'ava'zama'afina hankave nentake ne' fore huno mani'ne.

²³Hu'neanagi 40ti'a zagegafu huku'ma nehuno'a nafuhei, Israeli vahera nantu antezmante nagesahie huno antahi'ne.

²⁴Mosese nevuno keana Isipi ne'mo, Israeli kazokzo eri'za nera nehegeno negeno, Israeli ne'mofo ahoke heno Isipi nera ahe fri'ne.

²⁵Mosese'a antahiana agri vahe'mo'za antahi ama hu'za, nagripi huvazino Anumzamo'a huntegeno tagrira tahokeheno tavarenaku e'ne hu'za hugahaze huno antahine, hianagi zamagra Mosesena antahi omi'naze.

²⁶Umaseno nanterana Mosese'a nevuno keana, tare Israeli ne'tremoke ha' nehakeno, zanarimpa zanazeri fru hunaku, agra amu'noznifi vuno znazeri atrenaku nehuno anage hu'ne, Ama ve rarena, tanagra kogna mani'na'e. Nahigeta hara neha'e?